« كلكن ليلي _ومعظمنا حسين أيضا | HomePage | هل تستسلم ليلي مع فقد الدعم الذكوري؟ »
12 September 2006
سيبك من ليلي البلوجر واسأل ليلي اللي في البيت
انهاردة كنت محضر مقالة أكتبها عن "ليلي والرؤية ما بعد الحداثية لفكرة الذات" لكنني تراجعت واستبدلته بهذه التدوينة لأنني اعتقدت أنها أكثر وضوحا وبساطة وأنجح من أختها.
الي كل الرجال الذين رفضوا كلام ليلي والي كل من سخر وتهكم بشتي الطرق علي المرأة وعلي الفكرة وعلي حال التدوين المصري – إليهم جميعا أقول دعونا نقلب الترابيزة كلها باللي عليها ونروح لفكرة أكثر جذرية من كل الكلام اللي ليلي قالته.
يا ذكور التدوين – كلكم – الذين رحبوا بليلي والذين تهكموا لنفترض جميعا أن زينب تبقي بنت أخت نوال السعداوي، وأن الدكتورا روزا تنتهج أجندة نسوية شديدة التطرف وأنها بتقبض فلوس من المفكرة النسوية بيتي فريدن – ألف رحمة ونور تنزل عليها، وأن فريدة عندها عقدة من جنس البنات وأن إبيتاف بتكره الراجل لأنه راجل وأن لست أدري هيه كمان عايشة في الوهم وأنها بتعمم كل الكلام علي كل امرأة وأن زنوبيا كبرت الموضوع واستلهمت قاسم أمين مع أنه عميل ومارق... في حد تاني من البنات والسيدات كتب حاجة تنرفز؟ ما علينا كلهم وحشين
نتكلم بقي في اللي أنا باقترحه علي حضرتك كرجل لما ترجع البيت انهاردة – انت في البيت؟ كويس .. سيب التدوينة دي دلوقتي وادخل علي الحاجة في المطبخ واسألها: ماما .. انتي ايه رأيك في موضوع ان المرأة المصرية مضطهدة؟ تفتكري في نساء بيتعرضوا للقهر في مصر يا ماما وان عددهم كبير لدرجة تخضني انا كراجل؟
أو بص .. سيب التدوينة دي وروح لأم العيال وهي بتحمي الواد حمادة واسألها من علي باب الكابينيه: بقولك ايه يا روحي.. تفتكري المرأة عندنا عموما يعني بتتعرض للظلم؟ أوضحلك أكتر يا حياتي .. يعني مثلا انتي أخوكي كان بيظلمك في البيت؟ طيب حد ضغط عليكي أوي انك تسيبي ابن خالتك عشان تتجوزيني؟ طيب تفتكري البنات بيتبهدلوا في المواصلات؟ هوه البنات اللي بتشتغل ممكن تتعرض لمضايقات وتحرشات وسخة؟
لو مش متجوز اسأل البت اللي بتقعد معاها علي سور الجنينة في شارع الجامعة: بقولك ايه سعاد انت ايه وجهة نظرك في وضع المرأة المصرية مقارنة بالرجل؟ سعاد هوه أبوكي لما مات أخوكي إدالك نصيبك في الميراث ولا أصر علي فكرة ان جوزك هينفضك؟ سعاد هوه انتي بتحبيني عشان بتعوضي النقص اللي عندك وبتخففي عن نفسك عشان عويس جوزك بيضربك بالمكواة؟
لو انت مش متجوز ومش بتعلق بنات عشان مستحرم الموضوع ممكن تسأل سهير زميلتك في المكتب: سهير ... هو الواد وائل ابنك لسه بيقل أدبه عليكي ويسب الدين لأخته الكبيرة؟ صحيح يا سهير انت عملتي ايه في البلاغ اللي قدمتيه ضد الواد بعرور اللي في شارعكم اللي اتحرش بيكي الأسبوع الي فات؟
لو مش بتشتغل ومش متجوز وأمك ماتت ومالكش اخوات بنات ومالكش في السرمحة مع المزز ... يعني من الآخر كده ماتعرفش توصل للمعلومة عن طريق خبرتك اليومية يبقي أعتقد انك المفروض تجرب تسمع ليلي علي المدونات. أما بقي لو اخترت تقفل ودانك بالشمع قدام كلام ليلي كمان يبقي انا مفيش عندي حل تاني. ياللا نجرب نسأل ليلي اللي في البيت وسيبك من ليلي اللي علي المدونات ... علي الأقل خالص عشان نحس اننا بنسمع واحدة نعرفها وعايشين معاها وكمان من لحمنا ودمنا.
17:40 Posted in Egyptian Society | Permalink | Comments (13) | Email this | Tags: Woman, Liberty
Comments
وأن إبيتاف بتكره الراجل لأنه راجل
هههههههه و عرفتها منين دي
kidding loool
انا عن نفسي شالت ماما و جارتنا و صحبتي المخطوبة و الخياطة بتاعتي ووووو
وعرفت ان كلنا ليلي
:)))
ينصر دينك يا عمنا
فرحتني و الله
احسن الناس فاكرين انها شوية بنات معقدة و حالات فردية
(زي ما الحكومة بتقول ع الارهاب كدة
يعني عملوا من يوم ليلي..حملة قومية
سبحان الله في طبعك يا حسين
ههههههه
المهم بقي
انت يا عمنا كلامك جااااااااااامد جدا وقلت اللي عمالة اقوله في ختام يوم ليلي
و كلنا عايزيين نوصله
انا احييييييييييييك بشدة
و كلنا مختار العزيزي
:))))
Posted by: epitaph | 12 September 2006
وايد كلام ابي.. واطالب بجمعية "كلنا مختار" لمساندة "كلنا ليلى
حقيقى... نفسى اعرف ليه ماحدش قادر يفهم ان فى مفاهيم غلط.. دا كفاية بس علينا المواصلات والرد الجاهز "اقعدوا فى بيتكم احسن"
وكفاية برضو الشغل برة و جوة
وكفاية وكفاية و كفاية
ح قول ايه بس... ربنا يكتر من امثالك
ويلهمك كمان و كمان
Posted by: لستُ أدرى | 12 September 2006
تمام و الله ..لو كل واحد وقف دقيقة و سأل أي ست في حياته عن مشاكلها ..انشالله مرات عمو محمد البواب ..ماكناش نضطر نعمل حمله و نشرح اللي بيحصلنا
أحييك على سعة صدرك و تفهمك لليلى
Posted by: سوسة المفروسة | 12 September 2006
انا مع لست ادرى
ربنا يكتر من امثالك كمان و كمان
بس على فكرة طلع الجرح جامد لمجرد بس اكلمنا وفتحنا بقنا كل هجم علينا
Posted by: zeinobia | 13 September 2006
انت عارف يا مختار كل الرجاله دلوقتي هيقولو انه عامل حزب مسائي وواقف في صفهم وكل اللي بيردو عنده دلوقتي بنات
بس انا بقلك طظ فيهم تسلم ايدك يا مختار قول واثبتلهم واثبت لليلي نفسها ان حسين موجود وبيشجعها وهيفضل يشجعها علي طول
استمر يابني استمر الله يفتح عليك
Posted by: shaimaa | 13 September 2006
إبيتاف: مش حالات فردية بالقطع ولو حالات فردية أنا ماكنتش كتبت التدوينة دي بالذات. أنا عايز أوصل الفكرة عن طريق قيام الرجل بسؤال ليلي القريبة منه حتي يخرج بالنتيجة الحقيقية كما تقولها ليلي الحقيقية وليست ليلي البلوجر وليس القصد أني أسخر هنا من المعارضين. وأعتقد أن كلامي هنا كان سهل جدا وفكرته بسيطة خالص.. اسأل ليلي اللي في البيت. تحياتي إليك دائما وركزي في اخر سنة وربنا يوفقك دايما
-----
لست أدري: من اكثر ما يثير غضبي في الموضوع التعليقات التي أسمعها من الدكورة اللي في الأتوبيسات. الدكر فيهم بدل ما يحافظ علي أخته اللي واقفة جنبه تلاقي يسمعها كلام زي السم. دكر بقي. أصل هوه متخيل ان كل بنت وست خرجت للمواصلات يبقي خارجة رفاهية يعني مش مثلا بتتعلم أو بتسعي علي رزقها أو رزق عيالها عشان النطع جوزها بيصرف علي مزاجه دخان وفياجرا. بلا قرف
-----
سوسة: أنا اقترحت كده لأن في مدونين اعتبروا ان الموضوع هو مجرد شطحة ندوينية للنسوان وليس لها رصيد في أرض الواقع. أنا بقي ماقلتش ان له رصيد كبير وضخم أنا بس باقترح ان كل واحد يروح يدور في بيته يا تري هيلاقي ليلي ولا أم السعد
----
زنوبيا: الكم والكيف الذي خرجت به ليلي في يومها يشكل جرس مزعج علي أقل تقدير. وحري بالرجال جميعهم أن يتحلوا بفضيلة الإنصات ولو من باب طلب الراحة لأفواههم
-----
شيماء: أنا مفيش عندي مشكلة خالص اني اتشتم أو يساء فهمي أو أتعرض لهجوم علي النت بأي لغة كانت. واللي عايز يقول حزب نسائي يقول ، أنا باختصار بدافع عن حق أي حد طالما أنا مقتنع لكن اللي عايز يحصر توجهاته في أنها نسائية أو اخوانجية أو اسلاموية هو حر . أنا باتحكم في دماغي وبس.
شكرا للجميع ولا تتوقفن عن التعبير عن أنفسكن وعن الحوار مع الآخرين
Posted by: Mukhtar | 13 September 2006
مختار عدي عليا..آخر مرة السنادي..معلش :)
Posted by: Yahya_Ayash | 13 September 2006
شرفونا في
www.negma.blogspot.com
Posted by: posycat | 13 September 2006
" الدكتورا روزا تنتهج أجندة نسوية شديدة التطرف وأنها بتقبض فلوس من المفكرة النسوية بيتي فريدن – ألف رحمة ونور تنزل عليها، "
هههههههههههههههههههههههههههه
حلوة يا مختار
كلامك صادق يا مختار , و أجمل ما فيه انك لم تدافع و عن أحد
فقط قلت : اسمعوا
مودتي
Posted by: bluerose | 13 September 2006
والله اللى زيك بس يا مختار هو اللى مخلى فى البنى آدم نفس انه يكمل
ربنا يديك و يزيدك هدى ونور بصيرتك كمان يا رب
ويارب حد يفهم بقى عشان بجد تعابولى اعصابى
!!!!
(هو انا قلبتها شحاتة ان حد يقول كلمة حق ولا ايه؟)
Posted by: لستُ أدرى | 13 September 2006
الدكتورة: اعترفي يا دكتورة المرحومة بيتي فريدن وصيتها ليكي كانت ايه قبل ما تشهق الشهقة الأخيرة؟؟ هههه بالتأكيد كل واحد بيتكلم من واقع خبرته وأنا مش باتكلم عن حاجات باسمعها ولكن عن حاجات باشوفها. وفي النهاية الأفضل أنكم تشجعوا المعارضين انهم يبحثوا في الواقع. أشكرك يا دكتورة
-----
لست أدري: ملكيش دعوة بعدد الذكور اللي بيؤيدوا كلامكم ولو مفيش حد خالص بيوافقكم ده مش معناه انك تصابي بالاحباط أو يكون سبب انك تشكي في جدوي الكلام من أساسه. لأ يا بلو ... انتي بتتكلمي عشان انتي مقتنعة وبتتكلمي عشان غيرك يحس ويفهم اللي انتو عايشينه وسواء عدد المؤيدين عشرين ألف أو صفر فالمفروض النتيجة تبقي واحدة وهي انكم تكملوا طالما انتوا عايزين.
تحياتي وأتمني أن تواصلن ما بدأتم وأن تحافظوا علي مساحة العقلانية والنزاهة في كلامكم كما تعودنا منكم جميعا
Posted by: Mukhtar | 13 September 2006
انا طبعا موافق جدا على فكرتك يا مختار ان كل واحد يسأل اللى حواليه
وياريت ناخد الموضوع بجد مش مجرد تحدي كلا مي لاثبات ضعف الاخر في اثبات وجهة نظرة
وانا متأكد ان لو كل واحد سأل فعلا اللى حواليه هيشوف ابعاد مختلفة واراء مختلفة
وهنوصل في الاخر ان في مشاكل كتير مطلوب حلها
وهنوصل كمان ان لا كلكم ليلى ولا كلنا مرسي
بصوا مثلا لمسلسل سارة اللى بيتعرض على قناة فضائية سدقوني مش فاكر هي ايه
هتلاقوا شخصيات نسائية ورجالية كتيير جدا
هتلاقي سارة ، ام سارة ، مرات اخو سارة ، خطيبة الدكتور اللي بيعالج سارة ، الست اللى حبست سارة ، بنت الست اللى حبست سارة
وهتلاقي كمان
حسن الدكتور المعالج ، اخو سارة ، ابو حسن ، صاحب المستشفى ، جوز الست اللى حبست سارة ، ابن الست اللى حبست سارة
مش كلكم ليلى ولا كلنا مرسي
يا ريت تركزوا على مشاكلكم وعلى حلولها وبلاش يبقى كل تركيزكم على الدعاية للمشكة
Posted by: مهندس مسلم | 14 September 2006
أيضا نريد حلولا وليس شكوى فقط، ماهو الحل خطوة خطوة؟
Posted by: بنت البلد | 15 September 2006