« المطففين | HomePage | جلسة حزب الوسط_6 يناير »
24 December 2006
دين أمه ودين أمك
بدأ يومي باستعداد لشتم سواق ميكروباص يمارس كافة أنواع الغلاسة والاستظراف علي سائق الميكروباص الذي استقله، ويمنعه من ركوب السيارة والمضي بالركاب لقضاء مصالحهم. أكظم غيظي واستغفر الله عدة مرات. يطول الاستظراف وينفعل الراكب بجواري ويصيح في ذلك السائق قائلا: يا جدع انت بلاش رخامة بقي عايزين نشوف مصالحنا؛ أمال دقن إيه وزبيبة صلاة إيه؟؟ ينتهي الموقف السخيف بعد تعطيل دام لأكثر من خمس دقائق سببها هذا السائق ثقيل الدم أبو لحية. بالتأكيد ليس للحيته دخل في رخامته لكن لحيته سيكون لها دخل إذا ما اتصل الموضوع بالأمر بالمعروف والنهي عن المنكر، كأن ينكر علي البهائيين حقهم في بطاقة شخصية أو يصمم علي أن تقصير الثوب أحد أهم علامات التقوي والورع والتمسك بالسنة المطهرّة. لكن ليس في "دينه" ما يدعو إلي احترام اثني عشر راكبا تم تعطيل مصالحهم حتي ينتهي سيادته من وصلة الاستظراف علي سائق الميكروباص الذي أستقله.
---------
وبسبب انشغالي أمس بالذهاب الي الطبيب مع زوجتي ثم العودة مسرعا لتوديع قريب لي ذاهب الي الحج فلم أجد وقتا للدخول الي المدونات. غير أن صباحي كان سيئا إذ تصفحت آخر الردود التي وصلت أمس إلي مدونتي لأجد نفسي وقد تحولت إلي الدين البهائي دون علمي. فقررت – وقد كنت ساذجا في ذلك – أن أذهب الي مدونة بن عبد العزيز حتي أٌقرأ آخر موضوعاته حتي أصل الي حالة من التوازن النفسي وحتي أجد السلوي والعزاء في القراءة لشريف وهو الذي تم تكفيره ولصقه بالبهائية هو ونورا من قبل أمام مجلس الدولة. غير أن شريف كتب عن حواره في المصري اليوم فأيقنت أنني كافر مثل شريف ونورا ولكن أكثر الناس لا يعلمون.
---------
ليس هناك من حل إلا إصلاح التعليم والإعلام (الأسرة فقدت مركزيتها بالفعل فلن أتحدث عن التربية الأسرية علي الرغم من أهميتها)، وساعتها سأسعد بالعيش وسط الكفار أو المؤمنين - أو الهوينيم.
10:15 Posted in Egyptian Society | Permalink | Comments (18) | Trackbacks (0) | Email this | Tags: Religion, Egyptians
Trackbacks
The URL to Trackback this post is: http://unbrainwasher.blogspirit.com/trackback/1134949
Comments
العزيز مختار
بجد فعلا انا تعبت ليك
مش كل شوية يا مختار تاخد صفة جديدة
شوية من كفاية
وشوية بهائى كافر
اختار مواضيع بقى تانية تغير فيها الصفات دى
يا اما ترسى على ديانة وتمسك فيها
وابعد عن الفن علشان ما تبقاش فنان متنكر
وابعد عن السياسة علشان متبقاش من حزب الشفافية
وابعد عن الادب علشان ثبت ان فكرك من نوعية العلمانى الليبرالى الرجعى السلفى
ابعد بقى عن اى حاجة علمية علشان انا بقى اللى هنتقدك فى المواضيع العلمية
اخيرا واضح اننا عمرنا ما هنتعلم فصل الموضوع عن صاحبه للمرة العشرة الاف
فكلما كتبت فى شىء لن تسلم شخصيتك من اتهام
هو انت عايزة بطاقتك يتكتب فيها ايه ؟ اعرف حد فى الداخليه يظبطهالك
يا بهائى با متنكر :)
كل سنة وانت طيب تانى بمناسبة عيد الاضحى بتاع المسلمين ملكش دعوة بيه
والكريسماس برده ملكش دعوة بيه
وسنة جديدة من السنين الميلادية
و7 يناير لما يجى برده ملكش دعوة
بس اهو الواحد احتياطى بيقولك على كل المناسبات
تحياتى يا مختار
Posted by: tota24 | 24 December 2006
عزيزتي توتا:
:)))
تعليقك رسم ابتسامة حقيقية علي وجهي بجد.
كل عيد وانتي طيبة وربنا يتقبل
الحقيقة أنا حصرت التهم كلها وتبين أنني: متأسلم أنتمي الي الطبقة الوسطي بكل أمراضها، وثورجي وبتاع نضال واترميت في حضن كفاية، فاعتنقت البهائية كابرا عن كابر.
توتا ... تفتكري يستحسن أكتب تعريف بنفسي في المدونة هنا؟ باتكلم بجد. يعني أعمل صفحة أكتب عن انتماءاتي وتوجهاتي عشان الناس ماتتعبش نفسها وتتعبني وتتعبك انت كمان. بس باردو ممكن حد يقولك لأ دا أكيد متخفي والكلام ده مش حقيقي
أنا بجد انهاردة أول مرة أحس أني تعبت من مسألة التصنيف دي
أِشكرك وابقي عرفيني انتي تصنيفك إيه... يعني مسلمة ولاّ زملكاوية ؟
Posted by: Mukhtar | 24 December 2006
لعله الوقت المناسب لتعلم الشخير و سب الدين عشان تعرف تعيش!
Posted by: شريف نجيب | 24 December 2006
انت تقدم بيان عليه ورقة دمغة و امضاء اتنين من راكبي الميكروباص اياه
و تنشره علي صفحات الجرائد المعارضة
و تقدم اعتراف رسمي انك اهلاوي
وساعتها كل المشاكل ح تتحل
اه و بهذه المناسبة بقي
و زي ما توتا هنيتك بكل الاعياد
هي نسيت انك بتحتفل بالهالوين بس
:)
P.s.كل سنة و انت طيب بقي و عيد سعيد ان شاء الله و السنة الجاية نكون احنا اللي بنودعك في المطار للحج ان شاء الله :))) قول انشالله
Posted by: epitaph | 24 December 2006
لأ الشخير حرام يا شريف :)) طالما كنت تستطيع أن تقوم بعملية نزع اللحمية عند دكتور متخصص في الأنف والأذن والمشخرة. أما إذا لم تستطع فلا جناح عليك بشرط ألا تزيد عدد شخراتك عن خمس شخرات في الخناقة الواحدة مشفوعة بثلاث أحاّت جيزاوية أصيلة من أبعد نقطة في أحبالك الصوتية
شريف شوف لي حل في موضوع التصنيف ده عشان أنا شايل اللحمية بقالي كتير
Posted by: Mukhtar | 24 December 2006
هما مخدوش بالهم باين من العنوان اليشوفة الاعمي فى بداية مدونتك
أنا مش متأسلم ولا ثورجي ولا بتاع نضال ومش بهائي ولا اترميت في حضن كفاية - جاتكو القرف
على العموم قضية التصنيف دي قضية شائعه
حتي المتنورين اسم الله عليهم لما تقولهم الاسلام مش هو الوهابيين ولا السلفيين يباه انت متشدد اهه وبتشكر فى الاسلام وعنصري ووو
ولو اتكلمت فى اى شئ حتى لو مش فارق معاك اليكون جنس ملته اية يباه انت بتشجع على الفجور
وحتي لو قولتلهم براحتكم اعبدوا ان شاء الله الموبيلات تباه انت ساخر متحزلق
على فكرة المفروض فى المستقبل كل اليعلق يترك اسمة ودينة ومذهبة واتجاهه بعد سماع الصفارة
Posted by: الزعيمة | 24 December 2006
إبيتاف: أنا تعبت بجد... طيب قوليلي، هو انتي لما بتقولي رأيك مثلا في محاضرة الدراما ان هاملت مش متررد ولا حاجة وأنه بيحاول يوصل ليقين أن عمه هو اللي قتل أبوه - لما بتقولي كده في حد بيقول مثلا انك متحذلقة أو كافرة أو مشتركة مع فودافون مش مونبيل؟؟ ولا ده بيحصل معايا أنا بس؟
وبعدين تعالي هنا، مش لما تدعيلي اني أحج يبقي توضحي أحج فين... يعني تقولي يارب تحج في السعودية عند الكعبة ... مش تسيبيها عايمة كده يقوم اللي مايتسموش يفتكروني هاحج في حيفا ولا كنيسة القيامة
----------------
الزعيمة: لأ ، أصل أنا حطيت الاعلان علي مدونتي يدوب انهاردة الصبح وفي انتظار باقي التصنيفات حتي أضعها تباعا بس الخوف بقي ان المساحة متكفيش بقية الاتهامات التصنيفية.
وأشجع اقتراحك بتاع الصفارة لأنه هيريح بتوع شرطة المصنفات التدوينية - ومش هيتبقي قدامهم غير الجواسيس بس اللي بيتخفوا وراء الاسلام لكنهم كفرة مارقين ماسونيين :))
Posted by: Mukhtar | 24 December 2006
عزيزي مختار
التصنيف مهم جدا علشان نعرف انت معانا و لا مع الناس التانين
علي فكره
احنا الناس التانين
Posted by: Alex | 24 December 2006
حوار يهلك مالضوحك
ههههههههههههههههههههههههههههههههههههههههههه
والله انا تعبت لك بجد..أومال لو انا كنت اتكلمت كان حصل فيا إيه هههههه
مختار..هو ده (إرهاب فكري) ؟..المفروض يعني الواحد يعيد النظر؟
الحقيقة أعدت النظر، بس اكتشفت انه مسموش ارهاب فكري ولا حاجة، اسمه عبط مركب..
لسه برضو مفيش حاجة اسمها إرهاب فكري:)))
المهم..
كنت عايز أقول لك إيه؟
قول معايا..
آه..
كل سنة وانت طيب بمناسبة عيد الأضحى يا متأسلم..
ورأس السنة الهجرية يا متأسلم..
ومولد النبي برضو يا متأسلم..
وعيد الفكر كمان يا متأسلم..
والكريسمس يا متمسيح..
ورأس السنة الميلادية يا متمسيح..
ويوم 23 يا متكثلك..
ويوم 7 يا متأرثذكس "أركبها ازاي دي؟"
ويوم كيبور يا متهود..
وعيد الفصح يا متهود..
وعيد الهالوين يا متأمرك..
والثانكس جيفينج يا متأمرك برضو..
وشم النسيم يا متفرعن..
إلا بما إنك بقيت بهائي كبير ياترى تقدر تقول لنا حماس دي تبعكوا ولا إيه؟
يعني باعتبارها كانت بتحتفل بالذكرى الـ19 لانطلاقها..وانتوا بتقولوا انه رقم 19 ده سره باتع..
وبعدين عددكوا 2000 والمدونين كمان عددهم 2000..مش ملاحظ كده انه النتيجة المنطقية لكل المؤشرات دي، اننا نتوصل لأنه الصنف التمام بيكيف برضو؟
طب والنبي، وحق الباب بهاء..والباب العالي..وشيكا عالعالي..اوزنلي تمن ولفهولي عشان اعدل الطاسة..
أنا مبشتمش...
Posted by: ارحم دماغك! | 25 December 2006
سيدي الكريم
مدونة رفيق القلم تعتذر لك عن لبس حصل اثناء استدعاء يعض المدونين البهائيين للحوار و منه نعتذر لك أخي الكريم عن هذا الخطأ راجعين قبول هذا الاعتذار و عدم جعله شماعة تعلق عليها سلسلة السب و الشتم التي تصلك.
و الحقيقة أنه المدونة الخاصة بي ارتكبت خطئين فادحين في أقل من اسبوع هما اولا الحديث عن البهائية و ثانيا التعليق المرسل خطئا إلى مدونتك و إني من هذا المنبر لأدعوك إلى الإطلاع على المقال المتواجد بهذه المدونة و التركيز على التعليقات لأن بها رسالة موجة إلى شخصك الكريم و ذلك قبل يومه الخميس قبل حذف المدونة من على نطاق النت.
و تقبل اعتذاري سيدي الكريم
http://sinox.jeeran.com
Posted by: رفيق القلم | 25 December 2006
رفيق القلم
قمت بزيارة مدونتك الآن ووجدت بعض الأسئلة المعلقة دون إجابة وحاولت جهدي في الإجابة عنها. أرجو استمرار الحوار لأهميته. مع شكري
Posted by: حسام | 25 December 2006
رفيق القلم: شكرا علي تقديم الاعتذار وبالتأكيد أقبله.
لم أشتمك إطلاقا في هذه التدوينة أو غيرها
أشكرك علي اهتمامك
Posted by: Mukhtar | 25 December 2006
مختار يا أخي الاعتذار فضيلة و أنا لست عصبيا كما وصفني البعض أو غير هدا الحكاية بدأت بسؤال و انتهت بمقال و هكذا تطورت الأحداث.
شكرا لقبول هذا الأعتذار و أتمنى عليك أن توصل اعتذاري للسيدة رندا و متمنياتي لها و لك بعيد أضحى سعيد لك أنت كمسلم و لها كأساس حوار معتقدات و أديان و حضارات.
طبعا سأعود لأعلق على مقالات هذه المدونة لأنها تستفزني في أن أقرأ كل ما بها و أن أجوب و أجوب سيكون لي الوقت الكافي لذلك ريثما أقوم بنسخ محتويات مدونتي إلى الحاسوب الشخصي قبل حذف المدونة يومه الخميس.
أجدد سلامي لك و للبهائية رندا و سلامي للجميع و لنورا و على تعليقها الجميل المودع بالمدونة و أيضا لحسام أستسمح أخي على التطفل على عالم مدونتك الشخصية و أعدك أنها لن تتكر مرة أخرى لأني كالخفافيش أحب أن أعيش في الظلام و الصمت بدلا من أن يلمح لي بالاتهامات بين سطور المقالات
مع محبتي يس
Posted by: رفيق القلم | 25 December 2006
مختار
متقلقش انا رحت مخصوص مدونة رفيق القلم وشلت عنك التهمة خالص :)))
انت براءة يا سعادة البيه
انا بقة اللي لسة لازقة في
مش عارف اشيلها بايه
فيه مزيل اديان الله يكرمكم ؟ ويا تري بيتباع مرهم واللا اعمل عملية جراحية ؟
قبل ما اجي مصر علطول
مدير الشركة بتاعتي قاللي بما انك مسلم وبتدافع عن حقوق العمال وعندنا 50 في المائة مسلمين في المطار هنا ياريت تساعدنا في فهم خصوصيات المسلمين عشان نعرف نخلق جو يحترم دينهم وفي نفس الوقت نقدر نشغل المكان بدون اضطراب عشان مواقيت الصلاة
المدير مسيحي ايطالي
ومساعدته يهودية
وانا كنت المسلم الوحيد في ادارة اتحاد العمال اللي بيتكلم عن حقوق العمال كلهم ساعتها
خضت اكثر من معركة في البداية مع الادارة لاسباب اخري ومنها ظلمهم لبعض الاقليات بشكل عام في الترقية مثل السود والروس وبعض الصوماليين
ثم مع الوقت حدث تفاهم واحرزت بفضل الله نوع من الحوار وبدا تفاهم واحترام متبادل
حتي كان من المدير ان جعلني اداه لفهم الاقليات وخاصة المسلمين ومساعدته علي الوصول الي معادلة تسمح باحترام خصوصياتهم وفي نفس الوقت يتم احترام العمل وقوانينه
شوف يا سيدي
سبحان الله
في بلاد العم سام يمكن ان تاخد حقك ولو بعد حين
وفي بلاد اتباع محمد عليه الصلاة والسلام لا حق لك ولا يحزنون
ولما اكون مسلم في بلدي مصر ادافع عن حق عبيط من حقوق الاقليات يتم اتهامي في عقيدتي
اقول ايه بس ؟
مش بس من رفيق القلم
بل من عشرات اخرين
بصوا ياجماعة
كان من كلام ابن تيمية حاجة حكمة جميلة قوي
دولة الكفر تبقي بالعدل الف ساعة
ودولة الايمان لا تبقي بالظلم ساعة
او حاجة بالمعني ده
االشاهد انك عندما تعطي لصاحب حق حقه
تذكر انك تصنع ما تصنع لوجه الله
وبالتالي
الصبر علي اذي الناس هو ضريبة ذلك
سواء في حالة مسلم يدافع عن مسلم
او مسلم يدافع عن غير مسلم
هي في النهاية انسان يدافع عن حق انسان
Posted by: ابن عبد العزيز | 27 December 2006
رفيق القلم: بارك الله في أخلاقك. كل عام وأنت بخير وتقبل الله منا ومنكم.
المدونة ترحب بك ويمكنك التعليق علي أي موضوع كما تشاء بالطريقة التي تحبها. وإذا كان لا بد من التصنيف فأنا أعتبر نفسي مسلم أصولي (وليس سلفي) ومعجب عموما بالحضارة الغربية وبالتأكيد لازالت توجهاتي في مرحلة الاكتشاف والتركيب لأن المجهول أكبر بكثير من المعروف.
Posted by: Mukhtar | 27 December 2006
بن عبد العزيز: لازم تدفع الضريبة علي قد حماسك لأي قضية. أصلك ماتعرفش انت كنت مستفز قد إيه يوم مجلس الدولة. في ناس كتير ممكن تفهم موقف اليساريين والحقوقيين أو حتي يقولوا انها مؤامرة. إنما معاك انت مش هينفع غير حاجتين: يا إما واحد يكون عنده مخ فهيضطر يفكر في الأرضية اللي أنت بتستند عليها يعني تشغيل مخ وأسئلة واعادة تفكيك وتركيب؛ يا إما حد معندوش مخ – ودول كتير – فهيشتمك ويلعنك. مدونتك مش متميزة من فراغ.
أنا بجد زعلان جدا من موقف جريدة المصري اليوم مع نورا ومعاك وده موقف لم أتوقعه. لكن أرجع وأقول باردوا أن الخط اللي أنت عملته لنفسك لازم هيخلي ناس تحترمك جدا جدا وناس تانية هتتسرع في الحكم عليك بدون رؤية شاملة لتدويناتك كلها وبالتالي رأيهم تنقصه بيانات ومعلومات كثيرة.
أتمني أن أستفيد من خبرتك لأن شغلك في مجال الحقوق في أمريكا يستحق النظر بعمق فعلا.
بالنسبة لمزيل الأديان هو موجود ورخيص وفعلا محتاج عملية جراحية، بس مش لحضرتك إنما للناس اللي معترضين عليك بدون وجود حجج قوية تدعم موقفهم. :))
Posted by: Mukhtar | 27 December 2006
To Mukhtar and Ibn Abdel-Aziz:
People are not used to the idea of supporting others in their rights especially if you say that you do not believe in their identified belief. It is very interesting that we like it when people of other religions "mostly Christians in the US", support our rights "as muslims" based on religious freedom but in the same breath we are the first to deny others that freedom on the premise that their religion is a "false" one!
As for the hardship you and Ibn AbdelAziz are facing i remind you of this ayah:
أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ (2)
سورة العنكبوت
Ibrahim
Posted by: mihsri | 27 December 2006
دكتور ابراهيم: جميل استشهادك بالآية الكريمة. سورة العنكبوت من أحب السور الي قلبي وكثيرا ما أكرر قراءتها والاستماع اليها وكتبت خواطري حولها وربما أنشرها هنا لاحقا.
كل عام وأنت بخير انشاءالله
Posted by: Mukhtar | 28 December 2006