27 March 2007
ربيـــع الغضب
اقترحت عليّ زوجتي – بمناسبة شهر ربيع الأول وفصل الربيع - أن أكتب تدوينة علي غرار عنوان كتاب هيكل خريف الغضب.
-----------------
يا ... يا حج ويا مقدس، إيه اللي دخّل الدين في السياسة دلوقتي؟ مش تشوفوا حتة ناشفة تقعدوا فيها أحسن بعيد عن الطرطرة دي. وعلي رأي ليلي علوي في فيلم بحب السيما: بلاش تطرطشوا في كل الحمام، لازم تنشنوا جوه الحفرة عشان ريحة حمامات الولاد بقت وحشة جدا.
-------------
علي شريط الأخبار في التلفزيون المصري قرأت يوم الأحد ليلا: أبو الغيط يقول أن التعديلات الدستورية تحافظ علي استقرار المنطقة.
أحـــــــــــــه .. ما تتكلم علي قدك بدين أمك. منطقة إيه ياعم الزير!! يعني مادة الإرهاب في الدستور هتوفق راسين في الحلال في نهر دجلة والفرات؟ ولا تكونش المادة دي هتدوب الجليد اللي بين اسرائيل وفلسطين؟ ولا يمكن هتقضي علي تنظيم القاعدة وسلاح البحرية الأمريكية؟
فقالت أم سيف: لأ ماهو نظرية المؤامرة هنا يبقي لها معني كبير، التعديلات الدستورية المصرية من شأنها إبعاد كل قوي المعارضة والاخوان الارهابيين وبكده يبقي الاستقرار جاي للمنطقة كلها.
------------------
نبيل لوقا بباوي طلع بصوته في قناة اسمها الحوار يوم السبت اللي فات واستنكر الجدل القائم حول المادة 179 فقال – اللهم فض فيه: أنا مش فاهم إيه لزمة الكلام ده كله، لما تبقي المادة في الدستور يتوافق عليها إبقوا اعترضوا لكن هتعترضوا ولسة الاستفتاء ماتعملش!!!!!
يا حج نبيل، ماهو لازم الجدل يدور قبل اقرار المادة لأن بعد اقرارها اللي هيجادل هتنطبق عليه المادة.
--------------------------
تلفزيون الحزب الوثني الديمقراطي ماكنش هاين عليه يجيب أي رأي معارض في البرنامج الذي استمر لمدة أسبوع وأربعة وعشرين ساعة يوميا. البرنامج بتاع عبداللطيف المناوي اسمه حوار الدستور. حوار؟؟؟ هو لما الواحد يقف قدام المراية يكلم نفسه يبقي حوار؟ أمال الجنان يبقي إيه؟
البرنامج ده بيفكرني ببرنامج الفكر الجديد بتاع سي سمعة اللي اسمه حالـــة حـــوار.
------------------------------
قال المذيع لمواطن في بني سويف يشارك في مظاهرة لدعم التعديلات الدستورية: إنت مش معترض علي أي مادة؟
المواطن: لأ
المذيع: طيب إيه هي المادة 179؟
المواطن: (يتنّح وينتظر اللي جنبه يغششه) لأ معرفش
المذيع: إيه هي المادة 88؟
المواطن: معرفش (بنفس التتنيحة بتاعة الاجابة الأولي)
المذيع: طيب إزاي هتصوت علي حاجة انت متعرفهاش؟
المواطن: (بتلقائية) أنا مع الشعب
--------------------------------------
وزير الإعلام بتاع الحزب الوثني الديمقراطي قال في البيان الصحفي: الجماعة المحظورة كانت بتوزع منشورات غرضها تمنع الناس من الادلاء بصوتها وتخويفهم واحنا متعاملناش معهم غير بالأساليب السلمية.
احنا؟ إنتو مين؟
وبعدين إيه كلمة منشورات دي؟ إنت ليك حد قريبك في أمن الدولة؟
وهو محمد ابو العينين مش معلق منشورات باردو من أول عزبة البكباشي لحد ميدان الجيزة بتدفع المواطن أن يقول نعــــــــــم من أجل العدالة الاجتماعية والتنمية الاقتصادية الموجودة في الدستور؟
-------------------------------------
قناة المنيّل للأخبار كانت بتذيع في فاصل لقطات أرشيفية عن حوادث ارهابية زي حادثة الأقصر وحادثة شرم وحوادث بداية التسعينيات وصوت المعلق يحذرنا من الارهاب الذي سيدمر الاصلاحات المباركية، وفي وسط اللقطات جزء مقتطع من كلمة الريس في أسيوط عن الارهاب وأمن وأمان مصر الذي هو خط أحمر – بصراحة مفيش أحمر من كده – ولهذا سنلغي الطوارئ وندستر قانون الارهاب، يا إما الإرهاب هيجي يفشخنا. هه؟ نتفشخ من ارهاب أمن الدولة ولا من الارهاب بالألف واللام؟ عموما الدولة شالت عننا مشقة الاختيار والتفكير.
10:35 Posted in Politics | Permalink | Comments (5) | Email this | Tags: Egypt, Constitution tailored
Comments
رجاء لا تفقد اعصابك فتفوه بما لا يليق
Posted by: mgm241272@hotmail.com | 27 March 2007
أصل دي كانت أخر تدوينة قبل اعلان نتيجة الفتاء علي التعديلات. بعد كده الأدب هيبقي طبيعي
Posted by: Mukhtar | 27 March 2007
احه يا مختار ، تفوه لا فض فوك يا أخي ، دا انا هاصلي صلاة شكر عشان انت تفوهت
و انت مالاقيتش الا بيضناوي تتكلم عليه؟ ده يهوذا الاسخريوطي بعث حيا
Posted by: spring | 27 March 2007
من المشاهد الغريبة أيضاً مشهد لمجموعة من الناس يهتفون : الصحافة فين .. الدستور أهه!
من يعرف العبارة "الأصل" والتي نسمها في مباريات كرة القدم قد يتوقع أن تخرج هذه العبارات من معارضي الدستور..
الظريف أن من تفوه بهذا الهتاف هم من مؤيدي تعديل الدستور الذين حشدهم الحزب البيروقراطي!
Posted by: قلم جاف | 28 March 2007
قلم جاف:
الهتاف كده خرج بره خلفيته المعروفة تماما، تفتكر ده نوع من التفكيك الشعبوي للموروث الثقافي السياسي؟ :))
بس بجد غريب جدا السلوك ده
Posted by: Mukhtar | 29 March 2007
Post a comment