« بيضة واتقسمت نصين | HomePage | النشوء والارتقاء معكوسا »
03 April 2007
تحت الأرض
الدستور الجديد لا يعني – حرفيا – سوي دفع المعارضة الحقيقية نحو سراديب تحت الأرض للتعبير عن رؤاهم وتوجهاتهم سواء جماعات إسلامية أو تنظيمات يسارية وشيوعية، طالما هناك قيود علي تشكيل أحزاب بمرجعية دينية، طالما بقيت لجنة الأحزاب المكونة من أعضاء من الحزب الحاكم لتعطي الضوء الأخضر للمعارضة كي تعارض.
---------------------
الدستور الجديد ينص في المادة الخامسة
وللمواطنين حق تكوين الأحزاب السياسية, وفقا للقانون, ولا تجوز مباشرة أي نشاط سياسي أو قيام أحزاب سياسية علي أي مرجعية أو أساس ديني, أو بناء علي التفرقة بسبب الجنس أو الأصل.
أعتقد أنه تجدر الإشارة إلي أن هذه المادة الجديدة لا تقضي علي حق الاخوان في تكوين حزب ديني وحسب بل وتقضي أيضا علي حق حزب الوسط في تأسيس حزب علي أساس مرجعية إسلامية. دعك من مادة الدستور أصلا، فتأسيس حزب يتطلب موافقة الحزب الوثني الديمقراطي. تذهب لتقدم له طلبا: والنبي أنا عايز أعارضك، مُنكن، لو مُنكن يعني إذا سمحت تسمحلي أعارضك؟؟
يقوم هو يرد ويقول: لأ مش مُنكن أبدا.
---------------
----------------------
تقدر تقول لظابط المباحث بالفم المليان: فين إذن التفتيش؟ ولو بهدلك، تقدر ترفع قضية وتمشي في طريق استعادة حقوقك لكن قلي كده أعمل إيه مع ظابط أمن الدولة لما يجي يرزع الباب ويفتش ويجر أخويا لمكان منعرفهوش؟!! – جزء من حوار بيني وواحد قريبي يوم الأحد لما رحت اسأل علي أخوه اللي اعتقل من أسبوعين.
13:30 Posted in Politics | Permalink | Comments (5) | Email this | Tags: Egypt, Constitution Tailored
Comments
مختار
انا ملاحظة فى الفترة الاخيرة ان نظرتك للحياة غامقة شوية واخدة على اللون الاسود
مش واخد بالك من شوية ايجابيات فى التعديلات الدستورية
بنظرة متفائلة شوية ممكن تشوف الصورة احسن
نقول من الاول ليه من الاساس يكون فى معارضة مش احسن نلعب كلنا مع بعض ومحدش يعارض حد ولا يحط ايده فى بوق الاسد وطول لما مفيش معارضة الحياه بيكون لونها بمبى زى ما انت عارف
مش قال للمواطنين حق تكوين احزاب سياسية الكلام واضح جدا
الناس تكفر بكل دين وملة وتعمل حزب لا مله له ولا دين وكده سهل مش صعب اساسا هتلاقى كتير جدا يشاركوا فى الحزب ده لان الدولة كفرت تلاتة اربع البلد واظن الحزب ده هيكون اغلبية ومحدش هيتعب في جمع افراده
القاون بتاع الارهاب هو شبه بتاع الطوارئ قوى يعنى ده كان بيحصل ايه الجديد بس انت ربنا يكرمك وكبر ابنك ودخله كلية الشرطة حضرتك وساعتها كل اللى خنقك سلط ابنك عليه واخفيه ورى الشمس بس حوش فلوس من دلوقتى علشان رشوة الشرطة بتغلى مع الوقت ومع القوانين الجديدة
لازم تكون نظرتك ايجابية وتحاول تشوف الحياة بلون جديد خالص وليكن فوشيا او فوسفورى
الحياة بعد التعديلات اكثر نضارة والوانها اكثر بريقا
مع تحيات برسيل وكمفورت والحزب الوطنى
هدف واحد لا وطن ولا دين ولا بشر
Posted by: tota | 03 April 2007
توتا: جامدة جدا الحكمة الأخيرة - هدف واحد: لا دين ولا وطن ولا بشر.
توتا، إنتي حكمتي قبل كده في دولة شمولية أو مسكتي منصب مهم في حزب وطني في أي دولة؟ أصل بجد الحكمة دي تنفع شعار جبار
بس حقيقي أنا فعلا نفسيتي تعبانة شوية من بداية التعديلات .
لو علي جثتي سيف مش ممكن يكون ظابط شرطة أبدا
أنا باربيه دلوقتي عشان يبقي رئيس دولة شمولية علطول - دي مستقبلها مضمون أكتر، صدقيني.
Posted by: Mukhtar | 03 April 2007
طيب و موضوع أن الحزب الوثني نفسه قائم على مرجعية دينية، ماذا جدّ فيه؟ [http://shadow.manalaa.net/node/517]
هل فعلا ستعامله الحكومة/الحزب بمبدأ الطناش إلى أن يقضي الله أمرا كان مفعولا و يدخل الناس في الحزب الجديد أفواجا؟ [http://unbrainwasher.blogspirit.com/archive/2007/04/02/2-eggs-between-egypt-s-legs.html]
Posted by: ألِف | 03 April 2007
كلامك مظبوط ، ومثال بسيط ما اعلنه الدكتور محمود امين العالم النهاردة عن وجود احياء تنظيم شيوعي - يقال - انه الدافع الاساسي لمظاهرات واعتصامات العمال المتتابعة من فترة
والاتحادات الموازية في الجامعات لو كانت قبل التعديلات كانت ظاهرة الفترة الجاية بتهيألي كل تكتيكات العمل العلني هتتغير ، بس في الأول لازم يبقى فيه ضحايا للقانون يتشاور عليهم عشان الباقي يكش
ضرب المربوط بقانون الارهاب اللي هيطلع هيخوف السايب ويموته من الرعب لدرجة تصل الى تقبيل ايادي مخبرين الغرز
Posted by: Abd El Rahman | 04 April 2007
المطمئن فى الموضوع ان احنا المصريين كدولة وكشعب واخدين ان يبقى عندنا دستور جامد طحن بس اللى فى القلب فى القلب
مثلا يعنى استفدنا احنا اية من الدستور القديم اللى بيبكوا علية دلوقتى
لا حريات صانها ولا امن حققة للمواطن بعيداعن سلطة اهيف عسكرى فى احقر قسم شرطة
مثلا يعنى
عندنا الدستور القديم بيتكلم عن القطاع العام وانة ركيزة اساسية للاقتصاد الوطنى وكان البيع فية شغال ليل نهار وباسعار مغرية جدا والدفع بعدين وشيلنى واشيلك وصلى على اللى فيك يشفع
منع الدستور حد لامؤاخذة انة يبعتر فى ثروة الناس اللى بنوها بدمهم قبل عرقهم
المشكلة مش فى الدستور المشكلة فى اللى بيحكمهم الدستور
وحتى المعارضة اى حزب او فصيل معارض التزم بنظامة الاساسى باعتبار ان النظام الاساسى لاى حزب هو دستورة الخاص يعنى
نعمان جمعة؟ ولا يمكن احمد الصباحى
كل دى شكليات علشان المنظر والفشخرة
انما اللى فى القلب فى القلب
اما فكرة من تحت الارض دى فمصر من زمان تم القضاء على اى امل فى وجود قوة حقيقية مؤثرة تستطيع القيادة والسيطرة بعيدا عن اعين محابس امن الوطن واعوانة المنتشرين فى كل مكان فى مصر بطريقة تكاد تكون مضحكة جدا
يعنى اسال اى موظف فى اى مصلحة حكومية حتى لو كانت دورة مياة عمومية حتعرف ان فلان مندوب امن وبيكتب تقارير للباشا عن اى حاجة وكل حاجة
واحيانا كتير بيكون الشخص دة متقمص دور المخبر الاهبل اللاشهير ابو بالطو وجرنال مخروم
Posted by: adhm | 04 April 2007