19 November 2007
الطبقة الكادحة والطبقة الكاسحة
ينقسم الشعب في مصر إلي طبقتين: الطبقة الكادحة و الطبقة الكاسحة. قد تتمتع الأولي بنعيم الآخرة فقط، وتستعيض الثانية عن هذا النعيم بنعيم الدنيا والانتقام مسبقا من غريمتها الطبقة الأولي.
------------
ألغت محافظة الجيزة سير التوك توك في شوارعها وقام أصحاب هذه التكاتك بعمل مظاهرة وجاء تقرير عنها في برنامج البيض بيضك أمس حيث استضاف تامر أمين الصحفي صلاح منتصر الذي عاد لتوه من رحلة لبلاد الإنجليز (وهي بلاد متقدمة تكلم عنها البحبحاني والسمانّوهي ولا يوجد فيها توك توك). المهم أن البرنامج ناقش عدة موضوعات مع الصحفي منتصر وكان من بينها التوك توك واستغرق الأمر خمس دقائق تقريبا – يعني أقل من المدة التي يقضيها المواطن المصري العادي في الكَنيف للتبرز بشكل طبيعي دون شعور بإمساك (تقدر المدة تقريبا بحوالي تسع دقائق حسب تقرير التنمية العربية وهي تقل عن المدة التي يقضيها المواطن الأمريكي للقيام بالفعل ذاته).
تخللت المناقشة بعض القفشات والضحكات من عينة: ما هو جمع التوك توك؟ يا تري هل هو تكاتك كما قال تامر؟؟ فرد عليه منتصر بضحكة أرستقراطية: تكاتيكو بُنّي هههه علي رأي زينات صدقي. (أحسست أنني كمواطن مصري عادي سأصاب بإسهال بعد سماع هذه القفشة. يلاحظ أيضا أن بعض المشاهدين قد يصيبهم إمساك مزمن بسبب نفس القفشة. لا تقلق ولا تطلب طبيبا فأيا يكن رد فعل أمعائك الغليظة فالأمر لا يحتاج لأي تدخل طبي أو حتي عقاقير).
حاول تامر أن يلفت نظر منتصر إلي أن الناس الذين يملكون التكاتك يعيشون في مصر وظروفهم صعبة فما هو الحل؟
رد منتصر عليه وقال: طيب ماتخليني أنا أسألك انت شايف إيه؟
فقال تامر: أنا رأيي إن في أوروبا والدول المتقدمة ،هههههه زي عادل إمام، لما بيكون في مشكلة أنهم بيحاولوا يقننوها.
فقال منتصر: المشكلة الأساسية إن التكاتك دي أصلا سمح لها بالسير في الجيزة وبعدين مبقاش في حدود لأن القاهرة الكبري منفّدة علي بعضها، نقننها إزاي يعني؟ هل أقول للتوك توك انت حدودك عند حديقة الحيوان.
فقال تامر: لأ ماهو خلاص احنا عرفنا إن هي حاجة غلط إحنا دلوقتي عايزين نعالج المشكلة عشان الناس دي.
فقال منتصر: بص عشان نكون صرحاء المشكلة لها شق إنساني اللي هو الناس دي وشق مروري اللي هو المرور في القاهرة عشان أكون عملي. يعني هو مين اللي بينضر ماهو أنا وانت فمينفعش دلوقتي أقول مثلا لأ باردو نخلي التاكسيات القديمة ما هو أنا بادفع نفس الأجرة في التاكسي الجديد.
وبعدين التوك توك ده وسيلة نقل متخلفة وخطر علي الناس والدول اللي اخترعته أصلا بتتخلص منه دلوقتي فمينعش مصر انهاردة هي اللي تيجي تستورده.
ثم انتقل الحديث الشيق إلي موضوع آخر أظنه حريق سيتي ستارز.
-----------------------------
هل ما قدمه برنامج البيض بيضك يعتبر تغطية للمشكلة لمجرد أنه أذاع لقطات من تجمهر المتضررين أمام مرور الجيزة واستضافة صحفي يحدثنا عن وسائل النقل المتخلفة ومشكلة المرور في القاهرة والاختناقات التي يسببها التوك توك؟
سألتني زوجتي باستنكار: طيب طالما البيه الصحفي زعلان علي مرور القاهرة اللي مبقتش تستوعب عربيات تاني طيب ما تمنعو الأغنياء يشتروا عربيات؟ أو امنعوا ان الأسرة الواحدة يبقي فيها أربع عربيات؟؟
حاولت أن أتهمها بأنها شيوعية واشتراكية فلم تسكت.
واستكملت حديثها: عايزة أفهم دلوقتي هو اللي بيصدر القرارات دي إيه حمار خالص؟ مفيش تفكير نهائي في حجم المشاكل اللي ممكن تترتب علي قرار الإلغاء والمنع؟ همه مش بني آدمين ولا إيه؟ وبعدين مش واخدين بالهم ان التوك توك غير أنه فعلا بيوفر وسيلة مواصلات عبقرية أنه وضع نهاية للبطالة اللي كان بيعاني منها ناس كتير من اللي شغالين عليه؟؟ يرجعوا لأوقات الفراغ تاني يعني ويخربوا الأرض؟؟
وسألت بدوري: طيب ماشي التوك توك متخلف والدولة هتمنعه يا تري اللي معاه توك توك انهاردة يعمل بيه إيه؟ طبعا مش هيعرف يبيعه لأنه بقي فيل أبيض خلاص وبخ علي كده. وطبعا مش هيعرف يقضي بيه مشاويره الشخصية، طيب يعمل بيه إيه؟
والناس اللي عليها أقساط تعمل إيه؟
ومما كان سببا في غيظي أيضا أن الباشمهندس الصحفي بيتكلم بمعايير التقدم والتخلف زي الأخوة الأعداء بتوع تقارير التنمية فبيقول حضرته أن ده وسيلة نقل متخلفة. طيب إيه هي معايير التقدم والتخلف؟ ومين اللي وضعها؟ وما مدي ملائمة تلك المعايير لبلد مثل مصر؟ مش باردو المنطقي إن كل إقليم هو الأقدر علي توضيح ما يفيده ويناسب طبيعته من هذه الوسائل؟ أليس من المنطقي أيضا أن تكون المسألة نسبية في بعض المجتمعات أو حتي عند بعض الأفراد فقد ترفض ربة منزل مثلا استعمال مكنسة كهربية علي الرغم من امتلاكها للمال الكافي والسبب أنها تريد ألا تحرم نفسها من المجهود العضلي الذي تمارسه في تنظيف بيتها وأنها لا تري أن الراحة ستجلب لها السعادة أو حتي الصحة. وتري أن الراحة سبب المرض وأن الأنتخة هي سبب تعب العظام.
أختي تفعل ذلك.
طبعا كلنا عرفنا من الإعلام الأهبل سواء العربي أو الأجنبي إن الدوريات الراكبة أكثر تقدما من الأحصنة والبغال. طيب يا تري لو في بلد طبيعتها جبلية وصحراوية ينفع أقيس التنمية فيها بعدد سيارات الدورية الراكبة؟؟؟
ويارتي مستوي رفاهية قرية معينة في مصر ممكن يتقاس بعدد محلات الماكدونالدز والهايبر ماركت اللي فيها؟
بلاش دي يا تري ينفع نقيس حجم الرفاهية في بيت ما بقدر الأجهزة الكهربية اللي فيه زي الميكروويف مثلا وغسالة الأطباق اللي أصلا ست البيت لازم تدخلها الأطباق نضيفة عشان بواقي الأكل ما تسببش عطل فيها وكمان بتستهلك كمية مياه أكبر من غسيل الأطباق بالطريقة المعتادة علي الحوض.
وياتري وجود السيارات بكثرة في مدينة ما يكون مؤشر علي إيه؟ تقدم ولا تخلف؟
وياتري هل بنحسب في معايير التقدم حجم التلوث الناتج عنها؟
والتليفون المحمول في مصر من مؤشرات التقدم ولاّ التخلف؟
والتوك توك اللي ممكن ميكونش في وسيلة مواصلات غيره داخل حدود حي معين لعدم وجود ميكروباصات أو لأن الشوارع ضيقة يعتبر وسيلة متقدمة ولا متخلفة؟
القانون أصبح وظيفته في مصر أنه يخلق مجرمين يا كفرة ، وفي النهاية التلفزيون المصري قام بمهمته الإعلامية الرائدة علي خير وجه وغطي المظاهرة وناقش الموضوع مع أحد كبار الصحفيين. وطبعا قناة الجزيرة والعربية بيشوهوا سمعة مصر.
-------------------------
وينقسم الشعب المصري إلي طبقتين: الطبقة الكادحة والطبقة الكاسحة. قد تتمتع الأولي بنعيم الآخرة
13:50 Posted in Egyptian Society | Permalink | Comments (20) | Email this | Tags: Class Conflict
Comments
يقال و العهده على الراوى أن سبب منع التكتك هو أنّه تسبّب فى حرمان سائقى الميكروباظ من سبّوبه حلوه حيث أنّه من المعروف أيضا للكثيرين من مستخدمى الميكروباظ أمثالى أن كثيرين من مالكى الميكروباظات من رجال المرور !! فكده يبقى الموضوع واضح وضوح السمس !!
وبعدين يعنى أنا مش فاهمه لماذا لا ينتفض رجال المرور للحديث عمّا يجوز أو لا يجوز فى مواجهة الغلابه أصحاب التكتك ولا نسمع لهم حسّا امام مشكلة تقسيم المسافات التى ابتدعها الأشاوس من سائقى الميكروباظ !! يعنى بعد أن انتشرت الميكروباظات العملاقه التى تسمّى "ميكروباظ الجمعيه" و أصبح لها أجره موحّده خمسين قرش على أن تقطع مسافه ما "لنقل من امبابه للجيزه مثلا" بسبب طول المسافه بالزياده عن السيارات الأصغر التى تقطع مسافات أقل .. تراجعت هذه السيّارات تدريجيا عن قطع المسافه التى من أجلها هبشت الأجره الزياده بينما لم تتراجع الأجره !! و أصبح شائع جدّا تقسيم نفس المسافه على ثلاث أو أربع مراحل كل مرحله بأجره جديده !! ولا رأى ولا رؤيه للمرور و رجاله رغم تعدّد شكاوى المواطنين من هذا الذبح اليومى لهم !!
ثمّ أن السؤال الذى طرح مرارا و تكرارا .. أمّا هى وسيله متخلّفه لماذا سمح من الأصل باستيرادها و بيعها !! وما هو البديل الممكن فى شوارع ضيّقه و محرومه من أبسط الخدمات مثل تمهيدها أو سفلتتها !! على فكره خالتى ست كبيره و لديها أمراض تمنعها من سهولة الحركه و التكتك كان فعلا اختراع حيوى جدّا لها و لكثيرين مّن يمرّوا بنفس وضعها :( الموضوع باخ أوى و الحال بقى يخنق جدّا .. حسبنا الله و نعم الوكيل ..
Posted by: زمان الوصل | 19 November 2007
أيوه الوساخة بتوع مكروباظ الجمعية بدل ما يرفعوا السعر من خمسية قرش لخمسة وسبعين قاموا مقسمين المسافة الواحدة الي مسافتين كل واحدة منهما بخمسين قرش.
وفي شارع الهرم يتم تقسيم الشارع الي أربع أو ثلاث مناطق بنفس الطريقة الوسخة.
ساعات باقول ان طالما احنا بناكل في لحم بعض يبقي مش غريب ان الدولة تنهش لحومنا كلنا. وده طبعا مش تبرير لدين أم الدولة بقدر ماهو نقد للسلوكيات الانتهازية البشعة السائدة.
الأجرة لة زادة خمسين في المئة وبقت خمسة وسبعين قرش كان يبقي ميت فل وأربعتاشر إنما تزيد مية في المية يبقي بجد وساخة و سادية.
وطبعا كله تم بالاتفاق بينهم وبين بعض لأن خلاص مبقاش في حد بيرجع من إمبابة للجيزة، إنما بيرجع علي الجامعة وبعدين بأجرة جديدة يرجع للجيزة.
ِأشتري عربية وأمري لله وأتسبب في زيادة كمية العادم والتلوث ولاّ أستحمل الاستغلال ده؟
Posted by: Mukhtar | 19 November 2007
ملحوظة شريرة :
لماذا حول الإعلام المصري (الموالي والمعارض والمستقل والموالس) سائقي التوك توك إلى شياطين وسائقي الميكروباظ وتباعيهم إلى ملائكة منزلين؟
تسمح الحجج تتقرف ..
آل إيه .. بيحصل حوادث تحرش في التوك توك..
يا حلاوة المولد..
لاهو الدار أمان في الميكروباظ!
الركوب المعتاد للميكروباظ في المنصورة -مش في قاهرة المعز- بيتخذ أوضاع غريبة.. أنا شخصياً علشان أروح الشغل أو أقضي مصلحة بأقعد وأنا ساند ضهري على الباب .. حاجة في قمة الخطورة خصوصاً لو سعادة البيه سائق الميكروباظ حب يعمل فيها ستيف أبو أوستين بتاع التمانينات ويعيش طفولته البائسة ويلعب بالعربية في الشوارع المزدحمة..
طبقاً لإعلامنا سائقو الميكروباص ملائكة ، وتباعوهم كذلك .. مع إنهم الفئة الوحيدة في الشعب المصري اللي بتضرب أمناء الشرطة في الوقت اللي بيستقوى فيه علينا الكاكي كما لو كنا فراخ كنتاكي!
Posted by: قلم جاف | 19 November 2007
قلم جاف:
أنا كمان تعلمت الشر منك :) لماذا يتم حصر المخالفات وتعطيل المرور والتسبب في الحوادث علي فئة معينة من المركبات؟ يعني لماذا منذ سنوات كنا نسمع ونري المقالات والكاريكاتير للتهكم علي المخالفات الشنيعة للمكروباظ وأنهم بهدلوا مرور القاهرة وأنهم يتسببون في الحوادث وتعطيل الدنيا حتي بات كل واحد منا في قلبه ححقد وكراهية ضد منظر المكروباظ وسائقه وكل من له صله به.
تم ترويج هذا بكل سهولة وكأن سواقين النقل العام ملايكة باردو يا أخي
وكأن سواقين الملاكي بيراعوا قانون المرور بحذافيره
وكأن التاكسيات عبارة عن كائنات مسالمة أو قطط مغمضة
!!!!!
اااااه يبقي المكروباظ هو اللي بوظ المرور وهو لوحده اللي بيقف في الممنوع
وهو لوحده اللي بيعمل حوادث
.
انهاردة بقي التوك توك هو اللي بوظ المرور، وكمان مش وسيلة آمنة للنقل وكمان بيتعمل بيه جرائم وحوادث وتلاقيهم كمان بيلوثوا البيئة الوحشين دول ربنا ياخدهم. إخص عليهم. يبقي الدولة هتلغي التوك توك حفاظا علي الشعب .
اه ماهو لو الشعب مات ، الدولة هتطلع دين أم مين؟يعني ايه الحكومة هتستورد شعب طلعان دينه من بره ولا إيه؟
Posted by: Mukhtar | 20 November 2007
من أيّام قليله سوّاق تاكسى كنت راكبه معاه قال تعليق معجبنيش عن سواقة الستّات !! و رغم إنّى مش باسوق أصلا و الموضوع لا يخصّنى إلاّ إنّى سألته يعنى الميكروباظ اللىّ بيتنططّ قصادك يمين و شمال ده و مجنّنك من ساعة ما طلعت الكوبرى سايقه واحده ست !! و هو يعنى انت عمر ما سوّاق ملاّكى راجل كسر عليك أو نط من اليمين للشمال فجأه من غير ما يدّى إشاره !! ولا حتى سوّاق أتوبيس أجبرك على الانتظار حتى يمر هو من غير ما تفتح بقّك !! سكت طبعا و لم يعقّب ..
الفكره إن فعلا هناك اصطمبات فكريه يجرى الترويج لها و تقبّلها منّا دون بعض التفكير .. يعنى ناس كتير أمّا سوّاق تاكسى يسوق غلط تلاقيهم يبرّروا ده بأنّه لازم يعمل كده عشان تاكسجى "تقال فى موضع احتقار الشخص و المهنه" برغم أن بعض التفكير يوضّح أن غالبية قائدى السيّارات فى المحروسه سواقتهم زى الطين بصرف النظر عن مهنهم أو نوع الرخصه التى حصلوا عليها !!
Posted by: زمان الوصل | 20 November 2007
زمان الوصل:
الله ينور عليكي
كنت ناوي أعالجها في تدوينة دي، خرافة إن الستات سواقتهم وحشة.
ولما أبص علي الشوارع ألاقي أن الغالبية اللي بتسوق رجالة، والقرف همه بالتأكيد نصيبهم فيه يكون أكبر والحوادث باردو والخناقات اللي في الطريق يبقي مال بقي الستات بالخرافة دي؟؟؟
أهو كلام بيتقال وخلاص دون أي تفكير
Posted by: Mukhtar | 20 November 2007
آه والنّبى ابقى اتكلّم عن الموضوع ده !!
السوّاق ساعتها قال لى أصل الستات خوّافه أوى فى السواقه !! و أنا وقتها الحقيقه لم أر الموضوع بوصفه خوف بل بوصفه حرص على ممتلكات الغير .. يعنى باحس إن الست لو كانت بتسوق ببعض الحرص فده سببه عدم رغبتها فى إتلاف سيّارة غيرها بدم بارد !! خصوصا لو أخطأت و كانت نتيجة الخطأ ده تلفيات فسينتظرها تهزيق و قلّة أدب و شتيمه و تطاول للصبح لمجرّد إنّها واحده ست :( و على فكره ده من ضمن الأسباب اللىّ بتخلّينى مافكّرش بجديّه اتعلّم السواقه لأنّى مش عاوزه أتشتم كل يوم ..
مرّه زمان كنت باتكلّم مع أخويا بنفس منطق النسبه و التناسب و إن لو كان عدد اللىّ بيسوقوا من الرجال أكبر يبقى منطقى يبقى عدد اللىّ بيغلطوا منهم و يرتكبوا حوادث أكبر و ده شئ يمكن استشفافه بسهوله من قراءة صفحة الحوادث مثلا .. إن عدد الحوادث التى يرتكبها رجال دائما أكبر ومش بس فى مجال السواقه لكن فى مجال الجرائم بشكل عام .. و بالتالى مش من العدل أن تنسب الشرور للمرأه لأن واضح من الجرائد إن الرجل نصيبه أكبر .. لقيته بيرد عليّ و يقول لى ما الرجال بيرتكبوا الجرائم بسبب الستّات !! يعنى نظام هتتباس يعنى هتتباس الست مدانه يعنى مدانه .. إففف بقى :)
Posted by: زمان الوصل | 20 November 2007
زمان الوصل:
هههه بسبب الستات باردو !!!! بس حلوة
كانت زوجتي بتتفرج علي مسلسل قديم من كام يوم بيظهر فيه محمود ياسين وبوسي وكانت بوسي الزوجة اللي مخها تخين وجوزها عاقل وكده.
فسألتها ايه المسلسلات القديمة دي ؟ فقالتلي ماهي متفرقش كتير عن الجديد لأنها بنفس منطق حلقات كتير من مسلسل أشرف عبد الباقي اللي فيه الزوجة بتخرب البيت بوعي أو بدون وعي والراجل بيكون ضحية ومعلم لها في نفس الوقت.
أنا فعلا شفت كذا حلقة كانت الست فيهم بتطلع مسرفة مثلا أو بتحب المظاهر أو شكاكة الخ الخ ويطلع الراجل بيعاني وبيصلح علي طول الخط.
مش عارف إذا كانت وجهة نظر زوجتي صح ولا لأ لأنها أصلا مش بتتفرج كتير وتتابع كل الحلقات عشان تصدر حكم بكده بس فعلا تصادف اني شفت كذا حلقة تؤدي الي نفس النتيجة.
الله أعلم
:)
Posted by: Mukhtar | 20 November 2007
عليك اللعنة
عليك اللعنة
مراتك شيوعية وانت سلفي تكفيري
هذه الاسرة يجب ان تجتث من اصولها
لانها تبث خطاب كراهية تحريضية
خسئت ايها الشنقيط
انت تحاول ان تنكر الريادة الاعلامية المصرية لانك عميل عميل عميل
عميل لمافيا المخدرات ومافيا حقوق الانسان ومافيا الفضائيات مجتمعين
انت متعاطف مع القاعدة عشان عايز تخلي الناس قاعدة في التوك توك
ما سمعتش عن ان المشي رياضة ايها التكفيري الارهابي؟ ما يمشوا في الشارع
ح يتعكعبلوا في الرصيف؟ مش مشكلة اللي يتكعبل في الرصيف التلات ادوار يستاهل لانه مش واخد باله وكله في مصلحة لياقته البدنية
انت بتشوه سمعة مصر
اعترف بتعمل لصالح مين
مين الجهة اللي مسلطاك
مافيا التوك توك طبعا
Posted by: نوارة | 21 November 2007
الاخ العزيز نصير المرأة والتوك توك
ويمكن كمان نصير شمة
المهم
بصراحة مش كل الاعلام يعني كان ضد الظاهرة امبارح في القاهرة اليوم كانوا متبنين وجهة النظر الاخري طبعا باستثناء اخونا المخبر اللي شغال سيكا للواءات
وكان عمرو بيدافع عنهم بجد وجاب محافظ القليوبية المستشار عدلي حسين والراجل قال كلام محترم عن الحفاظ علي ارزاق الشباب دول وحاجات من دي
بس المشكلة يا مختار تكمن في مقولة قالها الدكتور يحيي الرخاوي من كام يوم في برنامج العاشرة مساءا تعليقا علي موضوع نصب وصلاحيات الدولة
قال كلمة بليغة جدا
المشكلة ان مفيش دولة
!!!!!!!!!!!!!
اتصدق صح
فكر كده شوية
تلاقيها فعلا صح
يعني لو في دولة بمعناها الحقيقي لو كان التوك توك دي حاجة غلط وعيب واخيي مكنتش سمحت بدخوله اصلا ولا بإستيراده وأخذ ضرائب ورسوم وجمارك
ولو كان الاخري كانت حاولت تقنن وضعه وتستغله صح زي الهند والباكستان والبنجلاديش
بس علشان مفيش دولة بجد لجؤا للحل السهل
الغي يا جدع
واللي يتكلم عصا الامن موجودة ومتحضره ومدهونة زيت علشان حقوق الانسان
بس برضه الستات سواقتهم زفت
نياهههها
Posted by: bahry | 21 November 2007
شف، هي مشكلة فعلا.
من ناحية أنا متعاطف مع الغلابى ال اشتروا تكاتك أو بيشتغلوا عليه.
لكن من الناحية الثانية ما هو لو اضطرينا نقبل كل حاجة يعملها الغلابى لمجرد أنهم عملوها خلاص برضو مش هيبقى كويس.
ما هي العشش و العشوائيات عملها غلابى.
طبعا ال أفضله هو أن ما يكونش فيع غلابى يضطروا يلجأوا لحلول عشوائية علشان يعيشوا و يحلوا مشاكل زي مشكلة المواصلات.
لكن ال أنا مش متعاطف معهم أبدا هم الفاسدين ال استوردوا التكتوك و هم مدركين استخدامه هيكون ازاي. دول حطوا المجتمع كله أمام الأمر الواقع و بيضحكوا دالوقتي عليما.
و زي ما يشاع أن الأكشاك المخالفة و الميكروباصات المخالفة يملكها و يحميها رجال شرطة، فكمان سمعت أن التكتوك استورده فاسدين من الحزب الزفت الوطني. طبعا مش قصدي أن أي حزب هو رقيب على تصرفات أعضاؤه، لكن نادي الفساد القومي دا له ظروف خاصة.
مع أن استيراد المركبات القديمة ممنوع أساسا!
مع أنه موجود من كم سنة في البلد إلا أني شفت التكتوك في موطنه الأصلي و هو الهند، قبل ما أشوفه في شوارع مصر.
و ساعتها تمنيت أنه ما لا ينتشر في مصر، لأنه مزعج و ملوث جدا، و عرفت في ذات الوقت قد إيه هيكون جذاب لنا.
في أيرلندا بقى شفت نوع آخر من المواصلات الصغيرة يعمل بالبدال، و كان واضح لي أن ال شغالين عليه هم برضو الفقراء. طبعا الطرق في عاصمة أيرلندا حاجة ثانية، فالبتالي مش عارف دا ينفع قد إيه في شوارع ضواحينا الشعبية و العشوائية.
لطن تصميماته كانت عصرية و فضائية كدا.
بيسموه بيديكاب Pedicab، من بدال Pedal (مش بيديه :)
بالنسبة لماقييس التخلف و التقدم فدي فعلا فيها مشاكل على المستوى الأكاديمي.
يعني من أول ما أن في وقت من الأوقات كانت الحضارة و المدنية civilisation تقاش بمعايير الأوربي الأبيض و ال أدى لوضع العالم كله في خانة التخلف زي ما أنت عارف،
و وصولا إلى معايير اقتصادية كانت تقيس التقدم بحجم ما يستهلكه المجتمع من طاقة و ما ينتجه من نفايات. يعني كارثة بيئية.
المفهوم الأول للمدنية انتهى مع "ما بعد الحداثة" (للأسف مضطر أستخدم الكلمة ال بتجيب أرتيكاريا لناس كثير أنا منهم)
و المفهوم الثاني بتاع الاقتصاد تجري مراجعته حاليا لأنه فاشل تماما و لا يمكن أن العالم كله يعيش زي ما الدول التي تسمى حاليا "غربية" و "متقدمة" تعيش. موارد الأرض لا تكفي
Posted by: ألف | 21 November 2007
اكتشف كالعادة أن النظام دا بيشيل الروابط :(
الأوتوركشا http://en.wikipedia.org/wiki/Auto_rickshaw
و البتاعة ال بالبدال: http://en.wikipedia.org/wiki/Pedicabs
و كمان حاجة بمناسبة الشوراع الصعبة: http://www.pedicabblog.com/2007/10/q-does-your-pedicab-company-close-for.html
Posted by: ألف | 21 November 2007
الكل بيتكلم من غير ما يعرف حاجة
التوكتوك هيتلغى
بس الحكومة هتوفر بديل
بديل تاريخي واصيل
الحكومة هتوفر الحنطور
والمواطن المصري هيركب الحنطور
ويتحنطر
درجن درجن دن
Posted by: che_Wildwing | 22 November 2007
بصفتي راكب قديم للتوك توك
بالإضافة للميكروباص و التاكسي و أحيانا الملاكي مع آخرين
فأعتقد أن دواعي الحملة علي التوك توك لا تمت للميكروباص و أساطينه أو للتاكسي
فمجال عمل التوك توك لا يتقاطع مع الميكروباص و لا التاكسي
و لكن يمكنك أن ترى وضوح تذمر أصحاب الملاكي من التوك توك طول الوقت
و أصحاب الملاكي يمتدون من قاع الطبقة المتوسطة حتي أعلي الطبقة العليا
و في حين أن الطبقات العليا لا يتيسر لهم الاحتكاك بتوك توك يوما ما
فإن البيروقراطية الحكومية التي يتشكل معظمها من الطبقات الوسطي و شرائحها الدنيا و الوسطى هم في الغالب المسؤولين عن التحريض ضد التوك توك
هذا بالإضافة لأن التوك توك بالفعل تسبب في تحديات أمنية جديدة , عربات غير مرخصة و غير محدد ملكيتها بأي وسيلة . مما تسب في نزاعات علي الملكية و استخدام في بعض الجرائم , و هكذا ... و لكن الشرطة ليست في خدمة أم الشعب , فإن التوصية الأمنية تسير في اتجاه التحريض ضد التوك توك .
هذا مع العلم أن الحملات ضد التوك توك تدر منافع هائلة علي الشرطة, فمصادرة توك توك ثم الافراج عنه بعد قبض المعلوم أصبحت سياسية يومية.
و أن تكون الحملة مقننة و مجتمعية هذا يرفع المعلوم حتما , بعدما كانت الحملة تتم حسب مزاج البيه الضابط الذي ينال نصيب الأسد من المعلوم .
Posted by: عمرو عزت | 22 November 2007
أنا من مالكي السيارات!!!
جبت العربية على كبر
إتعلمت أسوق بعد التلاتين لأن أبويا بيكره السواقة فعمرنا ماكان عندنا عربية
في يوم أغبر - كنت أنا و مراتي راجعين من حفلة لعمرخيرت و في منتهى الإنسجام بعد الأنغام و الأحلام
حاولت أوقف تاكسي
ساعة!!!!!!!
مراتي كانت حامل في الشهر السابع
وقعدت على الرصيف من التعب!!!!!!!!!!!!!!!!!!
يومها حلفت إني أحوش و أجيب عربية و قد كان الحمد لله!!!!!!!!!!!!
المهم - أنا عمري ماركبت توك توك
لكن عشت حياتي ميكروباصات و أوتوبيسات!!
بعد ما بقيت من ذوي الأربع عجلات و سقت بين غابات الميكروباصات و التاكسيات و العربيات اللي سايقها رجالة و ستات
كرهت السواقة و سنينها
كل يوم بانفد من حوادث بأعجوبة
بعد 15 سنة سواقة - كل يوم باتشاهد إن العربية ترجع سليمة - حمارتك العارجة أحسن من سؤال اللئيم:)
القصد - المشكلة لا هي في التوك توك و الا الميكروباص - و الا التاكسيات و الا العربيات
المشكلة المرور و الناس
و إن الناس نسيت إن السواقة فن و ذوق زي مابيقولوا :)
إحنا غاويين نسيب أصل المشكلة و نمسك في الأعراض!!!
كان في شارعنا تقاطع بإشارة - كان بيبقى زحمة جدا و تلبك مروري كل شوية
راحوا لاغيين الإشارات!!!!!!!!!!!!!
وعملوا يو ترن في كل شارع علشان ماحدش يقف
فكرة جميلة - ممكن تسوق 30 م زيادة بس المرور ماشي
الناس بقت تفتكس
و يلفوا عكس الاتجاه علشان
الزحة زادت
الشارع بقى أوسخ من الأول
راحوا حاطين عسكري مرور
إتنيلت أكتر
حطوا معاه ظابط
إتهببت
ماعرفش هيعملوا إيه؟!؟!؟!؟
المشكلة عندنا إحنا
كلنا بنكسر إشارات و نمشي عكس الاتجاه و نحاول نسرق حته رونج
فهلوة و الا غباوة - مش عارف؟!؟
Posted by: الزنجي | 22 November 2007
أنا سعيده والله بمشاركة الأخ "زنجى" ..
أصلها بتعبّر عن موقفى من السواقه فى البلد المحترمه دى !! أنا طول مانا راكبه ميكروباظ أو تاكسى أو حتى عربيّتنا و أختى بتسوقها مش قادره أتخيّل ييجى علىّ يوم و أسوق فى المولد ده !!
زى ما "زنجى" قال إحنا سبنا المشكله و مسكنا فى العرض و لأن التكتك هو الأضعف فى هذه الحلقه كان كبش الفداء الذى وقع عليه الاختيار للتضحيه به ..
لأن ليس التكتك وحده الذى يتسبب فى مضايقات أمنيه .. الميكروباظ مخالفاته أشد فداحه و يكفى أن ترى أحدهم سائرا فى عكس الاتجاه و ليخسأ الخاسئون .. و إذا كانت المشاكل الأمنيه للتكتك بسبب عدم ترخيصه فأصحابه لم يعترضوا على الترخيص بالعكس دول بيناموا يحلموا بالرخصه .. وهذا طبعا ليس على طريقة نبنى عشوائيات و بعدين نقننها لأن العشوائيه الحقيقيه هى فى السماح باستيراده و دفع الجلد و السقط فى تمنه و الاستدانه من أجله ثمّ حظر استخدامه و العمل عليه !! لكن فى بلدنا دائما نحاسب صغار العشوائيين ولا نفكّر أبدا فى محاسبة كبارهم :(
Posted by: زمان الوصل | 22 November 2007
في مصر و الدول النامية تستخدم القاعدة الأدهمية لعلاج المشاكل اللي عايزة مفهومية:
الصباع اللي يوجعني ما عالجهوش ..... أقطعه!!!!!!
لكن البند ده في القانون تم تغييره مع التعديلات الدستورية في عام الهس بس إلى
الصباع اللي يوجعني ما عالجوش ...... أقطع رجلي من لغلوغها!!!!!!!!!!!!!!!
Posted by: الزنجي | 22 November 2007
المصري اليوم 4-11-2007
مفاجأة: «التوك توك» يدخل برنامج الرئيس الانتخابي
http://www.almasry-alyoum.com/article.aspx?ArticleID=81810
Posted by: ألف | 06 January 2008
من الاخر من ساعة لما ظهرت التكاتك دى و الجرائم فى ازدياد مستمر .. اغتصاب و سرقة و قتل .. فالباب الى يجى منه الريح نسده و نستريح .. و بعدين ما الدنيا كانت ماشية من غيرها ..و على فكرة سواقين التكاتك دول اوسخ من سواقين الميكروباصات 100 مرة و عيال ولاد كلب مسجلين خطر و محكوم عليهم فى قضايا قد كده .. و فى الاخر زعلانين اوى عشان هيمنعوها .. و عمار يا مصر
Posted by: waleed | 20 March 2008
يا جماعة انا محتاجة ضروري جدا رقم تليفون سواقة ميكروباص او تاكسى او لوري عشان اعمل معاها حوار صحفى اللي معاة الرقم يعمل فية ثواب و يبعتهولي علي الاميل بتاعى بس يا ريت بسرعة
Posted by: dido | 25 March 2008
Post a comment