« قبل الثامنة عشر | HomePage | إحنا مش جوه الجلابية - وده المهم »
07 March 2008
كتب جديدة
ولو إن أنا مستسخف مسألة عرض كتب جديدة فى المدونة فى ظل الحالة الاقتصادية بتاعتنا إنما مش شرط يعنى اللى هيقرأ الكلام ده يشترى الكتب أو حتى يخطط لشرائها مستقبلا، كفاية إننا نعرف الموجود والإصدارات والمجالات اللى بتتناولها. طبعا الحديد قرّب يوصل لست الآف جنيه، وطن الأسمنت قرّب على خمسمية. أنا شخصيا عندى بداية اكتئاب بسبب غلاء الأسعار غير المبرر والجنونى ولسة باسأل نفسى: الناس فى مصر بيعيشوا إزاى؟؟؟ كيلو العدس – العدس اللى هو العدس اللى هو وجبة مفيدة جدا وبياكلوها الفقراء فى مصر – وصل سعره إلى تسعة جنيه. أذكر إنه من حوالى خمس شهور كان بخمسة جنيه.
تقريبا نوع الخضار الوحيد اللى تمنه معقول هو البطاطس، والحمد لله إن لها كذا طريقة فى الأكل عشان متبقاش معتمدة كليا على الزيت اللى تمنه انهاردة يكسر العشرة جنيه مرتاح. ممكن حضرتك تاكلها مسلوق واهو باردو حفاظ على الصحة بدل حريقة الزيت اللى إنت عايم فيها دي.
خلينا فى الكتب الجديدة عشان ألاقى مهرب من الاكتئاب.
---------------------------
تاريخ مفقود
دار نهضة مصر العريقة هتصدر فى الأسواق يوم 9 مارس ترجمتها لكتاب
Lost History
للكاتب الأمريكى مايكل هاميلتون مورجان، وهو مؤسس ورئيس مؤسسة غير ربحية اسمها
New Foundations for Peace
الكتاب صادر فى نسخته الإنجليزية عن ناشيونال جيوجرافيك، وانشاء الله يكون فى ندوة عن الكتاب فى قصر المانسترلى بمنيل الروضة يوم السبت السابعة مساء. الدخول للدعوات الخاصة فقط. الكاتب هيحضر ومعاه السيد ياسين الكاتب والمحلل السياسى.
أنا لسة يادوب ماسك النسخة انهاردة، المقدمة حلوة وموضوعية ومشجعة جدا لاستكمال الكتاب. هانقل هنا فقرة بسيطة ممكن تكون دالّة جدا على محتوى الكتاب:
ومعظم الأمريكيين بما فيهم الأمريكيون المسلمون وحتى عدد كبير من المسلمين حول العالم لا يعرفون سوى قشور التاريخ الإسلامى أى "أنهم كانوا من العظماء فى يوم من الأيام وأنهم اخترعوا علم الحساب ثم سقطوا فى مستنقعات التأخر". كما أن معظم الغربيين قد تلقن أن جذور المجد الغربى تعود إلى أيام الرومان والإغريق وأنه بعد سبات دام ألف عام بين مجاهل عصور الظلام، حدثت المعجزة واستيقظت أوروبا لستعيد صلاتها بأصولها الرومانية والإغريقية... أما الإسهامات الفكرية للعرب والفرس والهنود والصينيين والأفارقة وآخرين فى العالم الإسلامى فقد اختزلت واقتصرت على الحواشى المتناثرة هنا وهناك.
الكتاب يهدف إلى الوصول إلى القارئ العادى، ولا يزعم أنه سيلم بكل تفاصيل الحضارة الإسلامية ولا بالكلام عن كل العلماء.
المفروض إن الكاتب هيكون ضيف برنامج العاشرة مساء يوم السبت.
الكتاب فى طبعة فاخرة، وغلاف مقوى، 301 صفحة قطع متوسط.
الكتاب بخمسين جنيه، للّى مش ناوى يشترى زيت ولا عدس فى شهر مارس.
-------------------------
إمبارح لمحت كتاب التنوير الآتى من الشرق: اللقاء بين الفكر الأسيوى والفكر الغربى.
صادر عن عالم المعرفة، الكويت. بأربعة جنيه طبعا.
الكتاب صادر فى ديسمبر 2007، ورقمه 346 فى السلسلة دى.
الكتاب صادر عن دار روتليدج 1997 وعنوانه الأصلى
Oriental Enlightenment
مش هعرف أقرأ الكتاب اليومين دول لكن موضوعه جذاب عموما يعنى. اشتروه وإذا طلع مش حلو، اشترى إزازرة زيت وحمّر شوية بطاطس.
ورق الكتب بيشرب الزيت كويس.
----------------------------
أفضلية الديمقراطية
الكتاب اللى بدأت أراجع ترجمته إلى العربية من كام يوم هو كتاب
The Democracy Advantage
المفروض إن المراجعة مش هتخلص قبل شهرين ونصف وأنا لسة مش عارف مين الجهة اللى عايزة الكتاب وهل هيتنشر فى مصر ولا لأ. غريبة مش كده؟ والأغرب إن اسمى مش هينزل عليه كمراجع!!! لكن ولا يهمنى. إحنا بنشجع الثقافة، وخدّامين العلم والعلماء والمناخ التقدمى النهضوى. وسمّعنى النشيد الوطنى لحمورية مصر العربية.
ما علينا
الكتاب حوالى 300 صفحة فى نسخته الإنجليزية، اشترك فى تأليفه ثلاثة مؤلفين، مش فاكر ولا إسم فيهم وفى نفس الوقت مكسّل أفتح الملف اللى فيه الكتاب، ومكسّل أعمل رابط للكتاب على أمازون.
فكرة الكتاب باختصار مرتكزة على: أفضلية الديمقراطية كنظام للحكم على الأوتوقراطية. والكتاب بيعرض فكرة تقليدية تخص الدول النامية ونظام الحكم الصالح لها. الفكرة دى بتقول إن الدول الفقيرة اللى لسة محققة استقلالها وعايزة تحقق نمو اقتصادى، الأنسب لها أن تخضع لنظام حكم شمولى أو أوتوقراطى يقدر يحشد طاقات البلد ويتخذ قرارات سريعة ومؤثرة من غير شوشرة ونقاشات تعطل عجلة التنمية اللى بيزقها الحاكم المطلق بقوة شخصيته وحمورية أهله.
وإن لو جينا فى المجتمعات المطحونة دي وحبينا نتكلم عن الديمقراطية كهدف أول وأسمى وأوجب للتحقيق أولا فالنتيجة هتكون إن الناس مش هيلاقو أي تقدم ولا نمو اقتصادى وهيفضلوا يهتموا برفاهيات زي الانتخابات مثلا وتأسيس آليات لمحاسبة المسئولين. وبالتالى فمش هينفع نقلب هرم ماسلو القلبة السوده دي.
التنمية الاقتصادية أولا ثم ندوّر بقى على الديمقراطية، وأصلا بيقولك ان التنمية هتجيب الديمقراطية تلقائيا كده.
المؤلفين بقى بيعترضوا على وجهة النظر دى وبيقولك لأ، والأرقام بتثبت إن لا التنمية حصلت ولا الديمقراطية رعرعت فى المناطق الخرا اللى زي مصر مثلا. والمطلوب إن العالم الحر المتقدم يزرع الديمقراطية الأول في المناطق المقرفة دى أولا وهو ده اللى هيجيب التنمية الاقتصادية.
البيضة والفرخة بقى وكده. آه بمناسبة البيض، بيقولك إن كيلو الفراخ البيضا اللي هي بتاعة المزارع، الفراخ العيانة دي اللى بتضرب حقن ومنشطات جنسية بالعبيط، بيقولك الكيلو فيها واقف بخماشر جنيه.
أكيد موضوع تنمية ولاّ ديموقراطية ده شائك بما فيه الكفاية عشان نفكّر فيه، ونقرأ عنه بما إننا متعاصين فى القرف ده، وجزء لا يتجزأ من البلدان اللى ضايعة من ناحية الاقتصاد والديمقراطية.
وسمعت مؤخرا إن جمال طلع مشارك عصام الحضرى فى حراسة الأهلى والمنتخب، وأنه الأهلى هيصدر عفو عنه قريبا، وبيقولك هينزل مرسوم جمهورى إن محدش يشوط جامد على عصام، وإن الحكم يصبر عليه شوية لما يلقف الكورة ويتمرغ ع الأرض ويسيبه يشوط ضربة المرمى براحته.
موضوع عصام ده باردو ممكن ينفع هامش للكتاب اللى أنا باراجعه – هو وموضوع البيض طبعا اللى الكارتونة فيه تقف بخماشر جنيه باردو.
16:00 Posted in Books | Permalink | Comments (14) | Email this | Tags: New Books
Comments
مين ح يشتري كتب في الزمن الاغبر ده يامختار
حتى العدس اصبح رفاهية
بس حلو قوي الموضوع وربطك بين الكتب وجدواها وترجمة سعرها لسلع
هو ده التلاحم المطلوب
ح اشوف كتاب عالم المعرفة ويارب الاقيه
تحياتي
Posted by: Bella | 07 March 2008
انت فاضي باين عليك..اسمك ينزل كمراجع عالكتاب إيه ياعم؟
هو الموضوع ده إيه أهميته يعني!..المهم تجيب كفايتك من البطاطس والعدس!
Posted by: Ahmed Nasr | 08 March 2008
بيلا:
عند بتوع الجرايد اللى فى الشارع هتلاقى الكتاب.
لمّا العدس والفول تمنهم يرتفع يبقى إيه اللي فاضل قدأم اللى مكنش بياكل غيرهم؟
تقريبا كده الديمقراطية لازم تتزرع الأول عشان التنمية الاقتصادية تشتغل.
ربنا يستر
----------------
أحمد:
البطاطس كويسة، تمنها جنيه وربع بس المشكلة فى الزيت. فالأفضل إنها يا إما تنطبخ يا إما تتسلق.
إنما العدس يبقى بتسعة جنيه ليــــــــــــــه؟؟
مانا باردو قلت كده، موضوع نزول اسمى على الكتاب هامشى بالنسبة للفايدة الأهم اللى هى أنه أصلا يتنشر.
هو مفيش نهاية للضنك ده بقى؟ بافتراض يعنى إن يحصل إصلاح تفتكر ممكن ياخد كام سنة؟؟؟
Posted by: Mukhtar | 08 March 2008
على فكرة الطبيخ بالزيت اساسا مضر جدا
يعني البطاطس من غير زيت اكثر فائدة
الزيت اللي مش مضر في الطبيخ هو زيت الزيتون
الله اعلم بقى سعره كام دلوقتي
Posted by: محمد شدو | 08 March 2008
ازيك يا مختار
اكثر حاجة بتعجبنى فى مدونتك دى اهتمامك بالكتب بصفة مستمرة
شكرا على عنوان كتاب التاريخ المفقود شكلة مغرى بالقراية
يمكن موضوع العدس والزيت والغلاء دة مشفارق معايا شوية علشان انا مشمتجوز
فمشحاسس بالمصيبة
بصفتك عاشق للكتب
كان فية برنامج كتبت عنة عندك
shelfari
لتنظيم مكتبتك
انا نزلت برنامج تانى اعتقد ممكن يفيدك اقوى من التانى ومتخصص عنة
شرحت تبسيط لية فى مدونتى
ودة اللينك بتاعة
http://www.4shared.com/file/39267527/bf2b999d/CollectorzcomBookCollectorProv503-TE.html
Posted by: hartaka | 09 March 2008
أخيرا ظهر "مختار" من تحت الردم :) حمدلله ع السلامه :)
حلوه أوى المقاربه بين الزيت و البطاطس غذاءى الجسد و الكتب غذاء العقل .. ده بوست مغذّى تمام :) أنا عجبنى كتاب "التاريخ المفقود"
Posted by: زمان الوصل | 09 March 2008
ياعم مختار عاوز اقولك ان الاكتئاب من كتر ما عاش معايا من الكلام ده تنحت وما بقيتش اكتئب وحتى مابقيتش ما اكتئبش انا نفس مش فاهم ازاى بس اللى انا فاهمه وعارفه ان انا عاوز انام مرة واصحى الاقينى فى بلد غير دى
تحياتى
Posted by: mahmoud mahmoud | 19 March 2008
آلو آلوووو .. مختار انت كويّس؟
Posted by: زمان الوصل | 30 March 2008
زمان الوصل:
الحمد لله
أصل أنا نقلت شغل جديد من أول مارس، وقعدت فترة طويلة مشغول بنقل ملكية العربية والرخصة . مش هاحكيلك على قرف وروتين الحكومة والمرور، المهم أنا آخر ما زهقت اضطريت استعمل النفوذ والسلطة. ونفسي أفهم ليه التأمينات تقفل يوم السبت؟؟؟
ما علينا
ناقص بقي رخصة القيادة، ربنا يقدرنى وأدفع الرشوة المستحقة عشان أطلع الرخصة! آمين
المهم أنا طول الشهر المنقضى ده دخلت النت حوالى تلات أربع مرات عشان أخلص شغل في السريع. بس انشاء الله الدنيا هتتظبط من بكره والضغط يخف شوية.
لكن أنا كويس الحمد لله وهارجع استعمل نت تانى. أشكرك على سؤالك وربنا يديم المعروف يا فندم
Posted by: mukhtar | 30 March 2008
انا ملاحظ ان اغلب التعليقات تتضمن في جنباتها ريحة البطاطس المحمرة والفول والبتنجان المخلل والعدس وشربتة ... انا بصراحة جعت من البوست ده
بيتهيألي ان الموضوع اساسا كن عن الكتب مش كدة ؟؟؟؟
انا عن نفسي هادور علي كتاب( التاريخ المفقود ) .... لان موضوعه شاددني
علي فكرة عايز اقولكم علي حاجة .... الانترنت دلوقت خلى كل الكتب ببلاش ... يعني انا اخوي مثلا عامل مكتبة عملاقة من صفحات الويب والـبي دي اف .... دة منزل كتاب ملفات السويس بتاع هيكل هو وكتاب سنوات الغليان من علي النت !!!!! تصورو :)ـ ومن غير ما يدفع ولا مليم
يعني خلاص ... مبقتش اسعار الكتب مشكلة
الدور والباقي ع الزيت والبتنجان
ناجي العلي 2000
Posted by: ناجي العلي 2000 | 01 April 2008
والله يا "مختار" براوه عليك موضوع السواقه ده .. ده يدلّ على شجاعه حقيقيه :) و عقبال ما نبارك لك ع الرخصه
الحقيقه موضوع أجازة السبت ده له ميزه و له عيب .. إنّه بيخلّى الناس كلّها تاخد أجازه مع بعض و دى فكره وجيهه و فى نفس الوقت بيفضّى الشوارع شويه يوم السبت .. لكن على الجانب الآخر بيدفع الناس اللىّ محتاجه تتعامل مع مصلحه حكوميه بتاخد السبت إجازه إنّها تاخد أجازه مخصوص من شغلها عشان تعرف تخلّص مصالحها .. و الحل الأفضل يكون فيه ورديات عمل فى المصالح دى لحد ما يفعّلوا الحكومه الذكيه يعطينا و يعطيك ربّنا طولة العمر :)
مبروك الشغل الجديد و بالتوفيق إن شاء الله ..
Posted by: زمان الوصل | 01 April 2008
http://www.youtube.com/watch?v=ZKnsr6vtI8E
Posted by: Mr.Mad | 02 April 2008
يعني انا اخوي مثلا عامل مكتبة عملاقة من صفحات الويب والـبي دي اف .... دة منزل كتاب ملفات السويس بتاع هيكل هو وكتاب سنوات الغليان من علي النت !!!!! تصورو :)ـ ومن غير ما يدفع ولا مليم
يعني خلاص ...
يا اخ كتب هيكل كلها على الانترنت ما عدا كتابين راسهم و الف سيف مش عايزين يحطوهم ع النت و هما
حرب الخليج أوهام القوة و النصر ، و ملفات السويس اللى انت بتتكلم عنه و بتقول انه موجود ، لو موجود صحيح حط الرابط بتاعه هنا لاننا قلبنا النت عاليه واطيه ما لاقيناش له اى اثر
اقول لك السبب فى اختفاء الكتابين : الكتاب الاول لانه بيكشف فضائح دول الخليج ، و الثانى لانه بيبرأ ساحة الزعيم الراحل عبد الناصر من افتراءات الاخوانجية و بيكشف مؤامراتهم و مؤامرات العرش السعودى
Posted by: samy | 14 June 2008
و خصوصا كتابه ( حرب الخليج أوهام القوة و النصر ) غايظهم جدا و يبدو انه هو السبب فى السفالات السعودية المتواصلة على الرجل و اتهامه بالمغالطة و الناصرية و التزوير و الكذب و التحيز و الافتقار للحيادية ، بالاضافة الى اتهامه بالخرف ، و انبرت الاقلام المشتراة و اصحاب الذمم الواسعة و وضعوا نحو أربعة كتب فى هجاء هيكل من أجل هذا الكتاب بالخصوص ألا و هى :
أوهام هيكل وحقائق حرب الخليج - تأليف: عبد العظيم رمضان
زيارة لبيت العنكبوت - نقض لبنيان كتاب هيكل حرب الخليج أوهام القوة والنصر - تأليف :عبد الله حمد محارب
تفكيك هيكل- تأليف : سيار الجميل
Posted by: samy | 14 June 2008