« 2008-02 | HomePage | 2008-04 »
07 March 2008
كتب جديدة
ولو إن أنا مستسخف مسألة عرض كتب جديدة فى المدونة فى ظل الحالة الاقتصادية بتاعتنا إنما مش شرط يعنى اللى هيقرأ الكلام ده يشترى الكتب أو حتى يخطط لشرائها مستقبلا، كفاية إننا نعرف الموجود والإصدارات والمجالات اللى بتتناولها. طبعا الحديد قرّب يوصل لست الآف جنيه، وطن الأسمنت قرّب على خمسمية. أنا شخصيا عندى بداية اكتئاب بسبب غلاء الأسعار غير المبرر والجنونى ولسة باسأل نفسى: الناس فى مصر بيعيشوا إزاى؟؟؟ كيلو العدس – العدس اللى هو العدس اللى هو وجبة مفيدة جدا وبياكلوها الفقراء فى مصر – وصل سعره إلى تسعة جنيه. أذكر إنه من حوالى خمس شهور كان بخمسة جنيه.
تقريبا نوع الخضار الوحيد اللى تمنه معقول هو البطاطس، والحمد لله إن لها كذا طريقة فى الأكل عشان متبقاش معتمدة كليا على الزيت اللى تمنه انهاردة يكسر العشرة جنيه مرتاح. ممكن حضرتك تاكلها مسلوق واهو باردو حفاظ على الصحة بدل حريقة الزيت اللى إنت عايم فيها دي.
خلينا فى الكتب الجديدة عشان ألاقى مهرب من الاكتئاب.
---------------------------
تاريخ مفقود
دار نهضة مصر العريقة هتصدر فى الأسواق يوم 9 مارس ترجمتها لكتاب
Lost History
للكاتب الأمريكى مايكل هاميلتون مورجان، وهو مؤسس ورئيس مؤسسة غير ربحية اسمها
New Foundations for Peace
الكتاب صادر فى نسخته الإنجليزية عن ناشيونال جيوجرافيك، وانشاء الله يكون فى ندوة عن الكتاب فى قصر المانسترلى بمنيل الروضة يوم السبت السابعة مساء. الدخول للدعوات الخاصة فقط. الكاتب هيحضر ومعاه السيد ياسين الكاتب والمحلل السياسى.
أنا لسة يادوب ماسك النسخة انهاردة، المقدمة حلوة وموضوعية ومشجعة جدا لاستكمال الكتاب. هانقل هنا فقرة بسيطة ممكن تكون دالّة جدا على محتوى الكتاب:
ومعظم الأمريكيين بما فيهم الأمريكيون المسلمون وحتى عدد كبير من المسلمين حول العالم لا يعرفون سوى قشور التاريخ الإسلامى أى "أنهم كانوا من العظماء فى يوم من الأيام وأنهم اخترعوا علم الحساب ثم سقطوا فى مستنقعات التأخر". كما أن معظم الغربيين قد تلقن أن جذور المجد الغربى تعود إلى أيام الرومان والإغريق وأنه بعد سبات دام ألف عام بين مجاهل عصور الظلام، حدثت المعجزة واستيقظت أوروبا لستعيد صلاتها بأصولها الرومانية والإغريقية... أما الإسهامات الفكرية للعرب والفرس والهنود والصينيين والأفارقة وآخرين فى العالم الإسلامى فقد اختزلت واقتصرت على الحواشى المتناثرة هنا وهناك.
الكتاب يهدف إلى الوصول إلى القارئ العادى، ولا يزعم أنه سيلم بكل تفاصيل الحضارة الإسلامية ولا بالكلام عن كل العلماء.
المفروض إن الكاتب هيكون ضيف برنامج العاشرة مساء يوم السبت.
الكتاب فى طبعة فاخرة، وغلاف مقوى، 301 صفحة قطع متوسط.
الكتاب بخمسين جنيه، للّى مش ناوى يشترى زيت ولا عدس فى شهر مارس.
-------------------------
إمبارح لمحت كتاب التنوير الآتى من الشرق: اللقاء بين الفكر الأسيوى والفكر الغربى.
صادر عن عالم المعرفة، الكويت. بأربعة جنيه طبعا.
الكتاب صادر فى ديسمبر 2007، ورقمه 346 فى السلسلة دى.
الكتاب صادر عن دار روتليدج 1997 وعنوانه الأصلى
Oriental Enlightenment
مش هعرف أقرأ الكتاب اليومين دول لكن موضوعه جذاب عموما يعنى. اشتروه وإذا طلع مش حلو، اشترى إزازرة زيت وحمّر شوية بطاطس.
ورق الكتب بيشرب الزيت كويس.
----------------------------
أفضلية الديمقراطية
الكتاب اللى بدأت أراجع ترجمته إلى العربية من كام يوم هو كتاب
The Democracy Advantage
المفروض إن المراجعة مش هتخلص قبل شهرين ونصف وأنا لسة مش عارف مين الجهة اللى عايزة الكتاب وهل هيتنشر فى مصر ولا لأ. غريبة مش كده؟ والأغرب إن اسمى مش هينزل عليه كمراجع!!! لكن ولا يهمنى. إحنا بنشجع الثقافة، وخدّامين العلم والعلماء والمناخ التقدمى النهضوى. وسمّعنى النشيد الوطنى لحمورية مصر العربية.
ما علينا
الكتاب حوالى 300 صفحة فى نسخته الإنجليزية، اشترك فى تأليفه ثلاثة مؤلفين، مش فاكر ولا إسم فيهم وفى نفس الوقت مكسّل أفتح الملف اللى فيه الكتاب، ومكسّل أعمل رابط للكتاب على أمازون.
فكرة الكتاب باختصار مرتكزة على: أفضلية الديمقراطية كنظام للحكم على الأوتوقراطية. والكتاب بيعرض فكرة تقليدية تخص الدول النامية ونظام الحكم الصالح لها. الفكرة دى بتقول إن الدول الفقيرة اللى لسة محققة استقلالها وعايزة تحقق نمو اقتصادى، الأنسب لها أن تخضع لنظام حكم شمولى أو أوتوقراطى يقدر يحشد طاقات البلد ويتخذ قرارات سريعة ومؤثرة من غير شوشرة ونقاشات تعطل عجلة التنمية اللى بيزقها الحاكم المطلق بقوة شخصيته وحمورية أهله.
وإن لو جينا فى المجتمعات المطحونة دي وحبينا نتكلم عن الديمقراطية كهدف أول وأسمى وأوجب للتحقيق أولا فالنتيجة هتكون إن الناس مش هيلاقو أي تقدم ولا نمو اقتصادى وهيفضلوا يهتموا برفاهيات زي الانتخابات مثلا وتأسيس آليات لمحاسبة المسئولين. وبالتالى فمش هينفع نقلب هرم ماسلو القلبة السوده دي.
التنمية الاقتصادية أولا ثم ندوّر بقى على الديمقراطية، وأصلا بيقولك ان التنمية هتجيب الديمقراطية تلقائيا كده.
المؤلفين بقى بيعترضوا على وجهة النظر دى وبيقولك لأ، والأرقام بتثبت إن لا التنمية حصلت ولا الديمقراطية رعرعت فى المناطق الخرا اللى زي مصر مثلا. والمطلوب إن العالم الحر المتقدم يزرع الديمقراطية الأول في المناطق المقرفة دى أولا وهو ده اللى هيجيب التنمية الاقتصادية.
البيضة والفرخة بقى وكده. آه بمناسبة البيض، بيقولك إن كيلو الفراخ البيضا اللي هي بتاعة المزارع، الفراخ العيانة دي اللى بتضرب حقن ومنشطات جنسية بالعبيط، بيقولك الكيلو فيها واقف بخماشر جنيه.
أكيد موضوع تنمية ولاّ ديموقراطية ده شائك بما فيه الكفاية عشان نفكّر فيه، ونقرأ عنه بما إننا متعاصين فى القرف ده، وجزء لا يتجزأ من البلدان اللى ضايعة من ناحية الاقتصاد والديمقراطية.
وسمعت مؤخرا إن جمال طلع مشارك عصام الحضرى فى حراسة الأهلى والمنتخب، وأنه الأهلى هيصدر عفو عنه قريبا، وبيقولك هينزل مرسوم جمهورى إن محدش يشوط جامد على عصام، وإن الحكم يصبر عليه شوية لما يلقف الكورة ويتمرغ ع الأرض ويسيبه يشوط ضربة المرمى براحته.
موضوع عصام ده باردو ممكن ينفع هامش للكتاب اللى أنا باراجعه – هو وموضوع البيض طبعا اللى الكارتونة فيه تقف بخماشر جنيه باردو.
16:00 Posted in Books | Permalink | Comments (14) | Email this | Tags: New Books