« إحنا مش جوه الجلابية - وده المهم | HomePage | مقالتين لفيسك وأفنري »
08 April 2008
الديناصور يبيض ولا يشارك فى الإضراب
يوم الإضراب تابعت برنامج ما وراء الخبر على الجزيرة ، مش عشان أنا بحب أتابع التحليلات الإخبارية لكن عشان عايز أعرف الإعلام هيتناول الموضوع إزاي وهل توقعاتي منطقية ولا لأ.
المهم البرنامج جاب جورج إسحاق ، وواحد اسمه طارق حسن تقريبا نايب رئيس جريمة الأهرام اليومية القاهرية ، وطبعا عصام العريان.
من الكلام اللي قاله طارق حسن الآتى:
الاضراب فشل بكل المقاييس لأسباب كتيرة ومنها عزوف الأحزاب الرئيسية عن المشاركة فيه زي الحزب الوطنى الديمقراطي.
أه والنعمة قال كده... لدرجة إن أم سيف ماستحملتش وقعدت تقول: يا حمار يا غبي يا متخلف ... إنت حمان يا حمان!!؟؟؟
بس ذكى جدا الأخ طارق الحقيقة، إذ كيف يتخيل أيتها كائن على وجه البسيطة أن ينجح إضراب أو مظاهرة ضد الفساد وغلاء الأسعار وانخفاض الأجور دون أن يشارك فيها ويباركها الحزب الوطني الديموقراطي؟؟؟
وقال ردا على سؤال بخصوص الاعتقالات:
يا سيدتى لا يوجد في مصر شئ اسمه اعتقال، إنما يوجد تطبيق للقانون، فماذا تفعل السلطات حينما يتم خرق القانون؟؟
أنا ماليش دعوة ، هو اللي كان بيحاول يتكلم لغة فصحى.
جاتها نكد اللي عايزه خلف، يا أستاذ طارق.
بجد مش معقول الصفار والبياض ده كله. وأنا اللي كنت متخيل إن الديناصور كائن خرافي، أو أنه انقرض تماما، لكن طبعا أنا أعرف كويس جدا إن الديناصور يبيض ولا يلد.
09:40 Posted in Politics | Permalink | Comments (9) | Email this | Tags: إضراب
Comments
ههههههههههههههههههههه
ايوة يا مختار شفته
ده انا وقعت على ضهري من الضحك
لا وشفته وهو بيقول ثم ان عمال المحلة انتظموا في شغلهم ولا عملوا اضراب ولا حاجة
هاهاهاهااااي
بس لعلمك
دي مؤامرة من قناة الجزيرة على سمعة مصر
جابت واحد من دار المعاقين ذهنيا وادعت انه تبع الاهرام
Posted by: نوارة | 08 April 2008
loooooooooooooooooooooooooooooooooooool
العنوان لوحده فطسني من الضحك
والله الواحد بيقرا الاخبار من هنا و يتغم لكن يعديله على كام مدونة يتشرح قلبه
بجد تحفة
لكن انا مشفتش التحليل الفذ ده
نوارة اعتقد انه لو كان فعلا معاق ذهنيا كان رد بكلام منطقي اكتر من كده
ده معندوش ذهن من اساسه
و على راي المثل الذهن في العتاقي
Posted by: hafsa | 08 April 2008
الا معلش للجهل
مين طارق حسن ده
عشان انا استفزيت
؟؟؟؟؟
Posted by: la3lahakhier | 08 April 2008
هذا الكائن يتغذى على الاسمنت، وهو في تكوينه يشبه العنكبوت..
ديناصور مين ياعم بس..ده الدرفيل يا باشا..
Posted by: Ahmed Nasr | 09 April 2008
نوارة:
ساعات باحس إن الناس اللي من النوعية دي هي عورة النظام، مش مجرد ورقة التوت اللي بتقع فالعورة تظهر.
بجد كان كائن بشع وكلامه يجعل المستمع أمام أمرين لا ثالث لهما:
يا إما الراجل ده ذمته واسعة جدا جدا لدرجة أنه بيكدب علي نفسه
يا إما عنده خلل عقلي صرف يسمح له أنه يفكر بهذا اللامنطق
------------------------------
حفصة:
هههههه
والله كويس انك مشفتيش،
تخيلي بيقولك مصر مفيهاش اعتقال، وإن الحزب الوطني كان لازم يشارك عشان نضمن نجاح الاضراب.
خلل خلل خلل
------------------------
لعله خير:
ده تقريبا نائب رئيس تحرير جريدة الأهرام.
المعرفة ليست بالضرورة مفيدة خصوصا إننا معانا حالة منخوليا زي الأستاذ طارق كده
---------------------------------
أحمد نصر:
لأ أنا خمّنت أنه بيضة ديناصور، مش الديناصور نفسه. مانا عارف ان الديناصور انقرض.
ماظنش أنه يكون درفيل أبدا، لأن الدرفيل عنده قدرة محدودة علي التواصل مع البشر، وده مفيش عنده قدرة علي التواصل نهائيا
:)))
Posted by: mukhtar | 09 April 2008
يبدو إن فى دورات إعداد وتجهيز للأشخاص اللي بيتم تعينهم فى مناصب هامة فى البلد بيتعلموا منها يقولوا إيه فى مواقف معينة علشان كده ممكن تجد إن الهطل اللي الراجل ده قاله يقوله مسؤل آخر فى وقت آخر فى موقف مشابه. سفير مصر فى أمريكا قال كلام مشابه رداً على سؤال وُجه له فى فيلم تسجيلى أعدته إحدى المحطات الأمريكية بعد 11 سبتمبر. المذيع قال له إن مصر بتعذب الإسلاميين وده بيشجع الإرهاب كان رد السفير بالنفى طبعاً وقاله لأ مصر بتتعامل معهم بالقانون لكنها بتطبق معهم الحد الأقصى للقانون. المذيع رد عليه بإبتسامة وقال له طبيعى إنك تكون بتعمل بالحقل الدبلوماسي
Posted by: مدحت | 10 April 2008
مدحت:
هههههه
والله رد المذيع حلو أوي
Posted by: mukhtar | 10 April 2008
أفهم من كلام السيد نائب رئيس تحرير جريدة الأهرام أن الحزبوطني -قسم تاني عليه- حيشترك في الإضراب اللي جاي؟ وإن الحزبوطني حيشترك في الإضرابات عموماً ضد حكومة هي محسوبة عليه ،رغم إن جرايد الحزبوطني هي أكتر من "بيردح" للوزراء بسبب وبدون لتسول تعاطف الشعب وجيوب الزباين؟
تصريحه بيفكرني بسقطة شهيرة جداً لحاكم أحد الولايات الأمريكية بيتكلم فيها عن انخفاض مستوى الجريمة عنده .. قال لا فوض فوه : باستثناء جرائم القتل فإن مستوى الجريمة عندنا هو الأقل في الولايات المتحدة!
نورت البلوج سبيس ..
Posted by: قلم جاف | 11 April 2008
مش الكائن ده هو نفسه اللى طلع مع منى الشاذلي في العاشرة مساءا
في حلقة لتعديلات الدستورية
وقالها انتى ليه لابسة اسود
وليه صباعك مفيهوش حبر فسفوري
ده عايز الواد بتاع ميلودي يسيب عليه 3 كلاب ويرجعه بلباسه
Posted by: che_wildwing | 13 April 2008