« مقالتين لفيسك وأفنري | HomePage | علاوة فإضراب جهيض فزيادة فى الأسعار فخراب بيوت مستعجل »
14 April 2008
بِيض يا تيييييييت
بيقولك بقي إن إحنا بلد جامدة جدا، ومش أي حد يقدر يدوس لنا على ديل، والدليل أهو من صحيفة الأهرام لهذا اليوم:
الخارجية: معاملة الشخصيات البريطانية بالمثل بعد تفتيش البابا
علي جانب آخر, أعرب المجلس (الشوري يعني) عن رفضه واستنكاره التام لإجراءات التفتيش غير المبررة التي تمت في مطار هيثرو بلندن مع قداسة البابا شنودة خلال زيارته الأخيرة لبريطانيا.
وأكدت السفيرة وفاء نسيم مساعد وزير الخارجية أن الوزارة طلبت من الأجهزة الأمنية المصرية القائمة علي تنظيم حركة الركاب في منافذ الدخول والخروج من وإلي مصر تطبيق المعاملة بالمثل علي جميع الشخصيات البريطانية.وقال النواب: إن قداسة البابا رمز وطني, وإن أي إجراءات من شأنها المساس برموز مصر الدينية تكون مرفوضة.وطالب رئيس المجلس بتقديم مذكرة تفصيلية حول هذه الواقعة من جانب الحكومة البريطانية, وتقديمها اعتذارا رسميا في هذا الشأن.
طبعا أنا متخيل مين هي الشخصيات البريطاوية اللي هتتعامل بالمثل في مطار القاهرة، عندك مثلا جورج جالاوي، وعندك مثلا مثلا روبرت فيسك.
الأهم من كده بقي إن الشاب اللي انضرب فى قناة السويس من البارجة الأمريكية المسالمة اللي كانت متلئحة هناك – الشاب ده مش رمز وطنى ، عشان بس ميجيش حد من القرّاء وزوار المدونة اللي قلوبهم مليانة خبث وسواد منكن يعني يجي في خيالهم سؤال إشمعنى؟؟؟
كله إلا الرموز الوطنية يا إنجلترا. والشاب السويسي القتيل ده لو كان رمز وطنى كان ماشي، إنما هو مش رمز. وبعدين ده انضرب بالرصاص ولم يغرق في البحر المتوسط ولا الأحمر، إنما انضرب في مسطح مائي بينهما لذلك لم يصدر شيخ الأزهر صك الشهادة ودخول الجنة للفقيد.
وعلى رأي القائل الذي قال:
يا عم يعني همه هيجرّوا بوش من الكرافتة ويحبسوه فى قفص في لاظوغلي ويقولوله : بِيض يا (تيييييييييييت) !!!؟؟
ماظنش يا نجم - يعيش الرموز الوطنية
10:10 Posted in Articles Reviewed | Permalink | Comments (11) | Email this | Tags: Foreign Affairs
Comments
عزيزى مختار
كان فيه مقاله فى مدونة سيزيف مصرى عن محاولة لمنع التميز الدينى ياريت تقرا المدونه
وتكتب تعليق
Posted by: maged | 14 April 2008
بِيض يا تيييييييت
يعنى ايه الكلمة دى؟؟
Posted by: monir | 14 April 2008
بمناسبة قتيل البارجة الامريكية .. سؤال بسيط مدوخني جدا من ساعتها
السلطات المصرية قالت مانقدرش نعاقب القاتل عشان البارجة عسكرية .. مع انها مسجلة بانها سفينة تجارية وطاقمها بحارة مدنيين ودي مش اول مرة تدخل السويس .. وفي كل مرة بيتم تسجيلها على انها تجارية ومش عسكرية .. انما المرة دي بيقولوا كانت حمولة عسكرية ؟؟؟؟؟
يعني ايه؟؟ وازاي محدش واخد باله من التضارب المهبب ده ؟؟؟؟؟؟
المشكلة مش في ان مواطن مصري (قيادة دينية في بلاده او رمز زي ما بيقولوا) تعرض لمعاملة سيئة في مطار ببلد أخرى .. انما ليه محدش بيتكلم عن المصريين اللي بيتبهدلوا في بلدهم يعني على ايد الاجانب .. سواء ضرب وتطاول واعتداء من الاشقاء العرب ولا قتل لظباط الحدود على ايدين مش عارف مين من اسرائيل للحمساوية ..ولحد البارجة التجارية العسكرية الامريكية البريئة ؟؟؟؟!!؟!؟!؟!؟!؟!!؟
Posted by: bluestone | 15 April 2008
يعني اية بيض يل تيت؟؟ مش فاهمه؟
وعمومابالنسبه لمعامله البابا كلنا في الهم شرق
ومش معني اننا بنتبهدل جوه كمان نسلطح لهم قفانا برة
وان كان نتيجه طبيعيه اكيد
لكن علي الاقل لو الموقف حصل العكس كانت الدنيا انقلبت
الفكرة ان اصلا مفيش شخصيه بريطاويه علي رأيك تعادل البابا
الا لو استنينا حضور قس انجيلي يترأس كنائس انجيليه يساوي نفس مكانه البابا شنوده
الي ان يحصل ده يبقا الناس عملوا اللي عليهم والقس البريطاوي هو الل مجاش
والناس عداهم العيب وازح
تحياتي
Posted by: بنت القمر | 15 April 2008
عزيزى مختار العزيزى
انا لما قريت مقالتك ودى كانت اول مرة اشوف مدونتك كنت تصفحت بعض المواضيع القديمه عندك ولقيت جملة (أنا مسلم، أولست أكفر بالمسيحية وبالكتاب المقدس؟!
وجرجس مسيحي أوليس يكفر بالقرآن وبمحمد عليه الصلاة والسلام ؟!
أنا بالضرورة كافر بكل الأديان الأخري).
فى مدونةالمسلم كافر وكذا المسيحي 2006
كنت اتسائل فقط اولسنا نؤمن نحن المسلمين بجميع الاديان السابقه؟
لو لم تكن كذلك فانت لا تعرف الاسلام جيدا
اسف يا عزيزى لتغيير الموضوع والتعليق على موضوع اخر
Posted by: radwan | 16 April 2008
هارد في السريع عشان الدنيا متكربسة فوق دماغي
بيض يا تييييت: جملة قالها صديق ، تريقة علي الناس اللي زعلانة علي موت الشاب السويسي بنيران الأمريكان وبينتقدوا موقف دولتنا العظيمة ووزير الخارجية، فيعني صديقي ده بيقول:
إنتوا فاكرين يعني إن أبو الغيط مثلا هيجيب بوش ويحبسه في قفص الفراخ ويقوله بيض يا عرص!!!!
كلمة "بيض" هنا فعل مش اسم، وانا طبعا مسحت كلمة عرص عشان الرقابة الذاتية .
------------------
رضوان:
أنا طبعا لا أدعي ولا أظن إني أعرف الاسلام جيدا، أنا ممكن أدعي بس إني أعرف بعض جوانب الاسلام جيدا. ومن هذه الجوانب مسألة العقيدة وموقف القرآن من الكتاب المقدس، اللي أعرفه ومؤمن بيه إن الكتاب المقدس الموجود حاليا فيه أجزاء محرّفة ، لكن المسيحية أصلا دين سماوي وجاءت من ذات المصدر زي الاسلام.
أنا مؤمن بالديانة المسيحية إنها من عند ربنا زي أي رسالة سماوية لكن كمان أنا كافر بمعتقدات المسيحية دلوقتي زي الصلب والفداء ، وكون المسيح ابن الرب أو الرب أو أقنوم من ضمن ثلاثة يجمعهم التوحيد.
بس ده باختصار.
واسف للجميع علي التأخير في الردود بسبب زحمة الشغل
Posted by: mukhtar | 16 April 2008
استاذ مختار ازي حضرتك
مبدئيا انا متاسفه جدا اني اقتحمت التعليقات عندك بس اعذرني انا لم اصل الي ايميلك فقلت مافيش طريقه غير التعليقات
انا احب اسجل اعجابي الشديد بافكار حضرتك وسهوله وعمق كلماتك وطريقتك في طرح المواضيع لذلك انا يشرفني ان ادعو حضرتك لتشارك معانا في حلمنا وهو مدونات مصريه للجيب لننشر بعض من بوستاتك المتميزه انا هاكتب الدعوه هنا وبعتذر مره اخري علي اقتحامي
---------------------
السلام عليكم ورحمة الله وبركاته ،،،
احب اعرفكوا بنفسي انا مدونة زميله لكم اسمي ايناس لطفي
مدونتي اسمها عايزه اتكلم واسمي المستعار عليها دنيا محيراني www.3azatklm.blogspot.com
و يشرفني ان اكون ضمن فريق مدونات مصريه للجيب وهي فكرتها ببساطه انها ستقوم ان شاء الله بنشر كتابات المدونينين المصريين في كتاب يجمعهم بالمشاركه مع دار اكتب للنشر
ويشرفني ان ندعوا كل مدون مصري للمشاركه معنا ويسعدنا اننا نشاركه في خروج كلماته للنور
وللمشاركه ارجو كتابه مايلي علي الايميل المرسل لنا :
1- عنوان الميل تصنيف البوستات الخاصه بك التي تريد ان تشارك بها ادبي – اجتماعي – سياسي
او انك لاتريد تصنيف بوستاتك يكتب اسم مدونتك ولكن يفضل التصنيف لسهوله الفرز و التحديد
2-بياناتك الشخصيه في الميل هكذا :
*الاسم :------- * هل ترغب في نشره (نعم / لا )-----
*الاسم المستعار: ------
*اسم المدونة : -----
*عنوان المدونه :www -----
*الايميل الشخصي : ------
*رقم الموبايل :-----(يفضل لسهوله الوصول اليك مع التاكيد علي سره البيانات وعدم تدوالها)
*تليفون ارضي : ---------
*تاريخ الميلاد: ------
*نعم اوافق علي النشر----
*اهم نقطه : لينكات البوستات المختاره مع كتابتها ضروري جدا لا تكتفي بوضع اللينكات فقط ارجو كتابتها
---------------------------------------------------------------
هنا ايميلات باقي الفريق وهما
احمد المهني ahmed_mahana_me@yahoo.com
احمد البوهي ahmed.elbohy@yahoo.com
ايناس لطفي enas_lotfy_4@hotmail.com
عنوان الجروب علي الفيس بوك http://www.facebook.com/group.php?gid=13820826455
ان اردت الاستفسار عن اي شيء يرجوا المراسله وكتابه كلمه استفسار في عنوان الميل
ليرد عليك اعضاء المجموعه
وللعلم فقد تم تقليص المده المفتوحه للعدد الاول
فاخر وقت لتلقى الاعمال للنشر بالعدد الاول هو 22/4/2008 اى فى خلال 6 ايام واى عمل بعد تلك الفتره يرحل للعدد الثانى وما بعده
---------------------
وفي النهايه ادعو كل مدون مصري ان يثق في كلماته و يشارك معنا في ان تخرج افكاره وكلماته في كتاب مطبوع ويساهم معنا في نشر الفكره ودعواه الاخرين للمشاركه معنا
مع تمنياتي بالتوفيق دائما
تحياتي
ايناس لطفي
Posted by: دنيا محيراني | 18 April 2008
عارف يامختار انا بتخيل انهم لو عملوا كده بجد ابن المجنونه يعملها ويبيض
ومش عارف موقفنا هايبقى ايه ساعتها
Posted by: radwan | 18 April 2008
عزيزى مختار بما انك سمحت لى مرة انى اكتب تعليق فى غير عنوان المدونه اسمحلى اعملها مرة كمان ولو يضايقك ابقى نبهنى
معلش اصلى انا متابع جديد للمدونه ومش باحب اسيب حاجه غيظانى
انت كتبت فى مدونه سنة 2006 طبعا اللحية فرض وبالدليل كمان
كنت سيادتك بتعترض على توقيت الكتابه عن موضوع زى كده دلوقتى
وهل لاومر الدين ونواهيه توقيت؟
الحقيقه الراجل اللى انت كنت بترد عليه ماتكلمش غلط ولا حاجه بس عشان سيادتك مهتم بحاجات تانيه شفت انه مش وقته
بس أكيد فيه ناس تانيه قرت المدونه واستفادت برايه
وبرضه فيه ناس كتير شايفه ان الاصلاح يبدا أولا باصلاح انفسنا وأخلاقنا دينيا
صلى الله عليه وسلم- : " إذا تبايعتم بالعينة ، وأخذتم أذناب البقر ، ورضيتم بالزرع ، وتركتم الجهاد ، سلط الله عليكم ذلاً لا ينزعه حتى ترجعوا إلى دينكم "
اذا امن احد بهذا الكلام وقرر أن يبدأ بنفسه ومن حوله فى اتباع أوامر الله عسى أن يكون بعد عسر يسر
لا أفهم متى يكون هناك توقيت للكلام فى أى امر من أمور الدين
ضع فى الحسبان انا غير ملتحى
عذرا اخى مختار
مجرد رأى
Posted by: radwan | 18 April 2008
طبعا انا مش هدافع عن انجلترا
بس بصراحة ليه ذكرى حلوة فى مطار هيثرو بالذات
هقولهالك بسرعة وبعدين اعلق
كان قبل منى اتنين اجانب ستات اتفتشوا فعلا بعنف وطلب منهم يقلعوا الجواكت ولما الجهاز صفر اتعمل تفتيش ذاتى وانا حضرتك محجبة ورقم 3 بعدهم ومخى شغال ازاى بقى انا هتبهدل دلوقتى والجاكت تحتيه بلوزة بنص كوم ويا فضيحتك يا توتا فى بلاد الفرنجة وكده واول ما وصلت سألنى سؤال واحد بابتسامة واسعة انتى لابسة حاجة فيها معادن قلتله لا قالى اتفضلى
احيانا بيكون فى تعنت واحيانا لا
لكن لو فى تعنت يبقى لازم يكون فى رد فعل ايجابى
ولو هيكون فى رد فعل ايجابى ما ينفعش يكون جزئى لازم يكون كلى على كل حاجة مش المفروض نهاجم الكيل بمكيالين واحنا اول ناس بنعمل كده لما نكون رخاص فى نظر حكومتنا تفتكر فى نظر اى حد تانى هنساوى ايه بقى
يبقى مين الغلطان الحكومة ولا المطار ولا احنا
وسلامات بقى يا مختار ولك وحشة
Posted by: tota | 21 April 2008
الاستاذ مختار
لأ وايــه خد الخبر ده
وزير الخارجية المصري تحاشي النزول في مطار هيثرو والعبور منه
فراح علي ايطاليا
وهذا رد علي معاملة البابا
شنودة
اقولو كلمة واحد
"ياجامد يا مقاطع انتا " !
تحياتي موضوع جميل
ومدونتك رائعه فعلا
تحياتي
ابن ناصر
Posted by: ابـن نـاصر | 24 April 2008