« علاوة فإضراب جهيض فزيادة فى الأسعار فخراب بيوت مستعجل | HomePage | عندما يتحول الفيس بوك إلي تشويه لمؤخرة الوطن »
06 May 2008
بطريركية عمرو دياب وأيقونة مبارك الأب
ممكن يكون مفهوم شوية إن في عام 1996 يطلع عمرو ويغني لمبارك،
المناخ ساعتها كان جايب علي كده جدا، وخصوصا بعد حادث أديس أبابا لدرجة إن في كتاب نازل تبع الهيئة العامة للكتاب مجمعين فيه مقالات لكبار الكتاب والمفكرين المخضرمين بيقول إن ربنا حمي مصر والأمة العربية بنجاة مبارك مع ذكر لمآثره ومناقبه.
إنما في 2008 كمان ولسة بتغنيله!!!!؟ وباردو جايبين عيل رضيع وهو بيشيله ويهشّكه، عشان لازم يركز في وعي المشاهد إنه أبونا كلنا، وطاعة الوالد تجلب رضا الرب.
يا جبروتك يا عمرو إنت وشريف صبري
17:00 Posted in Philosophy | Permalink | Comments (4) | Email this | Tags: Absolutism, Amr Diab, Mubarak's Song
Comments
متشكرين خالص
علي الاغنيه التحفه
واعتقد ان عمر دياب مش ناعي هم بنزين عربيته.. ولا تمن سجايره حيث انه راجل نشيط وبياخدها مشي ومش مدخن عشان بيخاف علي صحته
بس هو الحقيقه هناك سؤال يقض مضجعي
:(والي هو
الاغاني العاطفيه اهي بتتغني في الفنادق والافراح وبيكسبوا منها يعني لها مردود لكن انت واحد مننا دي بيكسبوا منها ازاي؟؟
لا تتغني في فرح
ولا اي فضائيه ممكن تشتريها غير المصريه
يعني بيعملوها ليه وهل ممكن يكون مش منتظرين _عمرو وشريف_من وراها مكاسب باعتبار ان حبهم للريس ده يقين مثلا عندهم
بجد والله مش عارفه افهم النقطه دي ولا الاقيلها تفسير.. يكونوا واخدين كوبونات بنزين هديه من الرئاسه
:)))
Posted by: بنت القمر | 07 May 2008
عمرو دياب تقريبا كان من الرواد اللي غنوا لمبارك
بيقولوا ان الاغنية دي قديمة واتغنت في التمانينات...بس مش متأكد من المعلومة دي..انا مش من جيل التمانينات ولا من محبي الاستماع لعمرو دياب وجمع اغانيه التاريخية كلها..وبالطبع مش من محبي تجميع اغاني الريس
Posted by: M@RV3L | 08 May 2008
ومدحت العدل كمان
المقاول الخصوصي لتوصيل كافة الأغاني المباركية إلى المنازل
الظريف فعلاً إن الاتنين دول - مدحت وعمرو - هما اللي اشتركوا في أغنية زي رصيف نمرة خمسة ، ووقتها برضه عمرو اللي كان ملحَّنها ! ، صدق اللي قال :
ولا البحر باين في آخر مراسي ولا حد راسي منين الفرج
بخصوص كلام بنت القمر عن الفايدة المرجوة من أغنية زي دي بالنسبة لعمرو وشريف ومدحت ، فالحزب الوطني مش مؤسسة خيرية قايمة على تبرعات الأعضاء ، ده فيه رجال أعمال كتير عندهم استعداد يدفعوا كام ميت ألف جنية في سبيل الاقتراب من الرئيس والاستفادة الشديدة من القرب ده في الكتير من المعاملات الاقتصادية ، إضافة طبعاً لمساهمة التلفزيون المصري ، فتمن أغنية زي دي غناها مش هيستلزم أكتر من 24 ساعة بالنسبة لعمرو زي حفلة بيعملها مثلاً
الموضوع بيزنس ودايرة مالية بتلف حوالين نفسها
وبشكل عام عمرو مش مطلوب منه يكون صاحب موقف سياسي جاد ومش عارف إيه بس ده أكيد مش مبرر للزفت اللي هو عمله ده ، وبعيداً عن أي كلام كبير عن تزييف الوعي واستخدام الرموز الأكثر جماهيرية لترسيخ صورة معينة عن الأب الحنون وكل اللي ممكن يتقال في تحليل الأغنية وملابساتها ، بعيداً عن أي حاجة من دي .. بس أنا لما شفت الأغنية أول مرَّة حسيت بالقرف
Posted by: محمد المصـري | 08 May 2008
عمرو دياب ماشي في نفس سكة عادل إمام..
كان عادل إمام ذكياً إلى أن سلم ذقنه للصحفيين..
عمرو دياب كان ذكياً إلى أن بدأ يغني أشياءً كهذه..
كان يجب عليه أن يعي أن شريحة هائلةً من جمهوره لا تستطيح حضور حفلاته ولا دفع ثمن تذاكرها.. وأن من هؤلاء من يختلف مع النظام ويرى في عمرو دياب نفسه وحميد الشاعري وشلته رمزاً للخروج على الشللية والتزلف والنفاق..
لكنه بهذا التصرف قد خسر هذه الشريحة إلى الأبد.. وسيعي يوماً مقدار خسارته وقوتها وسيندم عليها.. الناجحون أيضاً يخطئون.. وأخطاؤهم قاتلة..
أما شريف صبري، فنار شريف صبري ولا جنة طارق نور ولا سامي عبد العزيز الذي أحترمه كأكاديمي وأحتقره كمخرج..
Posted by: قلم جاف | 09 May 2008