01 September 2008
أوكازيون رمضان
رمضان بدأ وده معناه إننا بقالنا تقريبا أسبوعين بنسمع دروس وخطب ومواعظ من ناس زينا أو أقل مننا في الفهم والثقافة والخبرة ويمكن – للسخرية - في الخلفية الدينية كمان. لكن معلش ، ماهو الغلط أصلا على اللي بيتراجع في صفوف المستمعين ويسمح لحد أن تكون له سلطة متجاوزة لإمكانياته أصلا. ودي مشكلة الموعظة والدرس: إن في حد بيقعد علي كرسي والباقيين آذان صاغية ومفيش رد وقتي ولا مساحة لاختبار كمية البيض الرهيبة اللي بتترمي علي المستمعين الواقعين تحت تأثير النقاب واللحية الكثة والبسملة والحوقلة المستمرة بسبب وبدون سبب.
المهم – زوجتي بتحفظ قرآن وتتعلم تجويد في معهد أزهري ولأن المعهد مش شغال بقاله شهر ولسة مش هيفتح غير بعد العيد اضطرت زوجتي تتابع الحفظ عند شابة عظيمة جدا من نوعية النقاب فرض و عمرو خالد مش داعية لأنه حليق ويسمح بالاختلاط إلي آخر كرتونة البيض دي المرطرطة بقالها فترة في السوق.
المهم كرتونة البيض دي فيها بيضة قديمة كلنا عارفينها وطالع دين أبونا منها، وبتفقس كل شوية خاصة موسم الفقس الرمضاني. بتقول إيه بقي: إننا نختم القرآن في ثلاث أيام وده يبقي هدف من أجل حسن استغلال الوقت لأن الوقت ده نعمة كبيرة من عند ربنا.
طبعا زوجتي تشبهني – مش بتستحمل الخرا ده خالص. فقطعت الدرس وقالتلها: ومين ده اللي عنده وقت يختم القرآن في تلات أيام، وبافتراض يعني، هو الهدف من القراءة التدبر ولاّ تكويم الحسنات بحجة استغلال الوقت؟؟؟
ردت الهانم فقالت: إن الرسول قال كده – يعني قال ممكن نختمه في تلات أيام.
ولما حكت لي زوجتي قلت: وبافتراض إن الرسول قال كده لأصحابه اللي همه أصلا أصحاب لغة عربية فصيحة وبلاغة مشهود لهم بيها، وكمان قرب اللغة المستخدمة في القرآن باللغة الحية أياميهم، فإيه دخلنا إحنا بالقصة دي؟؟؟
القرآن بالنسبة لكتير مننا عبارة عن طلاسم لأسباب كتيرة منها ضياع اللغة العربية، ومستوي الجهل المركب والثقافة المهلهلة اللي إحنا عايشين فيها وفوق كل ده التعليم الأهبل اللي عاملينله وزارة ووزير... مين فينا لما يقرأ القرآن في تلات أيام يكون طلع منه بحاجة أو حتي عرف يجمع قصة موسي وفرعون بشكل مفهوم؟!!
وطبعا النقاب فرض وبتحاول الشابة الغندورة تقنع بنت أخويا اللي عندها خماشر سنة إنها تلبس نقاب.
وبالمناسبة في شهر مارس اللي فات حضرت خطبة جمعة عظيمة لخطيب عظيم قال ان النقاب فرض وإن اللي ينكره يبقي كااااااااااااااااافر، وإن اللي مش لابساه إنما مؤمنة بأنه فرض تبقي عاصية بس.
بعد الخطبة باضحك مع واحد صاحبي علي الخرا اللي سمعناه جوه فقال لي: أه ما هو فرض طبعا... إنت كمان هتفتي في دي يا مختار!!! ومكنش بيهزر
-----------------
وزي ما كلنا عارفين اعلانات الحكومة لترشيد الاستهلاك، حيث بيطلع صوت محمود الجندي ويقولك الترشيد واحسبها صح الصح. تمشي بقي في الشارع انهاردة تلاقي كل المساجد معلقة لمبات نور زي الأفراح وليالي الطهور والحنة، طبعا ابتهاجا بشهر رمضان شهر الطاعات والعبادات والصوم والإمساك... لكن الواقع إنه شهر إسهال مش إمساك خالص.
إسهال في كل شئ – استهلاك الأكل واستهلاك المسلسلات والبرامج الفضائية البيض اللي زي أصحابها واستهلاك كهربا زيادة لاضاءة المساجد من الخارج!! إسهــــــــــال
---------------
وطالما إحنا في حالة انسحاق وتقوقع وخوف وبلادة فمفيش غير التمسك بالشكليات ويمكن حصر الخطاب الديني السائد والنقاشات الدائرة بين عموم الناس في الموضوعات الدينية بنسبة كبيرة ربما تتعدي 75 بالمئة في: الحجاب والنقاب والاختلاط واللحية وعمل المرأة.
باحاول أتخيل الحياة لو بطلنا نتكلم في الموضوعات دي لمدة عشر سنين واستبدلناها بالتركيز علي دعوة القرآن للحوار وطلب العلم والتفكر . هتبقي مصيبة طبعا لأن ممكن ينشأ جيل متحرر من الموضوعات المخللة دي وممكن نتفاجئ ونلاقي طريقة حياتنا اتغيرت لأن الخطاب والتركيز عليه اتغير في الأصل.
ويتم نقل جميع شرايط حسين يعقوب ومحمد حسان ومسعد أنور إلي متحف القلعة الحربي.
------------------
لما تيجي سيرة العلم تستشعر إن هناك احتقار بين عموم الناس للعلوم الدنيوية في مقابل العلم الشرعي والفقه إلخ. فتلاقي واحدة معاها ماجيستير في القانون الدولي تقول لواحدة بتفكر تلتحق بالجامعة بعد التعليم الثانوي التجاري، إن التعليم مفيش منه فايدة والأحسن تتعلمي علوم شرعية تنفعك.
--------------------------
ويرتبط بالكلام ده الكلام عن دفع الصدقات في أوجه جديدة ممكن تفيد المجتمع بدل من الاستسهال في شراء دستة مصاحف ووضعها في مسجد عشان تبقي رحمة ونور على فقيد العائلة.
أستاذ جامعة أزهري نصح ابن عمي بعد وفاة ابنه في حادث سيارة في إبريل الماضي أن يتبرع بالمال لشراء كتب لتجهيز مكتبة في منطقة محرومة من هذه الخدمات. ابن عمي اقتنع تماما ونفّذ النصيحة.
ليس بالخبز وحده يحيا الانسان – وده صحيح فعلا. والمجتمع مش عبارة عن ناس فقراء بس محتاجين أكل وملابس وشنطة رمضان. في ناس فقرا محتاجين يكملوا تعليمهم.
ولا حرج في اقتباس جزء من مقالة قديمة عمرها يتعدي 150 سنة لحاخام اسمه يهودا نحما... قال فيها:
ليس من شأن كل التبرعات مساعدة إخواننا، وليس من شأنها مساعدة الالاف أو المئات الذين هم في حاجة الي مساعدة أو تغيير أوضاع الفقراء والمرضي والشيوخ والعاطلين عن العمل، ولكن من الممكن أن تخدم هذه التبرعات المتعطشين للمعرفة، وسيضل الالاف من أبنائنا الطريق إذا لم تحصل مدارسهم علي الدعم"
طبعا المقالة دي مكتوبة من زمن طويل كان فيه اليهود مالهمش سعر في سوق بني البشر وكان في زعماء منهم بيحاولوا يصحوا ويصححوا الأوضاع المتردية في أمة اليهود من خلال الاهتمام بالتعليم وإحياء اللغة العبرية – باختصار كان في ناس منهم عايشين روح القرن التاسع عشر وبيحاولوا يفهموا التغيرات اللي ماشية فيه وبيتصرفوا علي أساسها.
والأسلوب ده هو اللي خلي يبقي حاجة حركة صهيونية، واهتمامات قومية لكل بلد نتيجة المد الرومانسي اللي اجتاح أوروبا مع بداية القرن التاسع عشر.
لكن في ناس بالملايين وسطنا لسة عايشة في غيبوبة الأندلس وأنها مش هترج غير لما النقاب ينتشر والمرأة تسيب التعليم والشغل للراجل عشان الطبيعة بتقول كده والتاريخ بيقول كده وعباس الضوّ حالف يمين طلاق علي كده باردو.
فإيه بقي المشكلة إننا نوجه جزء من الصدقات لإثراء مكتبة عامة ممكن يستفيد بيها عموم الناس والباحثين والطلبة إلخ؟؟؟
-------------------------
وطالما مفيش تعليم محترم ولا اعلام عليه القيمة يبقي منطقي جدا إن يكون في خلل في رؤيتنا للعالم والتاريخ ولذواتنا، ويكون في تبسيط شديد جدا لكل شئ متعلق بتاريخنا وحاضرنا، وده بيسمح للنماذج التفسيرية الهبلة إنها تنشأ وتترعرع في الجامع وحلقات تجويد القرآن وأتوبيس النقل العام والمصاطب والقهاوي.
22:40 Posted in Religion | Permalink | Comments (13) | Email this | Tags: رمضان
Comments
كل سنة وانت طيب يا مختار
موضوع جميل، بس زي انت قولت الأسهل تبقى المسائل في حاجات شكلية، حاجة مافيهاش مواجهة مع مشاكل حقيقية أو حتى مع ناس حقيقيين
Posted by: Abderrahman | 01 September 2008
كل سنة و انت طيب
و رمضان كريم
--
Posted by: عباس العبد | 02 September 2008
كل رمضان وإنت بخير
المقطع الأخير الخاص بالتعليم والإعلام هو القصة كلها
Posted by: مدحت | 02 September 2008
أظنك عارف ممكن أقول لك إيه
يسلم العقل اللى ربى
Posted by: لستُ أدرى | 02 September 2008
من المهم خدمة المجتمع ومن المهم العلم الدنيوي ومن المهم الخروج من الظلمات إلى النور ومن المهم ومن المهم ولكن الأهم منذلك كله العمل في البداية إلى الهدف والغاية من خلق الكون والبشر وليس هذا كلامي ولكنه قول الله ( وما خلقت الجن والإنس إلا ليعبدون ) وليس هذا مدعاة لنا أن نترك الدنيا ولا نتعلم العلم الدنيوي وهذا الأمر ليس دعوة جديدة إنما السنة النبوية للنبي - صلى الله عليه وسلم - هي الدعوة الصادقة لدين الوسطية وتعلم العلوم الدنيوية ولن أذكر لك أمثلة أترك الأمر لفطنتك العاقلة لتبحث بحث المثقف في تلك السنة النبوية .
وقديما قال أحد أئمة الفقه الإسلامي ( رأيك صواب يحتمل الخطأ ورأيي خطأ يحتمل الصواب ) ومن منطلق هذا المبدأ الإسلامي الرفيع والراقي فليس لك حاجة أن تكرر في مقالتك تكرار أوصافا لأحاديث بعض علماء الأمة حتى ولو اختلفت معهم لأن أدب الخلاف يلزمه حسن الرد بألفاظ لا تخرج الراد عن أدب مجتمعه ودينه .
وأخيرا لا أود أن أكون قد أثقلت عليك ولكن نهاية القول لا تكن متطرفا لا أقصى اليمين ولا أقصى اليسار فقد علمني والدي - رحمه الله - قول الإمام علي - كرم الله وجهه - ( أحبب من أحببت هونا فقد يصير عدوك يوم ما وأبغض من أبغضت هونا فقد يصير صديقك يوم ما )
ملاحظة : الإميل المذكور في مشاركتي غير وهمي وأرحب بمناقشتك في لأي وقت .
Posted by: أحمد غازي | 02 September 2008
بسم الله الرحمن الرحيم
موضوع فرضية النقاب دا محل خلاف معتبر , يعنى لا حضرتك تنكر على القائل بفرضيته ولا ينكر الاخر عليك انكارك لفرضيته , اما الاخ اللى بيقول منكر فرضيته كافر دا عايش فى الغيبوبة .
بالنسبة لحديث اتمام القران فى ثلاث دا منتزع من سياقه , يعنى الرسول لم يضعه كهدف كلن وضعه كحد ادنى للوقت الذى تتم فيه قراءة القران ولو اقل يبقى مش هاتفهم حاجة , وبالتالى اللى فاضى يخل فى تلات ايام واللى مش فاضى يخلص فى تلاتين ماحدش هايقوله حاجة , يعنى الاخت قلبت معنى الحديث رأسا على عقب .
اما بالنسبة لتلقى العلوم فتحويل العلوم الشرعية لمجرد يوتوبيات دا اكبر خطأ , يعنى العلم الشرعى لازم يصبح امر ساسى فى تشكيل افكار وهوية الامة , يعنى مانفصلش بين ممارساتنا الدنيوية وتلقى العلم الشرعى لكن نحول الدنيا لمجال تطبيق هذه العلوم , وبالتالى يحيا العلم الشرعى , وبالتالى نجد عالما فى الفيزياء او الطب او الهندسة ملم الماما كافيا بالعلم الشرعى كما نرى فى النماذج التى عاشت فى عصور سابقة .
كل عام وانتم بخير
Posted by: محمود المصرى | 02 September 2008
ههههههههه
انت متجوز واحدة شبهك يا مختار؟
وبعدين ماهو فرض!..انت هتفتي فدي كمان؟
بطلوا كفر بقى، كل واحد يصحى الصبح يكفرله كفريتين تلاتة؟
إلى جهينة وببس العصير!!
والله يا مختار..وربنا..الناس دي انقرضت من السوعدية خلاص!!
السوعدية اللي هي السوعدية خلااااص بطلت!!
احنا اللي وقعنا في الخية!!
Posted by: Ahmed Nasr | 03 September 2008
في خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:
1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:
http://www.ouregypt.us/culture/main.html
Posted by: رولا | 04 September 2008
كلامك ينطبق على مجلس الامة الكويتية
تاركين عجلة التمنية ومهتمين في
هالبنود
لماذا تعرضون فيديوات روبي على القناة الوطنية؟
يأمرون وزير التربية بمنع ملابس مهند ولميس و غيرهم
ممنوع دخول ستاراكاديمي للكويت
منعوا الحفلات
الجنس الثالث كثر بالكويت
وهكذا.... ولكن أينكم من الاسكان وتطوير المستشفيات والشوارع
أين التعليم؟؟ مناهج قديمة مدارس قديمة مدرسين مش عارفين حاجة
Posted by: يعقووبوو | 09 September 2008
كل عام أنت بخير.. وأؤمن على كل حرف قلته.. وأشاركك غضبك من كل الأشياء التي حولت رمضان إلى جحيم.. بما فيها هوجة مطربي القرآن والقنوت وشرائط وبرامج الصارخين التي تعلق إعلاناتها على بيوت الله ..
Posted by: قلم جاف | 09 September 2008
القرآن بالنسبة لكتير مننا عبارة عن طلاسم لأسباب كتيرة منها ضياع اللغة العربية، ومستوي الجهل المركب والثقافة المهلهلة اللي إحنا عايشين فيها وفوق كل ده التعليم الأهبل اللي عاملينله وزارة ووزير... مين فينا لما يقرأ القرآن في تلات أيام يكون طلع منه بحاجة أو حتي عرف يجمع قصة موسي وفرعون بشكل مفهوم؟
بالمناسبة.. السيد جمال البنا طالب بالتخلي تماماً عن علوم التفسير!
Posted by: قلم جاف | 09 September 2008
كلامك كويس جدا، بس مش شايف إن استخدامك لبعض الألفاظ الخارجة ذي "دين أبونا" منفر شوية يعني الكلام كان ممكن يمشي من غيرها ويكون حلو برضه
Posted by: Bakror | 29 September 2008
وادي رمضان جه وراح زي اللي قبله والناس من سئ لأسوأ
محدش سأل ليه ؟
ليه السكة اللي احنا ماشيين فيها مبتجبشي نتيجة
ليه نفس الشئ كل يوم كل يوم بس الناس مبتتغيرشي
والله يا مختار ساعات بحس اننا محتاجين راحة من الدين علي بعضه مش عشان هو وحش بس عشان باظ بخلط ما هو مقدس بما هو انساني لدرجة ان حتى السباك اللي لسة ضارب الصبي بتاعه عشان بيلعب في مناخيره بيقول كال الله وكال الرسول
وانا مش بتريق علي مهنة السباكة
انا بس بقول كدة كثير قوي قوي قوي
وبما انك مستخدم كلمة الخراء اكثر من مرة
فاحب اقولك علي مثل صاحب عزيز بيقوللي عليه
نحن في مكعب خراء كبير ونحن في منتصفه
تماما
شوف بقي حنتصرف ازاي؟؟؟
Posted by: ابن عبد العزيز | 06 October 2008
Post a comment