26 January 2009
الكتب بعد زيارتين للمعرض
بعد زيارتين للمعرض:
سلسلة عالم المعرفة
الأنماط الثقافية للعنف
بعيد عن اليسار واليمين
الفجوة الرقمية
الثقافة العربية وعصر المعلومات
الشروق
ثلاثية غرناطة – رضوي عاشور
علوم التفسير – عبد الله شحاتة
اللغة والمجاز – المسيري
ماذا حدث للمصريين – جلال أمين
كليات رسائل النور الجزء الأول: الكلمات – سعيد النورسي
مزرعة الحيوانات – أورويل
حي بن يقظان (مبسطة للأطفال) – صلاح عبد الصبور
المركز القومي للترجمة:
سبعة أنماط من الغموض
الثقافة والمقاومة: حوار مع إدوارد سعيد
المغالطات المنطقية
ديمقراطية القِلّة
الهلال:
تلابيب الكتابة – صافي ناز كاظم
الإسلام وأصول الحكم – الشيخ على عبد الرازق
جامع الفراشات – جون فاولز
المجلس الأعلى للشئون الإسلامية:
الوجوه والنظائر لألفاظ كتاب الله العزيز - جزئين
مختصر سيرة ابن هشام – جزئين
الهيئة المصرية العامة للكتاب
النصوص الكاملة للنفري
منطق الطير – فريد الدين العطار النيسابوري
دور أخري
السياسة وسلطة اللغة – عبد السلام المسدّي / الدار المصرية اللبنانية
معجم الفروق الدلالية في القرآن الكريم – محمد محمد داود / دار غريب
الأساطير المؤسسة للسياسة الإسرائيلية – جارودي / دار الغد العربي
English Books:
1 – A Vindication of the Rights of Woman, Mary Wollstonecraft
2 – Whatever Happened to the Egyptians, Jalal Amin
3 – Reading television, John Fiske
4 – The Second Sex, Simone de Beauvoir
5 – Oxford dictionary of current English
10:29 Posted in Books | Permalink | Comments (23) | Email this | Tags: book fair 2009, books
Comments
مجموعه جميله
هو انت ليه اشتريت "ماذا حدث للمصريين" عربى و انجليزى !! على فكره هو له نسخه طبعتها مكتبة الاسره كمان ..
هو المركز القومى للترجمه غير المشروع القومى للترجمه؟ و موجود فين يا ترى فى المعرض؟
كمان "ديمقراطية القلّه" ده بيتكلّم عن إيه؟
الهيئه المصريه العامه للكتاب اللىّ كانت فى الأكشاك المقابله لسراى 4 ولاّ اللىّ فين أحسن همّا منتشرين السنه دى
:(
Posted by: زمان الوصل | 26 January 2009
السلام عليكم
جزاك الله خيرا بس كنت حطلنا الأسعار بالمرة
:D
الكتاب ده
"الإسلام وأصول الحكم – الشيخ على عبد الرازق
"
سعره كام؟
بجد انا مبسوطة انى عرفت مكان بيعه الكتاب ده اول مانزمل عمل ضجة جامدة اوى واترفد الشيخ على من مصبه وجردو منه درجة الدكتوراه بعد فترة طويله رجع لمنصبه واكبر من كده كمان
ومزرعة الحيوانات؟بكام
Posted by: هوندا | 26 January 2009
زمان الوصل@
إزيك :)
أنا بحب أعمل مضاهاة بين النص الأصلي والترجمة، ولو في كذا نسخة مترجمة باشتريها سواء كان العمل مترجم الي العربي أو الانجليزي. ده أفيد جدا ليا من قراءة نظريات الترجمة أو كتب عناني في الترجمة مثلا.
ده توجه كامل وأصيل يعني تقريبا عندي يجي 15 كتاب بلغتين . أو تقريبا أكتر. . انا عارف انه في مكتبة الأسرة بس بصراحة مفيش دماغ ولا وقت أدور عليه.
المركز القومي للترجمة هو المشروع القومي للترجمة بعد تغيير اسمه من سنتين تقريبا، أظن عملوا كده بعد ما تم تخصيص دعم سنوي له من سيادة رئيس جمهورية مصر العربية، أمد الله في عمره وجعله زخرا للبلاد. هو موجود في صالة 4 والخصم أظن 20% أو أكثر.
وبغض النظر عن المعرض ممكن تروحي المقر بتاعهم في الأوبرا في شهر رمضان بيعملوا خصم 50 % كل سنة
الهيئة المصرية العامة في صالة 4 باردو، نفس الصالة اللي فيها ميريت، واللي عمري ما بصيت عليها أبدا بدون سبب :)
Posted by: مختار | 26 January 2009
الله يسلّمك :) انت إيه أخبارك؟
أنا توقّعت طبعا يكون موضوع أكثر من نسخه ده سببه اهتمامك بمقارنة النسخ بس دى حاجه محتاجه طولة بال الله يعينك :)
أنا رحت "ميريت" مصادفة .. كان فيه كتاب اسمه "دين الحرافيش فى مصر المحروسه" قلت أروح أبص عليه عندهم البيّاع قال لى لا ده قديم فماجبتوش المعرض !! قلت له طيب كان فيه كتاب ل "جلال أمين" نشرت عنه "البديل" قبل المعرض بيوم واحد قال لأ هييجى بكره !! يعنى لا القديم جابوه ولا الجديد رصّوه ده غلب إيه ده بس يا رب !!
فى "ميريت" باحس أن الشعار الغير معلن هو : اختيار الأعمال التى تستحق القراءه مسئولية القارئ و الدار تخلى مسئوليتها عن أى حرقة دم تشعر بها بعد انتهائك من قراءة أى من مطبوعاتنا .. باحس إن أى حد عاوز ينشر أى حاجه -سواء تستحق أو لا تستحق- ما عليه سوى التوجّه إليهم و ده بيخلّى عندى توجّس هائل تجاه أعمالهم .. شكرا على قائمة كتبك أنا اقتبست منها كام اسم إن شاء الله الجمعه الجايه أبقى أجيبهم
Posted by: زمان الوصل | 26 January 2009
أنا أول مرة أشوف عنوان ديمقراطية القلة، مكنتش أعرف يعني العنوان بالانجليزي قبل كده،
بصيت في الفهرس فلقيت كلام عن هيمنة الشركات الكبري وشوية عناوين تانية مؤداها بيشرح العنوان الرئيسي وهو ان الديمقراطية حلوة ومقطقطة صحيح ، بس مين بقي اللي بيستفيد منها؟؟
وبما إني واخد الدنيا شِمال عادة فبحب الكلام اللي بينتقد الأراء السائدة، حتي لو ثبت في الآخر إن السائد هو الصح :)
Posted by: مختار | 26 January 2009
هوندا@
والله انا مش فاكر أسعار الحاجات كلها :)
أصول الحكم من دار الهلال بخمسة جنيه ... لو مهتمة بالبحث في الموضوع ده وقصة صدور الكتاب أكتر ممكن تشوفي محمد عمارة لأنه أعتقد كتب في الأول من سنين طويلة مدح في الكتاب وموافقة عليه ثم بعد ذلك تراجع عن آرائه وله كتاب اسمه نقد كتاب الاسلام وأصول الحكم. أكيد هيكون في دار الشروق.
ضروري كمان النقد اللي تقرأيه عن الكتاب يتناول المناخ السياسي لوقت صدوره لأنه ده بالذات مش هينفع نعزله عنه.
مزرعة الحيوانات بعشرة جنيه وبعد الخصم ب 8
كمان رواية أورويل العظيمة 1984 موجوده تقريبا عند مدبولي واعتقد انها ب 35 جنيه حسب ما أخبرني صديق
Posted by: مختار | 26 January 2009
زمان الوصل@
الحمد لله تمام.
متهيئلي ميريت بتنشر على حساب الكاتب، يعني لو معاك 3000 جنيه ممكن يطلعلك كتاب. تقريبا دي سياستهم ، لكن مش ده السبب اللي بيخليني ماروحش هناك. أنا مش باروح بشكل تلقائي :) بجد يعني
بس عظيم أوي الشخص اللي رد عليكي ده ... طيب إيه ؟؟ اللي عايز الحاجات اللي انتي سألتي عليها دي ممكن يروح مثلا دار العبيكان ؟؟ :))))
على الرحب والسعة يا زمان، انا عامل قايمة كبيرة على جود ريدز باردو. انتي هتروحي الجمعة باردو؟ الأيام الباقية رايقة جدا عنه
Posted by: مختار | 26 January 2009
الفكره إن نفس النظريه هتلاقى كثير من دور النشر بتطبّقها يعنى طبعا عمرك ما هتلاقى كل إصدارات "الشروق" فى أجنحتهم بالمعرض .. لكنّى توقّعت ألاقى الكتاب ده لأن "ميريت" إصداراتها الغير روائيه أظن عددها مش كبير بالاضافه لأن جريدة "الأهرام" تحدّثت عن هذا الكتاب قبل المعرض بأسابيع قليله و توقّعت ياخدوا بالهم و يفكّروا أن يكون لهذا صدى فى اهتمام الناس بالبحث عنه من جديد ..
سمعت إن الأيّام التانيه غير "الجمعه" رايقه أوى بس المشكله إن صعب آخد يوم أجازه مخصوص عشان المعرض و صعب بردو أروح بعد الشغل و كمان "الجمعه" هاكون قريبه من المعرض فى قاعة المؤتمرات و مكسّله أنزل "السبت" كمان مخصوص للمعرض لأنّى كده كده هانزل "الجمعه" !! أمّا أشوف كده ربنا يلهمنى الصواب لأن عندى حالة قريفه من الكتب و المعرض مش عارفه ليه مش مبسوطه أوى بالكتب اللىّ جبتها مع إنّى مبسوطه بيهم بردو !! بس باقول أشترى اللىّ كنت عاوزه أشتريه و المعرض شغّال و بعدين نخرج من الحاله دى بالتدريج .. باقول لك إيه صحيح تعرف ممكن أشترى أعمال من الأدب الروسى فى المعرض؟ "ديستوفيسكى" على وجه التحديد
Posted by: زمان الوصل | 26 January 2009
أيوه أنا كنت محتاج كتب تراثية - حاجات للرازي - من دار الكتاب المصري اللبناني ولم تكن موجودة. بس في حاجة بقي هنا ... لما يكون دار نشر ضخمة زي المصري اللبناني فممكن يبقي منطقي أنهم مش هيقدروا يجيبوا كل شئ بسبب المساحات المتاحة؛ إنما ميريت اللي لسة بادئة من كام سنة يدوب إزاي تسيب إصدارات من غير ما تعرضها في المعرض!!!
متهيئلي سياسة مش صح
.....
لما رحت السبت بعد الشغل كنت مرهق جدا، بس تقريبا هي محصلة بعضها . ان شاء الله غالبا هروح الخميس والأحد.
----
أدب روسي!!!
توارد خواطر!!! أصل أنا كنت قعدت مع صديق لأخي الكبير من كام شهر وهو مغرم بالأدب الروسي، كلمني عنه كتير وحديثه مشوق. ولو اني لم أحدد ما سأشتري إنما قلت ضروري نشوف إخواننا الشيوعيين بيقولوا إيه :)
الله يرحم أيام ما كان الجناح الروسي ملعلع زمان، أخويا كان مغرم جدا ولو إنه تعرض للاعتقال بسبب الكتب دي :)))))
ملاحظة إنتي يا زمان إن ضيف الشرف بقاله سنين طويلة بيكون من أوروبا بس؟
فين الصين والهند وروسيا واليابان وأمريكا اللاتينية كلها ؟؟؟ولا إحنا هنفضل طول حياتنا أنجلو ساكسون
روحي عند سور الأزبكية هتلاقي في جناح روسي بيبيعوا الكتب بأسعار مخفضة جدا . أنا مشفتهمش السنة دي ، بس همة كانو بيتواجدوا كل سنة في نفس المكان.
لو رحت ولقيت حاجة هابلغك، عرفيني عايزة إيه لديستوفيسكي.
Posted by: مختار | 26 January 2009
Dear Mokhtar,
please tell me from where you've bought these 2 books
تلابيب الكتابة – صافي ناز كاظم
A Vindication of the Rights of Woman, Mary Wollstonecraft
Soor el azbakya or a certain hall?
Plus, would you please tell me where I can find
المركز القومي للترجمة
?
Posted by: Lasto adri | 26 January 2009
تلابيب الكتابة في دار الهلال ، هي نفس الصالة اللي فيها الأهرام لكن من باب آخر
والمركز القومي للترجمة في صالة 4 اللي فيها الهيئة المصرية العامة للكتاب ودار ميريت، واخدين جناحين هناك وواحد أصغر من التاني بكتير. لكن في نفس الصالة 4
-----
"A vindication of the rights of woman" from azbakiya. i already have read it 9 years ago but i thought it must be read again these days.
معرض سعيد :)
Posted by: مختار | 27 January 2009
حاليا بافكّر آخد أجازه و أروح المعرض .. الجمعه وقته ضيّق جدّا و السبت هتكون أجازة نص السنه بدأت و كمان هيبقى آخر يوم أجازه فى المعرض فمتوقّع يكون زحمه أوى بردو ..
بخصوص الأدب الروسى هو أنا ناقصنى كتير فى سكّة الروايات الشهيره بوجه عام سواء المحلّى منها أو المستورد و باحاول أسد النقص ده بالتدريج .. من كام سنه اشتريت الأعمال الكامله ل "تشيكوف" من السور و كمان "الجريمه و العقاب" ل "ديستوفيسكى" و هو ده اللىّ عليه العين السنه دى .. عاوزه أشترى له "المقامر" و "المساكين" .. صحيح فيه روايه شهيره اسمها "إيما" كانت اتعملت فيلم .. حلوه الروايه دى؟ لو كنت قريتها طبعا .. "ديستوفيسكى" أكثر ما جعلنى أرغب فى القراءه له ما يقال عن أن أعماله تصوّر النفس البشريه من الداخل ببراعه و ده شئ جميل أن تعرفه من خلال روايه مش مجرّد كتاب فى علم النفس .. فى الخطّه كذلك "رجال و فئران" و "عناقيد الغضب" ل "شتاينبك" ولو إن قرأت له حاجه اسمها "مراعى الفردوس" لا تستحق وصف روايه ولا أفهم لماذا حاز جائزة "نوبل" !!
صحيحه جدّا ملاحظتك بخصوص ضيوف الشرف من سنين و المعسكر الغربى مكتسح
Posted by: زمان الوصل | 27 January 2009
أه صحيح ده الجمعة والسبت هتكون الأجازة اشتغلت واحتمال الزحمة أكتر!
أنا كده ضروري أروح الخميس ان شاء الله مع الأحد
----
مفيش في دماغي حد غير ديستوفيسكي وتشيكوف هادور عليهم وربنا يسهل. أنا أصلا طالبة مع روايات أوي اليومين دول وكمان ناوي أبدأ أقرأ ليوسف إدريس ويحي حقي بس استعارة من المكتبة. أنا بقالي سنين مش باقرأ غير أعمال فكرية
----
انتي تقصدي إيما بتاعة جين أوستن؟
Emma, by Austen
أنا قرأتها مرتين بالانجليزية وشفتها فيلم ، هي مش حاجة خرافية لدرجة إني أرشحها بثقة زي 1984 مثلا أو لأورويل أو تاجر البندقية لشكسبير.
لكن هي عجبتني من ناحية اللغة وأكتر شئ ترك أثر في نفسي هو إزاي شخصية إيما كانت بتنساق وراء توقعاتها وفي الآخر طلعت على فشوش.
لكن لا أظن إني ممكن أرشحها لك بثقة زي أمير الذباب مثلا.
-----
شتاينبيك قدامي من فترة بس لسة باردو مجاش ميعاده معايا
Posted by: مختار | 27 January 2009
انا قرأت عن الكتاب وظروف المناخ السياسى وقتها ف كتاب حكاية الإسلام وأتاتورك لعبد الحميد الكاتب .. فبصراحة كلامه جديد ومنطقى جدا عن نظام الحكم الإسلامى وحسيت من النبذات الى عرضت فى الكتاب انه اصلا بينقاد سياسة الإخوان بحقائق من السنة فمحتاجة اقراه بالتفصيل واشكرك انك اشرتلى لكتاب محمد عمارة
Posted by: هوندا | 27 January 2009
اسمحلى مختار بيك
هو مخطوطات النفرى غير المواقف والمخاطبات
لو غير المواقف والمخاطبات يبقى لازم اجيبه
يديك الصحة
Posted by: عمرو | 29 January 2009
ماشاء الله تبارك الله
هنيئا لك بالكتب
عندي سؤال إذا ممكن الفجوة الرقمية تاريخ اصداره؟ وهل هو مترجم او اصدار عربي؟
بالنسبة لمن يسأل عن دستوفسكي أفضل ترجمة لها هي ترجمة سامي الدروبي بلا شك
Posted by: الخنساء | 31 January 2009
اهلا مختار
كنت عاوز اعرف ديمقراطية القِلّة رقمه في السلسلة كام ؟
و كنت السنة اللي فاتت قلت انك حتشتري معجم مترادفات
فا كان ايه رايك في المعجمين دول, انه فيهم عملي اكتر؟؟
كنز اللغة العربية: موسوعة في المترادفات والأضداد والتعابير. حنا غالب
السراج الوجيز: معجم للمترادفات والعبارات الإصطلاحية والأضداد العربية. وجدى رزق غالى
Posted by: شريف سعد | 31 January 2009
و رقم كتاب المغالطات المنطقية كام برضوا ؟
شكرا
Posted by: شريف سعد | 31 January 2009
الحق يا "مختار" !! جريدة "الشروق" تقول فى موقعها على الانترنت أن "روسيا" هى ضيف شرف المعرض العام لقادمإن شاء الله و لو عشان و كان لنا عمر !! شكلهم سمعوا استغاثتك وقرّروا يستجيبوا :)
Posted by: زمان الوصل | 01 February 2009
عمرو:
أعتقد في حاجة كمان بجانب المواقف والمخاطبات، لم أتصفح الكتاب بعد، وعموما في غير المعرض سهل تلاقيه في الهيئة المصرية.
--------------
الخنساء:
نشر عام 2005
وهو العدد رقم 318 سلسلة عالم المعرفة - الكويت
تأليف عربي: نبيل علي ونادية حجازي
-----------------
شريف مسعد:
آسف أنا مش في البيت دلوقتي، أول ما أرجع هجيب رقم الكتابين وأبلغك.
عموما تصفح عناوين المشروع هنا
http://www.scc.gov.eg/esdarat-mashro3%20kawmi%20lltrgama1.HTM
بالنسبة للمترادفات أنا اشتريت كنز اللغة وهو ممتع لكن سعره كان أعتقد أكثر من 300 جنيه
أما السراج الوجيز فأذكر أن حجمه صغير ولن يلبي رغباتي.
على فكرة روح سور الأزبكية في المعرض بأسرع وقت واسأل عن واحد هناك اسمه عادل حسين بتاع الكتب القانونية هتلاقي عنه السراج الوجيز نسخة نضيفة وغالبا مش هيطلب منك أكتر من 40 جنيه، ما يعني أقل من نصف ثمن المعجم في دار أبو الهول.
المهم أسرع لأن الحاجات دي مش بتقعد كتير.
هو السراج مريح في البحث وموجز عموما
---------------------
زمان الوصل:
:)
إزيك
يا لسعادتي !! لينين هيرتاح في تربته أخيرا. ياريت كمان يشوفولنا الهند وكولومبيا والنرويج.
ناوية تجددي اشتراك المجلة؟ :)))
وتفتكري ده يكون فخ عشان يلموا العيال الشيوعيين من المدارس الثانوي؟ :))
Posted by: مختار | 02 February 2009
الله يسلّمك
:)
والله الصوره اللىّ كانوا حاطينها فى الخبر-ويبدو أنّها مقتبسه من جناح روسى فى مكان ما- و صور الأدباء الروس اللىّ معظمهم -و ياللعجب- مربّى دقنه كانت صوره تفتح النفس على شراء أعمال هؤلاء الرفاق العظام :) و بعدين أنا بطّلت أشترك فى مجلاّت خصوصا من بتوع المعرض دول .. و إن كانت "روسيا" برفاقها لم تعد محل تشكك بعد انهيار السور .. ولاّ يمكن باحاول أطمّن نفسى
Posted by: زمان الوصل | 02 February 2009
ملاحظه بالنسبه لكتاب "ديمقراطية القلّه" هو نفد من "المركزالقومى للترجمه" بس ممكن تلاقى منه نسخ فى "الصندوق" .. للأسف مش فاكره الاسم الكامل للصندوق بس هو فى نفس الجناح و بردو تبع وزارة الثقافه .. باين "صندوق التنميه الثقافيه" معلش فعلا مش قادره أفتكر اسمه فى اللحظه الحاليه مش عارفه ليه
Posted by: زمان الوصل | 02 February 2009
ديمقراطية القِلّة رقمه
464
أما المغالطات المنطقية فهو اصدار المجلس الأعلي للثقافة وليس المشروع القومي للترجمة.
في شهر رمضان يقدم المجلس الأعلي للثقافة تخفيض 50 في المائة على الكتب طوال الشهر بالمركز في الأوبرا
Posted by: Mukhtar | 03 February 2009
Post a comment