16 February 2009
ضد الشروق وباقي المطفّفين
هذه المدونة لم يشرّفها سرقة جريدة الشروق لبعض محتوياتها،
ولا يشرّفها التعامل مع جريدة الشروق بأي شكل،
ولا يشرّفها التعامل مع باقي المطفّفين،
وخصوصا الكيانات والمؤسسات التي تظن أنها كبيرة، وتتخيل أن لها حق اغتصاب حقوق الأفراد.
الصورة من مدونة أحمد فيصل
17:04 Posted in شخرة مدوية ضد المطفّفين | Permalink | Comments (32) | Trackbacks (0) | Email this | Tags: تفكيك، تشكيك، تلاكيك، تدافع اجتماعي، تقديس الفرد، اللعنة على الم
Trackbacks
The URL to Trackback this post is: http://unbrainwasher.blogspirit.com/trackback/1711610
Comments
انا مختلف معاك يا مختار أختلاف جوهرى جداً
العيب مش على جريدة الشروق لأن عملياً مفيش حقوق نشر محفوظة للتدوين او للمدونين
من حق أى حد يخش يعلق او يقرا .. فمش حتفرق انه يقراه على النت او يقوم شخص بنقله على ورق
لكن العيب على جماعة " الأدباء " الجدد اللى ظهرت
و بتوع أدب التدوين و ثقافة التدوين و اله التدوين و فنان التدوين و مناخوليا التدوين
العيب عليهم , الناس دى مضت عقود و قبضت شهرة و أتكلمت كلام , ضحك الناس علينا لو فاكر فى الندوة اللى فى معرض الكتاب
هم دول اللى غلطانين
الشروق لقت لقية و ناس بتشترى و ناس بتبيع مقابل شهرة ملهاش سند و بدون مجهود و بتقول كلام ساذج , الشروق عرفت ان الناس دى مش فاهمة حاجة , فما مفيش مانع تستغلهم
المسخرة ابتدت لو فاكر بنشر كتب للمدونين و لو فاكر كان تعليقى ايه عندك ؟
و لما قابلت غادة قلت لها نفس الكلام
و ظاطط الدنيا و وصلت لقمة المسخرة مع مدونات مصرية للجيب اللى كانت بتاخد التدوينة و تنشرها و تخطر بعدها المدون , بتنشره فى كتاب ملوش أى رابط يجمع تدويناته و بيع يا لطفى
و الناس تشتهر
خدوا بقى فوق دماغكو
بكرة حتلاقى بعد كده كلامك منشور فى الجريدة بأسم واحد تانى
متشكر جداً لأدباء التدوين و مثقفى التدوين و مناخوليا التدوين
و بعدين حيخرج علينا ناس تتكلم على انتولوجيا التدوين فى الهباء المناخيسى
اشربوا بقى
انا صوتى باظ من كتر الزعيق فى الموضوع ده
Posted by: عباس العبد | 16 February 2009
لو تسمحلى
حكتب تدوينة عن الموضوع ده
لو مكنش يضايقك
حكتبها بناء على تعليقى عندك
Posted by: عباس العبد | 16 February 2009
انا متفقة مع رامز في جزء كبير جدا من كلامه
وقلت لغادة رايي في حكاية النشر الورقي قبل الندوة ماتبتدي
وشكلي برضه ح اعمل تدوينة انا كمان
يادي الهم
تصوروا بقى لو دخل حرامي الشروق ونقل تدويناتنا الاخيرة دي
ههههههههههههههههههههه
Posted by: Bella | 16 February 2009
الناس دى مضت عقود و قبضت شهرة و أتكلمت كلام , ضحك الناس علينا لو فاكر فى الندوة اللى فى معرض الكتاب
هم دول اللى غلطانين
--------------------------------------------
هو انت قلتلي الكلام ده يا رامز؟؟؟؟
قلتلي إني عبيطة و باضحك الناس عليكم؟
ألف شكر يا أخي
عموما برضه أنا مش فاهمه نظرية ..أصلهم باعوا نفسهم أو باعوا كلامهم
كلام أنا كتبته ..أكتبه في مدونة أكتبه في كتاب
أكتبه على قراطيس لب ..على قراطيس طعمية..أظن مش من سلطة حد يقوللي أنشريه أو ماتنشريهوش
هو فيه قانون بيقول إن اللي يكتب حاجة على مدونته تصبح من حق جموع المدونين و مايبقاش من حقه يحطها في أي وسيط تاني
ما أعتقدش
و لما روحنا معرض الكتاب ..قلنالهم مافيش حاجة إسمها أدب التدوين..فيه حاجة إسمها ناس بتعبر عن اللي جواها بطريقة ما بتوصل للناس..الكتابة على النت ليها قواعدها البسيطة زي إن اللي بنكتبه غالبا بيكون قصير
و فيه ناس بتكتب حاجات تصلح إن الناس تقراها و فيه ناس بتكتب لنفسها
ما أصدرناش مدرسة أدبية جديدة
قلنا بنتكلم بطريقتنا و فيه ناس بتقرا ..شكرا ..مش مطلوب مننا إننا نمشي على قواعد قديمة ولا نخترع قواعد جديدة
--------------
الكلام ده بعيد عن موضوع التدوينات المقتبسة و المشوهة في الشروق اللي أنا شخصيا معترضة عليها
لكن موضوع ..إنتوا بعتوا نفسكم ده ..أصله كتر قوي في السوق
و أظن عيب قوي ..موضوع ضحكتوا الناس علينا و ما انتوش فاهمين حاجة ..و الناس السذج و الكلام المهين ده
Posted by: غادة عبد العال | 16 February 2009
الناس دى مضت عقود و قبضت شهرة و أتكلمت كلام , ضحك الناس علينا لو فاكر فى الندوة اللى فى معرض الكتاب
هم دول اللى غلطانين
--------------------------------------------
هو انت قلتلي الكلام ده يا رامز؟؟؟؟
قلتلي إني عبيطة و باضحك الناس عليكم؟
ألف شكر يا أخي
عموما برضه أنا مش فاهمه نظرية ..أصلهم باعوا نفسهم أو باعوا كلامهم
كلام أنا كتبته ..أكتبه في مدونة أكتبه في كتاب
أكتبه على قراطيس لب ..على قراطيس طعمية..أظن مش من سلطة حد يقوللي أنشريه أو ماتنشريهوش
هو فيه قانون بيقول إن اللي يكتب حاجة على مدونته تصبح من حق جموع المدونين و مايبقاش من حقه يحطها في أي وسيط تاني
ما أعتقدش
و لما روحنا معرض الكتاب ..قلنالهم مافيش حاجة إسمها أدب التدوين..فيه حاجة إسمها ناس بتعبر عن اللي جواها بطريقة ما بتوصل للناس..الكتابة على النت ليها قواعدها البسيطة زي إن اللي بنكتبه غالبا بيكون قصير
و فيه ناس بتكتب حاجات تصلح إن الناس تقراها و فيه ناس بتكتب لنفسها
ما أصدرناش مدرسة أدبية جديدة
قلنا بنتكلم بطريقتنا و فيه ناس بتقرا ..شكرا ..مش مطلوب مننا إننا نمشي على قواعد قديمة ولا نخترع قواعد جديدة
--------------
الكلام ده بعيد عن موضوع التدوينات المقتبسة و المشوهة في الشروق اللي أنا شخصيا معترضة عليها
لكن موضوع ..إنتوا بعتوا نفسكم ده ..أصله كتر قوي في السوق
و أظن عيب قوي ..موضوع ضحكتوا الناس علينا و ما انتوش فاهمين حاجة ..و الناس السذج و الكلام المهين ده
Posted by: غادة عبد العال | 16 February 2009
معلش يا مختار عاوزة ارد علي رامز
يعني يا رامز انت بتخلط ميت حاجه ملهومش علاقه ببعض في تعليقك
انا وانت رافضين اي ميثاق او اي كيان يجمع المدونينين حلو
لكن مدونات مصريه موضوع مختلف تماما عن الشروق
مدونات مصريه استأذنت الناس ومضربوش حد علي ايده صحيح ما ادوش حد فلوس بس علي الاقل مقطعوش في التدوينه وبهدلوها زي الشروق وما خدوش حاجه من غير اذن حد
يعني احنا ماشيين في الاتجاه الي الاسواء
انت معترض تدوينتك تتحط معايا في كتاب عشان مختلفين حقك
لكن لو معندكش مشكله ومتنازل عن حقك المادي وانك تكون وسط باقه اوك
لكن اكيد لازم توافق وكلامك ما يتقطعش وينزل مبتسر
Posted by: بنت القمر | 16 February 2009
غادة
" كلام أنا كتبته ..أكتبه في مدونة أكتبه في كتاب
أكتبه على قراطيس لب ..على قراطيس طعمية..أظن مش من سلطة حد يقوللي أنشريه أو ماتنشريهوش
هو فيه قانون بيقول إن اللي يكتب حاجة على مدونته تصبح من حق جموع المدونين و مايبقاش من حقه يحطها في أي وسيط تاني
ما أعتقدش
"
---
الكلام ده مظبوط تماماً و انا معنديش أعتراض عليه و انا قلت فى التدوينة اللى كتبتها ان معنديش اى مانع أن اى حد ينشر اى حاجة بالعكس ده شىء جميل و ادى لينك التدوينة لو مش مصدقانى
التدوينة بعنوان زبادى خلاط
http://charkawy.blogspot.com/2009/01/blog-post_27.html
و دى مقدمتها و هى تحت رقم 3
"هذا المعرض شهد ظاهرة جديدة و جميلة و هى نشر كتب لكثير من المدونين , لا غبار على هذا الموضوع . بل كثافة النشر شىء مطلوب و مفيد . لكن مش معنى انك نشرت أنك بقيت أديب"
ده قصدى انشروا زى ما انتم عايزين بس بلاش الفذلكة و الندوات و نظرية المبيعات و ادب الهواء الطلق و التحليل اللغوى و ناس اتغيرت
احنا ابسط من كده و اكبر من كده
ازاى يا غادة تسمحى لنفسك تروحى ندوة اسمها ورق كلينكس ؟
و بعدين انا مقلتلكيش قبل كده فى المؤتمر انى انا اشتريت الكتاب علشان انت مدونة , لكن لما قريته حسيت انه مش قد كده ؟
و مكتبتش انا الكلام ده قبل كده و عند مختار كمان ؟
و كتبته عن مدونات مصرية للجيب ؟
انا مغيرتش مواقفى يا غادة
اما عن اللى باعوا فممكن تقرى مدونة نثار و انتى حتفهمى قصدى
اقرى عن المدونة اللى اتنازلت عن حقها فى مدونتها , انا معرفش هى مين و لا عندى فكرة و لا عايز اعرف و هى مذكرتش اسمها
و ادى اللينك
http://azza-moghazy.blogspot.com/2009/02/blog-post_04.html
انا لما اتكلمت على ادب التدوين كنت برد على تدوينة احمد الصباغ اللى فيها الموضوع ده
--
لما تكونى مثقفة بثقافتك دى يا غادة و تكلمى و تقتبسى من توفيق الحكيم و القعيد و تعملى تحليل لغوى للمدونات يبقى بتضحكى على مين ؟
ايه علاقة توفيق الحكيم بالتدوين و ايه علاقة النص اللى انت اقتبستيه منه بالتدوين و لا هو تلبيس طاقية ده لده و لا ده ما اسموش لى عنق النص لصالح مصلحة ما ؟
و ايه علاقة التدوين بالتحليل اللغوى ؟ هو التدوين بقى خطاب علشان نطبق عليه اللنجويستيك ؟
--
عامة لو انتى فاهمة انى بغلط فيكى فأنتى حرة
انما كل اللى حقولهولك انى كنت قاعد مع جماعة من المدونين و كان من ضمنهم مختار اللى اتشرفت بمقابلته و ممكن هو يقولك انا قلت عليكى ايه فى ضهرك و شكرت فيكى ازاى !! .
عامة
شكراً لأهتمامك بالرد
Posted by: عباس العبد | 17 February 2009
بنت القمر
مدونات مصرية مستأذنتش كل الناس و أسألى بن عبد العزيز و افتكرى كلمة البراء أشرف اللى قالها فى الندوة
مش مشكلة يدوا فلوس
الفلوس ملهاش دعوة و بعدين مين قالك انهم مقطعوش فى التدوينة
احمد مهنى لغى تدوينة لمدون رغم وجود اسمه فى أول الكتاب و قال أن التدوينات بتعدى على أمن الدولة قبل نشرها و ممكن بيلا تأكدلك الكلام ده و فى تدوينات اتشال منها حتت
انا معترضتش على نشر تدوينتى فى كتاب علشان مختلف مع مدون اخر , انا أعترضت علشان ما ينفعش ننشر حاجات ملهاش علاقة ببعض , و ضربت المثل ده
ينفع ننشر تدوينة لبيسو و بعدها علطول للصارم الحاسم ؟
هو ده اعتراضى مفيش رابط بين التدوينة و اللى بعدها .يعنى الخلاف فى التدوينات اللى ملهاش رابط
مش خلاف بين المدونين
انا لو فى كتاب بيضم تدوينات فى خط واحد من الجلدة للجلدة و الراجل بعتلى , و كان عندى استعداد انشر , مش حعترض و مش عايز فلوس , لكن منشرش فى كتاب لخبطة على بعضيه , و هو ده اللى حسس الشروق ان الناس مش فارق معاها خط النشر قد ما هى فرحانة بالنشر
الشروق لقت ان المدونين بينشروا و خلاص , أى كتب و أى حاجة فى كتاب و خلاص و مش فارق معاهم الفحوى او خط النشر و مش بياخدوا فلوس , قد مافارق معاهم النشر علشان الشهرة , فقالت هم استباحوا دمهم يبقى احنا ليه ما نستفدتش من الموضوع ده .. هم مش فارق معاهم لا فكرة و لا خط نشر و لا فلوس , يبقى ننشر و نقتبس منهم و اللى اسمه حيطلع فى الجرنال حيصقف و يفرح و مش بعيد كمان يحتفظ بالعدد و يوزعه على صحابه
فهمتى قصدى يا بنت القمر ؟ انا مخلطش
ده امتداد لده
Posted by: عباس العبد | 17 February 2009
عباس العبد كتب "لأن عملياً مفيش حقوق نشر محفوظة للتدوين او للمدونين
من حق أى حد يخش يعلق او يقرا .. فمش حتفرق انه يقراه على النت او يقوم شخص بنقله على ورق"
لأ، فيه فرق!
ماهو ممكن عمليا أي حد يضربك على قفاك و انت ماشي في الشارع. هل دا معناه أن دا يبقى "قشطة" أو أن شخص ما يعتبره حق طبيعي له؟
مش قصدي إهانة يا عباس العبد.
Posted by: ألف | 17 February 2009
الف
انا فاهم قصدك بس انت فرضت مثال خاطىء
لسبب بسيط هو انه الضرب فى الشارع سواء ضرب عادى او على القفا هو انتهاك و تعدى على حقوق ملكية " جسدى " اللى انا املكه . تعدى على ملكية خاصة و هو الجسد و انتهاك للقانون المدنى بعدم التعدى على الأخر فى منطقة - الشارع - من المفروض عملياً انها تحت حماية الحكومة فبيعاقب عليها القانون و لو رُفعت قضية و انت اتنازلت عن حقك , فى حاجة اسمها الحق المدنى اللى بتطالب بيه الحكومة .
السب و القذف , رغم ان مفهومش اعتداء على الجسد , بس بيعاقب عليه القانون بموجب " قوانين " تنظم حقوق حفظ سلامة الجسد .. يعنى سواء الضرب او السب و القذف فليهم عقوبة نتيجة قانون بينظم ده .
و هو ده اللى انا اقصده انه مفيش لا قوانين ملكية فكرية او حقوق حفظ تحمى المدون أو أفكاره
و اذا كان فى مدونين اتنازلوا بالكامل عن حقهم فى اللى هم كتبوه و اقرا نص التدوينة عند نثار
http://azza-moghazy.blogspot.com/2009/02/blog-post_04.html
و ده طمع جريدة زى الشروق فى المدونين
--
فهمت قصدى ؟
Posted by: عباس العبد | 17 February 2009
الف
اما عن الحق الأدبى , المعنوى يعنى
فده شىء ذوقياً فى التدوين انك بتحط لينك او اسم الشخص اللى اقتبست منه النص او جزء من النص
فلو شخص معندوش ذوق و لا اخلاق أو اداب مهنة .. حتعمله ايه ؟ لأن مفيش حاجة قانونية رسمية تحميك و تحفظ سلامة النصوص اللى انت تعبت فى انتاجها
اما اللى زود الطين بلة .. هو أن فى مدونين اتنازلوا بالكامل عن حقوقهم ( سيبك من الحقوق المادية ) الأدبية و حقهم فى حفظ ما دونوه و نشروه
ده كله ما يطمعش حد فى المدونين ؟
اذا كان الصحفيين و الكتاب اللى فى قوانين بتحكم كتاباتهم و بتحافظ عليها بيسرقوا بعض ..مش عايزهم يسرقوا مدونين بيتنازلوا عن حقهم و كمان مفيش حاجة قانونية تحميهم ؟
Posted by: عباس العبد | 17 February 2009
عباس العبد
==========
انا مش بدافع عن مدونات مصريه للجيب ولا بشتغل معاهم انا هنا برصد فرق بس بين وسائط نشر مختلفه
انا بقول تجربتي انا في مدونات مصريه كانت بموافقتي وتدوينه نزلت كامله.... بدون قطع ولا ابتسار ولا اخلال بالمعني وزي اما انا سايبه صفحتي مفتوحه للجميع علي بلوج سبوت انا كمان معنديش اي مشكله ان ناس علي نطاق اوسع تشوف تدويناتي يعني زي ما انت كده نشرت مجموعتك القصصيه يخربيتك يا هيكل اليكترونيا واديتها مجال اوسع تتشاف وتتقري ولا غبار علي ذلك
بالنسبه بقي لمدونات مصريه للجيب انا اول مرة اسمع كلامك ده واللقاء ده واللي اتشرفت وشفتك فيه اللي اعرفه ان شريف ابن عبد العزيز كان فرحان وقام وقال كلمه يعني الراجل مكنش مسروق ولا حاجه!!!! لو هما رفضوا تدوينه هما حرين
لو انا بشتغل في جريده ورئيس التحرير رفضها يبقي هو حر لانه المسئول عن سياسه الجرنان
لكن كل ده لا علاقه له بجريدة الشروق يا رامز
اللي لا اسـأذنت وكمان قطعت تدوينات الناس وطلعتهم هبل
وده مش اول مرة يحصل علي الاقل معايا
بس الناس بتنسي جريده الاسرة العربيه برضه كانت بتلم تدوينات وانا وافقت واديتهم تلات تدوينات يختاروا منها واللي كانت مشرفه عليها اسر ياسر راحوا مختارين تدوينه رابعه وحطوا اللينك بتاعي غلط يعني مش اول مرة اتسرق واول امبارح تدوينتي قبل ان تخوضي المعركه برضه نزل تلتها الاول وزي ما حد قاللي ما يقدروش ينزلوا انص التاني اصل الشروق مؤسسه محافظه وتدوينتك فيها سخريه من الازهر!!!انا شايفه طبعا انه نوع من الابتسار عشان المساحه مش اكتر يعني في فرق بين تلات حالات يا رامز
حاله غاددة وغادة ورحاب وحاله مدونات مصريه
وبعدين انت تفتكر انا لو اديت تدوينه لبوهي ولا ايناس وقطعوا منها ها اسكت لهم؟؟!!!!!!لاطبعا وكذلك لو خدوا من غير اذني...برضه لا مستحيل
لاني مش عشان وافقت انشر اني ها اوافق ان كلامي يتسرق او يتقطع؟؟؟
وبرضه كلام غيري
واللي مش ها ارضاه علي نفسي مش ها ارضاه لاصدقائي
انت بقي معترض لانه مفيش خط واحد للكتاب انت حر
معترض عشان سمعت انه في تدوينات اتسرقت برضه انت حر
معترض لاي سبب انت حر تعترض
وانا حرة اوافق بشروطي اللي مدونات مصريه ما انتهكتهاش ولو حصل مكنتش ها اسكت ابدا
بس مش معني اني وافقت بشروطي يبقي انا الللي طمعت الناس فينا سواء انا او اي حد من اللي نشروا في مدونات زي فضفضه وبثينه وشقير وشريف وغيرهم
مش عشان وافقنا بالشروط اياها وهي الاستئذان وعدم تقطيع التدوينه يبقي احنا مسئولين باي صورة عن اللي الشروق بتعمله
تحياتي
Posted by: بنت القمر | 17 February 2009
تااااااني يا رامز؟
برضه الكلام اللي كاتباه عزة مش كله صحيح
و قبل ما تنصب المشانق لحد يا رامز أرجوك تتأكد من الكلام اللي بتقوله
و قبل ما تشير للناس لتنازل "بعض" المدونين و تسيبلهم لينكات
..إسألهم الأول
كان ممكن تسألني عن محتوى التدوينة دي و أنا كنت هاقولك إنه غير صحيح
أنا مش فاهمة فيه إيه؟
Posted by: غادة عبد العال | 17 February 2009
سكت خالص من بداية عبثية تحويل المحتوى الالكترونى لمحتوى ورقى
و مازلت ساكت و محتفظ بكلامى للنهاية
و ان كنت عايز ألف يتكلم أكتر عن الموضوع و ما يكتفيش بالمداخلة البسيطة دى
Posted by: GEMYHOoOD | 18 February 2009
انا مش فاهم ، ليه أصلا المحتوى الإلكتروني يتحول لورقي؟ أظن ان "هنا" احسن من هناك لأسباب كتير ، الرقابة المتحكمة في الورق على رأسها ، يعني مثلا الشروق تقدر تنشرلي انا حاجة من غير ما تحذف؟ طبعا لأ ، واحدة زي غادة عدد الزوار عندها فيالمدونة زي الرز ، و أكيد مبيعات الكتب أقل من عدد الزوار ، و ده بيخلي النشر الورقي تحصيل حاصل ، كمان مرونة النشر هنا ، أقصد سهولة اصافة الصور ، و تعديل شكل المدونة عشان تناسب مزاجي أنا ، و و كمان اضافة مزيكا أو فيديو للتدوينة
النشر الورقي للمدونات مش غلط طبعا ، أي حد يتمنى كلامه هنا ينطبع على الورق ، انا هاكون مبسوط عشان أبويا هايمسك الكتاب ويقراه ، لان أبويا مابيعرفش يستعمل السمخط ده ، كمان هاكون سعيد بالفلوس ، خصوصا لو كانت مبلغ كبير
بس لما هانشر على الورق ، هاكتب حاجه تانية ، مش هانشرها هنا ، هافصل بين الورق و هنا ، هاكتب حاجه مش محتاجة صور أو فيديو ، و بالتأكيد مش هايكون فيها روابط ، بمعنى انها مش هاتكون مناسبة للنشر هنا ، بس هاتكون مناسبة للنشر على الورق
Posted by: ربيع | 18 February 2009
يا سيد مختار ، سعيد بعبورك البرزخ و وصولك الى بر الشتيمة القارحه
Posted by: ربيع | 18 February 2009
احب بس اشارك بسرعة في الموضوع المطروح واوضح شوية نقاط فيها لبس
الموضوع المناقش ينقسم الي قسمين :
اولا : فكرة تحويل المدونات الي مطبوعات ورقية او تحويلها الي اي وسيط اخر مثل التلفزيون او المسرح اوسوى ذلك ، ومدي تأثير هذا او علاقته بسرقة التدوينات ووضعها في الصحف سواء باستئذان او من غير استئذان اصحابها وهذا موضوع منفصل تماما يجب تشريحه من اجل فهمه ولي فيه رأي تغير عبر الوقت الي حد ما وفيه اتحدث لاحقا
ثانيا : هل تدوينتي التي ظهرت في كتاب التدوين الذي حضرت حفل توقيع له في ساقية الصاوي تم أخذه بدون اذني ام لا؟
اجيب على النقطة الثانية الان وبسرعة
في الحقيقة لقد تم اخذها بعلمي وبإذني وان كنت لم احدد اي تدوينة بالتحديد في البداية ...بمعنى ان الاخت الفاضلة ايناس لطفي اتصلت بي وطرحت عليا الفكرة وكنت متحفظا في البداية ليس لشئ الا لاني لم اكن اعرف ان كان اسلوب تحويل التدوينات الي مطبوعات فكرة جيدة ام لا وكذلك خشية الربحية والنفعية من طبع كتاب بهذا النوع ..الا انني اقترحت عليها عدة بوستات ثم هي راسلتني وقالت اسمح لي بانتقاء مدونة على ذوقي ...وبالطبع سمحت لها بدون اي تحفظ ولذا انا حضرت الحفل لاني مشارك في الكتاب وليس لاني محتج عليه كما اوضحت بالفعل الاخت بنت القمر
وهنا يجب ان اوضح ان هناك لبس ..عندي انتقادات للكتاب ...لكني لم اتهم احد بالسرقة بل على العكس تم اخذ البوست باذني وبمنتهى الادب والاحترام ...وهذا من الحق الواجب الاعتراف به
الاخ رامز ربما التبس عليه الأمر عندما انتقدت فكرة الكتاب مرة امامه لكني لم اقل ابدا ان احدا اخذ مني شيئا بدون علمي ...ولكي اكون واضحا ...البوست بالذات اللي نزل في الكتاب كان من اختيار ايناس لطفي ولكن بإذن مني ان تختار الموضوع الذي تراه مناسبا وقد فعلت وانا وثقت في رايها واختيارها بالطبع وهذا لكونها شخصية رائعة ومحترمة ولها فضل لا يمكن انكاره
اتمني ان يكون موضوع السرقة هذه قد حسم بلا رجعة
وفي نفس السياق انا اري مثلا ان كتاب غادة كان رائعا جدا واحمد الله انه نجح بل ادعوها للمزيد واعرف جيدا ان غادة ذات فكر عالي وموضوعية وواقعية شديدة هى التي جذبت مئات الالاف من القراء وهي اهل لذلك
وكل الاشخاص اللي حولوا اجزاء من مدوناتهم الي ورقيات مطبوعة هم اشخاص رائعون ولا داعي للخوض في نياتهم لانهم من حقهم فعل ما شاءوا في مدوناتهم وهذا حقهم الذي لا ريب فيه
هل فكرة تحويل المدونة الي ورقية اصلا فكرة جيدة ؟
هذه قضية اخري يمكن النقاش فيها وتحتمل كل وجه ولا علاقة لها باتهام اي مدون كتب كتابا انه طالب شهرة او صاحب مصلحة ..وغلي فكرة ده مش عيب ..انا شخصيا سعيد لغادة انها بقت مشهورة واللا عاوزين الناس الهايفة اللي تتشهر ؟ وكمان انا اتمني انها تكون ربحت من الكتاب ده ودي مصلحة مشروعة جدا وربنا يوفق الجميع
وفي النهاية احب اوجه احترامي للجميع بدون اي استثناء فكلكم اصدقاء عزيزون جدا
ولكم عليا فضل شديد لا انكره
جزاكم الله خيرا
Posted by: sherif abdel aziz | 18 February 2009
انا بعتذر لشريف انى فهمت كلامه غلط
و بشكره على التوضيح
بعتذرلك مرة تانى يا شريف
Posted by: عباس العبد | 18 February 2009
مش عارف ليه الجميع بيلف و يدور حوالين الموضوع
خلينا بس متفقين على شوية نقط اظنها متفق عليها
1 - تحويل المدونات لنشر ورقى رجوع بآلية النشر سنين للخلف
2 - خيانة للقارىء نفسه اللى بيتعبر المحتوى التدوينى مفتوح و مجانى
3 - بالنسبالى بعتبره نصب .. اللى هو التالى .. اعادة بيع حاجة كانت مجانية و الف واحد قراها و تيجى على الغلبان اللى جاهل نت يدفع فلوس علشان يقرى شويه الورق
4 - اللى شايف نفسه كاتب كبير يجرى يلف على دور النشر لو عنده محتوى كويس هاينشروا بدل ما ينفخ بطننا انه مدون و دار النشر تعمله لوجو مدونات الشروق و مدونات دار عين و مدونات البتنجان الرومى
و كل دار ممحونة على حاجة تبيع نفسها بنفسها فى ظل تدهور سوق الكتاب تجيب عيلين تلاتة من بتوع النت اللى اصلا ليهم ارضية و تنشرلهم
علشان العيال الهبلة دة فى هبل أكثر منهم بيجيبوهم فى برامج حوارية و هايناقشوهم
فى اهمية المدونات و الحبشتكانات السيبرية فى مستقبلهم و حاجات هبلة كدة كتير فالكتاب هايسمع و الكل هايعرفه و دار النشر المستفيد الوحيد
و لنا بقية علشان عندى شغل دلوقت
Posted by: GEMYHOoOD | 18 February 2009
أنا غير معني بالحفاظ على قدسية الحدود بين الوسائط، جثث شجر كانت أو هباء إلكتروني..لكني كمان متفق مع عباس العبد في عدم اكتراثه بهوس التدوين و المناخوليا ال كتب عنها، لأني شايف أن الوب مجرد وسيط، ممكن يؤدي لأشكال جديدة من الإبداع، لكن مش معقول كلما نشوف لوحة جميلة نطنشها و نقعد نتكلم عن التركيب الكيميائي للالوان المستخدمة فيها. أصلا مصطلح "تدوين" في حد ذاته عمره قصير و هيندمج و يتطور و يتنسي.
من ناحية ثانية كتبت يا عباس العبد ما معناه أنه ما فيش قوانين تحمي حقك في النص ال تعبت فيه. مع أن الحقيقة هي أنه حسب قوانين المصنفات الفنية المعمول بها في كل العالم فإن الحالة المبدئية لأي مصنف منشور في أي وسيط هي الحماية الكاملة ما لم يذكر المؤلف أو حائز الحق غير ذلك صراحة. يعني لو ماكتبتش أنه "في الملك عام" أو منشور برخصة حرة يبقى محمي.
أحب أوضح أني بالرغم من أني مركز على النقطة دي في النقاش طول الوقت فأنا في الحقيقة من مؤيدي الرخص الحرة و المحتوى المفتوح و أدعوا لها باستمرار [http://ahmad.gharbeia.org/2008/10/19/235407] و أشارك في مجهودات مجتمع المعنيين بتطويرها و التعريف بها، لكن من منطلق أن الأطراف يكونوا فاهمين.
Posted by: ألِف | 18 February 2009
طيب يا أحمد
لسه فى غموض فى نقطة ما يكتبه المدون هل يعتبر محتوى مفتوح و مجانى
و مكفول ليه حق التصرف فيه بالبيع و الطبع بعد ما كان مفتوح و مجانى و لا لا ؟؟؟
انا ماقابلتش اى نموذج برة مصر اتعمل فيه دة علشان كدة مش قادر احكم هل دى ثقافة نشر مصرية خالصة على اعتبار دونية وسيط الانترنت و رغبة الجميع فى النشر الورقى على اعتبار انه الاكثر احتراما لاسم الكاتب و دة عبث طبعا بالمقارنة بحركة بيع الكتاب المصرى و جماهيرية المدونات و المحتوى الالكترونى
Posted by: GEMYHOoOD | 18 February 2009
ايه يارامز
يسألوني عن أيه؟؟
عن حكاية الامن بيراجع التدوينات دي؟؟
انا عرفت الكلام ده منك لما قلت بعد ماحضرت حفل التوقيع ان مش عارفة مين كده قال قدامكم ان امن الدولة بتراجع التدوينات
لكن انا عن نفسي مااعرفش بشكل يقنيني حكاية الكراجعات دي لاني لاانا اللى نشرت ولا انا اللى راجعت ولا من اللى حضروا حفلات التوقيع دي
وسبب عدم نشري معهم في العددين السابقين عن العدد الثالث هو عدم وضوح خط معين يربط الموضوعات ببعضها كما كان في العدد الاول والثاني من خلطة التدوينات المشاركة
اما العدد الثالث فوافقت على النشر به بسبب وحدة الموضوع
أما حكاية مراجعة الامن دي فعرفتها منك انت.
Posted by: Bella | 19 February 2009
مافيش غموض يا جيمي، شوف يا سيدي:
- احنا بنتكلم عن القانون، مش عن الزوق
- القانون لا يفرق بين الوسائط، جثث شجر زي إنترنت زي مجلات حائط
- قوانين المصنفات - بغض النظر عن مواقفنا الشخصية - تقضي أن أي مصنف منشور هو محمي حماية كاملة، و من غير ما تشترط التنويه صراحة
- الحق المحمي هو الحق التجاري، يعني إعادة بيع المصنف أو نسخ منه
يعني أي مدونة صاحبها لم ينص صراحة على أن محتواها منشور برخصة حرة أو في الملك العام، و أنه معتبره محتوى مفتوح، يبقى مدونته و ال فيها محميين. النشر على الوب في حد ذاته مش معناه أن المنشور مفتوح المصدر.
في كل الاحوال، الحق الأدبي لا يسقط، و لا يمكن التنازل عنه و لا بيعه. الحق الأدبي ال هو أن أعمالك تعزا إليك.
يعني حتى لو الجرنال دفع لك فلوس مقابل تدوينتك لازم ينسبها لاسمك ال أنت تختاره، سواء كان حقيقي أو مستعار، أو مفتكس. لو أنت مش عاوز أنت حر، لكن ما ينفعش ينسبوه لحد غيرك غصب عنك أو يطنشوا اسمك لو أنت مش عاوز.
Posted by: ألِف | 20 February 2009
بيلا هو في واحد قال الكلام ده فعلا بس ما قالش الأمن بيراجع بشكل مباشر قال انه تدوينته اللي اختارها في الاول ما رضيوش ينشروها علشان اسمها خوفا من مضايقات
Posted by: Karakib | 21 February 2009
تابع البوست وتعليقاته م الاول والكلام كان عمال يحلو ويسخن فقلت اصبر لحد ما الاقى حاجه اقولها
ومالاقيتش فقلت اكتب خواطر وشوية ملاحظات كده
صحيح عمليا مافيش حقوق ملكية فكرية والحقوق هنا اللى على النصوص محفوظه للشركة المسئولة عن بث الخدمة بحسب الاتفاقية اللى بتوافق عليها حضرتك لما بتنشئ مدونة، لكن عمليا مسألة حقوق الملكية الفكرية لما يتاخد نص ويتحط فى جرنان أو آداة نشر ورقى أخرى بدون إذن صاحبه يمكن تطبيقها على المدونات على فكره لإن المحتوى يمكن تتبع تطوره ويمكن الحصول على أدلة ثبوتيه بنسبه لصاحب المدونه لو اتلطش، سواء من خلال آلات البحث التى تخزن الصفحات يوميا فى الكاش أو من خلال قواعد البيانات المتوافرة لدى مقدمى خدمات الاستضافة للمدونات، وهى ملكية فكرية لأن التدوين هو عمل فكرى ينتج نصوصا، زيه زى كتابة الشعر والرواية والخواطر والتخاريف كمان.
المشكل الحقيقى أن مسألة الملكية الفكرية ليست مسألة ذات أهمية فى عالم قائم على الخدمات المجانية وبيدار بتكنولوجيات مفتوحة المصدر لا تمولها سوى الاعلانات التجارية وفقط، بس لما بنتكلم عن حقوق الملكية الفكرية بنتكلم عن شئ مهم، عنصر فاعل بيتغير لما النص يتحول ما بين النشر الرقمى والنشر الورقى، وهو عنصر الفلوس، بمعنى النشر الرقمى عبر المدونات كان تجربة طوعية لا تجارية، تقريبا، والمدون نفسه بيخش فيه رغبة منه فى تعريف العالم بشخصه، وكتاباته وآراءه وحتى ابداعاته المختلفه، بينما النشر الورقى هو جزء من سوق مستقرة، تخدمها صناعة النشر، وتخدم شرائح مستهلكين مختلفه، ومنتجاته اللى هى الكتب تباع بالفلوس، بينما تصفح المدونات هو استهلاك مجانى خالص (ومعروف ان الانتاج الرقمى لا يستهلك ويمكن اعادة نسخ وحداته بعدد لا نهائى دون كلفه)، يعنى لما النص يخرج من الرقمى لأبو فلوس يبقى منتجه الأول وهو صاحب النص قبل الناشر والطابع والموزع يستحق فلوس عليه. طبعا احنا الاستهبال سيد الموقف عندنا فالناشر هو الوحيد اللى بيقش فى الحسبه دى.
النشر فى جريدة كالشروق بيشغل مساحه، فيه قانون اسمه الفرصه البديله، يعنى لو المساحه دى كان جابو فيها أى كاتب مش كانو هايدوله فلوس، أو على القل هايستأذنوه فى نشر نصوصه، طب ليه ما يعملوش كده مع المدونين وهما معروفين وعندهم إيميلات.
خاطر تانى عشان اللى بيقولو النشر حصل عكس اتجاه التطور، كلامكم صحيح، فالمدونات أقرب إلى آداة تحدها حدود جيلية، الاحصاءات بتقول ان مستخدمى المدونات فى عمر الشباب اكتر من ثلثى المستخدمين فى الدول الغربية وفى دول العالم الثالث اكترمن تسعين فى الميه وده اللى بيسموه الفجوة الرقمية بين الاجيال، طب ده علاقته ايه بالنشر الورقى، آه علاقته ان التدوين فى مصر بعد الضجه اللى احدثها التدوين الحركى والقضايا اللى فجرتها المدونات وانتقلت للصحافه والرأى العام بعد كده زى قضية عماد الكبير مثلا واضراب ابريل أشار لوجود وجهات نظر وآراء وأفهام مغايرة لدى الأجيال الجديدة غير اللى عند الأجيال الأكبر، ولأن هذه الأجيال الأكبر كى تطلع على هذه النصوص ولأنهم بعيدين عن الانترنت فكان من السهل تحويل وتدوير المحتوى الرقمى لمحتوى ورقى ليسهل عليهم التعامل معاه فى ضوء ضآلة معرفتهم بالتكنولوجيات المعلوماتية، يعنى زى ما جيمى هود بيقول هو تراجع للخلف ليس له مفسر إلا عنصر التجارة التى منشئها احتياج جيل يعانى من اثار الفجوة الرقمية. أنا مثلا ما اشترتش أى كتاب من كتب المدونات اللى نشرتها الشروق لإنى ببساطه قاريها على مواقع اصحابها، واصحابى اللى اشتروها جابوها مجامله للمدونين الزملاء او عشان يوروها لأهلهم اللى ما بيشوفوش مدونات كدليل على إن التدوين جد ومش زى ما بيقول عبدلله كمان وغيره من المخابيل، باب للخيانه والعبث وقلة الأدب.
نصيحه أخيره للبعض، بلاش التنابذ يا عالم. ومش هافسر أكتر من كده.. أظنها واضحه
Posted by: عبده البرماوى | 22 February 2009
http://al-araby.com/docs/1144/journalists/article2142180058.html
طلعت جريدة العربي بتعمل كده كمان و لقيت اسم محمود عزت منشور له كمان !!! انا محدش استأذني انه ينشر تدوينتي !!
Posted by: Karakib | 22 February 2009
يا عباس العبد، لي تعليق على تعقيب لك كان فات عليّ لكثرة التعليقات، و انتبهت له دالوقت بس مع أننا تداخلنا بعده:
أنا لما ضربت المثل عن الضرب، ماكانش قصدي التركيز على الحماية القانونية أو تجريم الفعل، كان قصدي بيان الفرق بين "الممكن" و "الواجب". و في السياق دا المعنى مايكونش خاطئ في نظري.
سألت لو حد ماعندوش ذوق و لا أخلاق اعمل إيه معه؟
هاتريق عليه و أجرسه بغباؤه يعني، احنا ورانا إيه!
و إن كان فيه مدونين تنازلوا عن كل حقوقهم، ففي غيرهم ماتنازلوش. و بالمناسبة التنازل عن كل الحقوق دا مش شيء وحش خالص، بالعكس، دا شيء محمود جدا و مفيد في خلق وعاء معرفي و إبداعي تشاركي حرّ. التنازل دا هو أنك تعلن أن إنتاجك في "الملك العام" (ال الخواجات بيسموه public domain)، و انك مش طالب أي حاجة من وراه..كدا محبة لفاطمة. و حتى هنا الذوق يقي أنك تعزو العمل لصاحبه حتى مع أنه من حقك تستخدمه بالشكل ال يعجبك و من غير استئذان، لأن الحق الأدبي لا يسقط أبدا. يعني تكتب تحت الصورة "صورة في الملك العام، صورها فلان الفلاني"
الفكرة أنه ماينفعش يتعاملوا مع الناس بالجملة. كل مدون و كل تدوينة منشورة لها ظروفها و لها رخصتها. يتعبوا نفسهم و يقرأوا و يتعلموا يعني إيه "حقوق طبع" و يعني إيه "رخصة حرة" و يعني إيه "ملك عام"..دي أساسيات حرفتهم مش كماليات، و يتعلموا معاني علامات التنصيص، و يتعلموا التلخيص. يرجعوا أولى ابتدائي ثاني لو لزم الأمر، أو يبطلوا صحافة، أو هنقعد نتريق عليهم كدا و على استهبالهم.
____
ازيك يا عبده البرماوي،
مضطر أكرر للمرة المشعارف كم أن فيه حقوق ملكية فكرية تسري على أي وسيط، و أساليب الإثبات ال أنت أشرت لها دي كلها مستخدمة فعلا.
و مضطر أكرر برضه للمرة المشعارف كم أس 2 أن الشركة المُقدمة لخدمة النشر المجاني مش طرف خالص في المعادلة. كل خدمات النشر المجاني ال أعرفها، بما فيها blogspot و blogspirit، تُرجع الملكية الفكرية للمحتوى ال ينشره مستخدميها (و معها المسؤولية الجنائية عن المحتوى المنشور) إلى مستخدم الخدمة، و لا تدعي حيازة الحق الأدبي أو التجاري، و إلا كان ناس كثير جدا ما استخدموهاش من الأصل لأن قوانين بلادهم في الناحية دي مافيهاش هزار (بغض النظر برضو عن أن دا أحيانا بياخد لاتجاهات دراكونية و عبثية تماما لما الشركات تستغله بشكل مُثبِّط للإبداع)، و فيه ناس كثير بيبيعوا المحتوى ال بينشروه على الإنترنت من خلال الخدمات المجانية دي لأطراف أخرى غير خدمات التدوين المجاني ال بيستخدموها. فيسبوك هي الخدمة الجماهيرية الوحيدة ال أعرفها ال تشترط أحقيتها في إعادة استخدام المحتوى ال عليها بالشكل ال هي تراه.
أحب أوضح برضو، على رجاء القيامة، أن البرمجيات مفتوحة المصدر مالهاش دعوة بالمحتوى المنشور باستخدامها. يعني لو من حقك تستخدم برمجية مفتوحة المصدر كوسيلة للنشر، زي وردبرس أو دروبال أو جُوملة، فدا موضوع مختلف تماما عن ملابسات الملكية الفكرية للمحتوى المنشور باستخدامها كأداة. و أغلب الخدمات المجانية زي بلوجسبوت و بلوجسبيريت مش برمجيات مفتوحة المصدر، لكن دا برضه مالهش أي أثر على النقاش دا. و كمان الإعلانات مالهاش أي أثر على الكلام هنا، بغض النظر عن أي توافيق و تباديل من نوع البرمجيات و الرخص و الأدوات مجانية الخدمة من عدمه.
الشي المتفق معك فيه هو موضوع "أنهم لو كانوا جابوا كاتب كانوا هيدفعوله فلوس"...مع أني ماكنتش عاوز أستخدم المنطق دا و عاوز أوصل عن طريق رأس الرجاء الصالح علشان الرحلة هي الغاية زي ما أنت عارف، و مش مهم النتيجة، المهم خطوات الحل.
Posted by: ألِف | 28 February 2009
انا موافقك فى الرأى و خصوصاً بالنسبية للملكية العامة
بس فى ناس قالت اه احنا ملكية عامة و ناس قالت لأ احنا مش ملكية عامة فحقتبس جملة من عندك تبين قصدى
" الفكرة أنه ماينفعش يتعاملوا مع الناس بالجملة "
لازم يتعاملوا مع كل فرد على انه شخص مفرد
فاهم قصدى
Posted by: عباس العبد | 28 February 2009
مفيش داعى لإستخدام إسلوب الإتهام و التقريع دا بينكم يا معشر المدونين طب ايه راأيكم لو تتعاونوا كمدونين و تنشروا على حسابكم كمجموعة بالشكل اللى يرضيكم ، ده يكون جبهة قوية ضد التلاعب فى محتوى مدوناتكم و اقوى من اتباع الطرق القانونية طالما انهم حايغلوا القضى اساساً
و بعدين تعليق أخير لمختار يا أخى مدونتك حلوة و باحب اقراها كتير بس ايه ذنبى كل ما اقراها فى الأغلب اشوف الفاظ خادشه للحياء (بالتقريب كده- لانى ساعات بافهمها بالشبه- و دا لأنى بنت و مصطلاحتنا غير مصطلاحاتكم انت عارف)
كلنا بنشتم اوضاع ما بتعجبناش بس ا لمعنى لو فيه سخرية او حتى شتيمة ممكن يوصل بالتورية بطريق غير مباشر و بالتالى يضيف متعة للقراءة
Posted by: Micho | 03 March 2009
ألف يا صديقى لا تنس إنك ألف، صاحب أوليات، وعليك حق التحمل والتوضيح باعتبارك مرجعية فى الحدوتة بتاعة التدوين، مرجعية تاريخية يعنى،
معلش عندك حق، كلامى فيه التباس، وخطأ. أنا فاهم ان مافيش علاقة بين التكنولوجيا المستخدمة فى وضع المحتوى والملكية المدعاه عليه، مفهوم، بس قصدت أوضح بكلامى عن فكرة مجانية التدوين ان مبتدأ التدوين كان قائم على أغراض لا تجارية، ومسألة الملكية دى دايما تثار لما يبقى فيه سبوبه ولم أحسن التدليل فعذرا
بس برضو عاوز افتى فى العلالقة بين الملكية والعوايد، مش قادر اتفق معاك فى عدم الربط بين قضية الاعلانات وحق مؤلف النص التدوينى، ماهو الحق ده ثبوته لك قانونا معناه انك لو عايز تسيله او تتنازل عن حيازته هاتاخد مقابله فلوس، والاعلانات هى مصدر الدخل الناشئ للشركه عن استخدام نصك كتكئه للإعلان، يعنى نصك كان سبب لورود المعلنين عليهم، وهما شاركو بالتكنولوجيا، فى اتفاقية الاستخدام كتير من المواقع اللى بتستضيف مدونات بدأت باشتراط موافقتك على الاعلانات عشان تاخد الخدمه اللى اسمها مجانيه، وفى ظل الحرب بينهم اغروا المدونين النجوم باستخدام منصاتهم مع المشاركه فى عوائد الاعلانات، والجدل كان بيدور حولين اسهام المدون فى جذب الاعلانات ومن ثم حقه فى نسبه منها زيه زى لعيب الكوره او المذيعه او الممثل اللى بيشترطو نسبة من الاعلانات مع شغلهم
قصره
الأصل فى حق الملكية هو وجود دليل على ثبوت نسب النص لصاحبه وثبوت أصالته وعدم تحريفه عن أصل معروف (ودى مسألة نسبية برضو) والمدونات منسوبه لاصحابها وده واضح فيها واعادة نشرها فى الشروق وغيرها من الوسائط تم فى أغلب الاحيان بالاشارة للمالك اللى هو المدون، طب انتو عرفتو المالك ما احترمتهوش ليه
ربما هما بيعرضوه كأنه رأى، يعنى ببساطه لو نانسى عجرم قالت فى حوار لمجلة سين انها بتكره جوزها وجه حد اعاد نشر الكلام ده هنا مافيش ملكية فكريه، ده بابلك نولدج، بس لما اكتب نص كامل عن قضية ويتاخد بحذافيره ويتحط كمقال فده عيب ونهب ومتفق معاك إنهم بيجادلو فيه ودى مسألة سخيفة
ومنك برضو نستفيد يا ألف
محبتى
Posted by: عبده البرماوى | 08 March 2009
لم أقل المهم الرحلة وليست النتيجة، دى ميكيافيلية معكوسه، قالوا المتعة فى الرحلة وليست فى الوصول وده كلام متصوفه باحبه
قلته مره تقريبا عندك فى المدونه
مش فاكر
جنون البقر خرم مخى
Posted by: عبده البرماوى | 08 March 2009
السلام عليكم ورحمت الله وبركاتة والسلام على اهل السلام اماانتم ياجزائر عليكم اللعنة ليوم الدين كفر وفسق وفجور وعهر وصهينا يعنى كلة على كلة انتم حتى ماينفعش يسمومكوا عرب انتم بربر قبايل همج همج وانتم ولا حاجة عشان تهينوا اسيادكم المصريين يابيئة وسيظل علم بلدى مصر ام الدنيا يرفرف على الدنيا وينثر بالجو حمام السلام والخير والامل .اللهم انصر المصريين والعن الجزائرين امين اللهم ارفع من شان مصر وانزل الجزائر لاسفل السافلين امين اللهم حبب بينا خلققك جميعا وزود كرة العالم بالجزائرين امين امين امين
Posted by: رورو | 22 November 2009
Post a comment