09 May 2006
حتي لا يأكلنا التنين الكافر
رغم شعوري بالقرف من أولئك الشمتانين في علاء الا أنني استطعت أن أكتب لهم هذه القطعة وربنا ما يحرمهم من التقوي والورع... صحيح أنا ماخرجتش معاك في مظاهرة يا علاء ولا اعتقلوني زيك بس عزائي الوحيد اني أجاهد هؤلاء المؤمنين الأتقياء اللي بيشتموك... يمكن حد فيهم يفهم ان في رب واحد يحاسب ويحكم وان دينهم اللي بيتغنوا بيه حارب ظلم العباد للعباد. جاتكو القرف في تدينكم المخصي
الشعب كله ... هدية ..اقبلنا
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
جمالك راسمالك و كل مالنا
قالولي اشمعني
قلتلهم و احنا مالنا
نفكر ليه في أحفادنا وعيالنا
أحسن حاجة نكون في حالنا
عشان يبقي لمصر جمالها
اللي هو من جمالك ومن جمالنا.
بنبوس الأيادي: اقبلنا
نكون شعبك
حلفتك بربك
والله لتقبلنا
بكل عبطنا وهبلنا
عشان حاضرنا و مستقبلنا
وحياة النبي وسيدنا الخضر ويسوع اقبلنا
أنا فاطمة وأنا كريستين؛ وهنا محمد وحنا.
هممم ؟ هاتقبلنا ؟
مفيش مظاهرات تاني – احنا خلاص قفلنا
ورجعنا لسابق حالنا
وكل أملنا
ان كل اللي دار في خيالنا
عن مواضيع زعلتك وبتزعلنا
عملها شوية جهلة من عيالنا
وبعض من بناتنا ورجالنا –
أملنا أنك تدوس عليها زي أشبالنا –
زي أشبالنا ما بيدوسوا علي رمالنا
لأن خلاص احنا أحبالنا
الصوتية وكل أقولنا وأفعالنا
مالهاش غير معني واحد: اقبلنا.
خلاص رمينا الحمل كله عليك
ورحنا أشغالنا
والبركة بقي فيك
تراعي حالنا ومالنا وعيالنا
عشان من ورا غربالنا
احنا قررنا نشوف حالنا.
بنقولك في عيدك
اقبلنا نكون عبيدك
تحت رجلك ورهن اشارة من ايدك
اقبلنا
والحقنا انهاردة قبل ما يكون التنين أكلنا
من غيرك ما نعرف يميننا من شمالنا
اهدنا الي سواء الصراط
هوه احنا اتهبلنا
عشان نبيع فدان أمان
ونشتري في أمريكا قيراط
ده حتي يبقي خرا وطينة وظراط
خلاص اتفقنا وعليك توكلنا
أصل احنا مش هانبطل عياط
الا لما تقبلنا
17:20 Posted in Jingoistic Poetry | Permalink | Comments (8) | Email this
04 May 2006
طاعة ولي الأمر
ـــــــــــــــــــــــــــــــــــــــــ
أحه بجد أحه
عايزينه يسيبها
بعد ما حارب وضحي
وضيع راحة باله والصحه
دا لو يجيلها
واحد من صحاريها أو شط نيلها
عشان يصلح عيبها
مش هتلاقو
واحد في شهامته وأخلاقه
وقال ايه عايزينه يسيبها
وكأنه مش راعيها
وكأنه هو ديبها
وكأنه هوه اللي ناهبها
أو شايف أهلها بينهبوا وسايبها
ده هوه حبيبنا وحبيبها
وبيحاسب اللي خاربها
ويضربه علي ايده دحه
يبقي اللي عايزه يسيبها
يستحق نقلّه أحه.
ــــــــــــــــــــــــــــــــــــــــــــــــ أحه ـــــــــــــــــــــــــــــــــــــــــــــــــــــــ
ومرضانين بالبرد والكحة
ولسة عايزينه يسيبها
ياخي أحه
ده وجوده لوحده شفا
وحضنه سلام ودفا
وطبطبته علي الدماغ والقفا
ينسوا الواحد مننا
اللي ضاع من كرامتنا وعرضنا
واللي فقدناه في البحر من دمنا
دا حتي لو كلنا
متنا من البرد في معتقل في الشتا
عشان شذوذنا أو لأن دقننا منبتّة
أو بسبب مظاهرة ملفتة
كله يهون في سبيلك يا مولانا
أصل طاعة ولي الأمر واجب
والعين عمرها ما تعلي عن الحاجب
إلا وانت بتقول أحه
واللي عايزك تسيبها
أقوله: ده ربنا حبانا
ومحلاها دي النعمة
واللي يكرهها يعمي
وتروح منه الصحة
لأنه موقفش معانا
واحنا بنقول للّي عايز مولانا
يسيبها ويتنحي
11:35 Posted in Jingoistic Poetry | Permalink | Comments (1) | Email this | Tags: Jingoism, poem, Salafism, politics