UnbraInwasher ® مخـــ العزيزي ــتـار - kernel_translation

أولاد الذئاب

noreply@blogspirit.com (Mukhtar Al ِAzizi) — Tue, 31 Jul 2007 13:55:00 +0300

مقال أفنري الأخير تمت بهرزته في وقت سابق اليوم. وطبعا الحكمة القديمة تقول أن البهرزة لا تغني عن قراءة النص المبهرز.

--------------------------------

الأسبوع اللي فات جيمس وولفسون عمل مقابلة صحفية مع هآرتس، قال فيها من المنقي يا خيار ومن غير كسوف ، ولخّص الكام شهر اللي هو قضاهم كمبعوث خاص لمنطقة الشرخ الأوسط، نفس المهمة اللي حطت علي دماغ توني بلير بعد ما بريطانيا استغنت عن خدماته كدلدول لجورج بوش.

وبجد يعني المقابلة دي المفروض يكون عنوانها: حلقة في ودانك يا بلير.

ولما تيجي سيرة جيمس وولفسون تلاقي نفسك بتفتكر علطول بول وولفوويتز، لكن يا تري إيه حجم المشتركات اللي بين الشخصين دول؟ سؤال حلو ويفتّح المخ عالصبح.

بداية الاتنين يهود يعني يعتبروا إخوان في الشمعدان، والاتنين يبقوا أولاد ذئب اللي هو وولف. وكمان الاتنين قعدوا علي كرسي البنك الدولي. يااه دا فعلا في تشابهات مش قليلة بجد. بس الحقيقة التشابهات بتنتهي لحد كده وتبدأ الاختلافات في كل المناحي (من أول مناحي بيجين لغاية مناحي شارعنا كده).

أولا كده جيمس وولفسون شخص جذاب يعني من الآخر كده بيلعلط إشعاعات تجذبك له، يا بن اللذين تقولش مركب مغماطيس في دبوس الجرافطّه!!! في حين إن بول وولفويتز بني آدم خرا وعلي النقيض تماما. وده كان واضح جدا في الوظيفة اللي مسكوها في البنك الدولي لما وولفويتز جه بعد وولفسون علطول. ولفسون كان محبوب قوي في حين إن وولفويتز كان مكروه عمي. وكمان مدة وولفسون في الوظيفة تم تجديدها ودي حاجة نادرة أصلا في حين إن الخرية التاني لبس صباع ابراهيم باشا في أقرب فرصة بعد الجُرسة اللي حصلتله لما إدي المُزّة بتاعته في البنك مرتب فلكي، تقولش عزبة أبوه ولاّ يكونش فاكر نفسه في مصر.

والاتنين بيفصلهم فجوة كبيرة جدا، بالنسبة لي شخصيا همه بيمثلوا طرفي النقيض في الوجود اليهودي المعاصر.

وولفسون راجل هيوماني، له نظرة كونية، متفاءل، رجل سلام ومفاوضات، وهو وريث شرعي لحكمة الأسلاف.

وولفويتز بينتمي للتيار المتعصب عند اليهود ، متغطرس وفاكر نفسه تامر حسني، قفصه الصدري فيه خنازير كلها كراهية وعشق للسلطة، راديكالي، عنده عصبية قومية متعرفش اذا كان لأمريكا ولا اسرائيل، وهو حامل لواء المحافظين الجدد اللي أصلا معظمهم يهود وهمه اللي بيدفعوا أمريكا للمجاري العراقية وبيشجعوا الحروب في منطقة الشرخ الأوسط كلها وبينصحوا رئيس حكومة اسرائيل أنه يضحي بكل حاجة في سبيل القتال المستمر حتي آخر قطرة دم في شريان آخر جندي اسرائيلي.

وولفسون قال في المقابلة الصحفية دي كلام يزعل بعض الاسرائيليين اللي فاكرين أنهم مركز العالم. بس الراجل ده جاب الإبرة وفرقع البالونة دي في وشهم. وقال: الغرب بس هو اللي مهتم بالصراع العربي الاسرائيلي إنما بقية العالم ضاربها صرمة ومنفض؛ أنا زرت مية وأربعين دولة وبجد بجد يا جماعة مفيش حد مهتم أصلا بوجودكم من عدمه.

تحت إمرة الأخ الأكبر

noreply@blogspirit.com (Mukhtar Al ِAzizi) — Thu, 19 Jul 2007 17:05:00 +0300

وإذ به يقارن بين جورج بوش والأخ الأكبر فقد تمت بهرزة هذا المقال

---------------------------

في رائعة أورويل 1984، تكلم عن قيام الدولة الشمولية بعملية تغيير مستمر للأحداث التي حدثت مؤخرا والتاريخ الحديث الذي يفترض أنه عالق في الأذهان وذلك حتي يكون الأمر كله للأخ الأكبر. التفسيرات والأخبار والأوامر السابقة تذهب إلي ثقب الذاكرة الأسود حيث يتم سحق كل ما يلقي هناك بشكل يومي وتقديم ملفات وأقوال وأوامر جديدة لا تلبث أن تصطف في طابور وديع وطيّع وليّن من الأخبار والتفسيرات القديمة تمهيدا للسقوط في الهاوية – أيضا.

مش واخد بالك إنت إن الكلام الكبير اللي فوق ده بيفكرك بحاجة كده في الواقع عن بلد شقيق؟

أي أمريكاوي مفتح ومدقدق – مش هاقول يبقي واد مخربش وبتاع ثقافة – يقدر يلاحظ التطابق المذهل بين كلام أورويل والواقع اللي بيعيشه في أمريكا.

فكر كده بدماغ عالية حبتين وارفع السلطانية اللي انت لابسها بحيث تبقي بعيد عن مستوي نظرك وودانك الاتنين اللي عايزين الفرم. واسأل نفسك، هو إدارة بوش قدمت كام تفسير لفشلها في العراق؟

بعد ما بوش طلع في مايو 2003 وأعلن في حركة مسرحية هبلة أن "المهمة تمت بنجاح" لقينا الواقع بيقول إن المهمة لم تنتهي، وإن الست نجاح لسة مخرجتش من باب الحمام وكل خد عليه خوخة، ومن ساعتها وبن المفكوكة ده رابط دماغه من الدوخة.

الباشمهندسين قالوا للشعب الأمريكي الطيب الصبور المهاود الذي يعرف قيمة الحرية وحقوق الإنسان وبشاعة الظلم وحلاوة العدل – قالو إن السبب وراء هذا الوضع المستخوزق اللي أمريكا فيه هو ألفين نقول تلات ألاف إرهابي عربي كانوا بيبيعوا بمب وصواريخ من بتاعة العيد ورمضان للأطفال مع تسجيل لأغنية أهلا أهلا بالعيد بتاعة شادية لطفي ونجلاء أبو السعود، وقد قامت فلول حزب البعث باستغلال خبرة هؤلاء الإرهابيين في صناعة البمب وكذلك استغلال كراهيتهم لأمريكا – باركها الرب – وشحنوهم بأفكار عن مفهوم المقاومة وما إلي ذلك من تراثهم الشرقي المتعصب.

فاكر يا عم النجم ياللي بتقرأ المقالة بتاعتي دي لما الإعلام الأمركي بتاعنا سحب علبة الكوتشينة المضروبة في كشك السجاير بتاع وزارة البنتاجون – الكشك بتاع رمزيفيلد وديك أمه تشيني؟ ساعتها قلنا بس، الموضوع كله عبارة عن كام نفر همه اللي مولعين الدنيا وبينفخوا البلالين ويفرقعوها. نلم الليلة دي والعراق بقي في جيبنا. عنب يا ريس واعصر كويس.

المواطنين الأمريكان كانوا بياخدو جرعات بمزاجهم من الإعلام والبنتاجون وباقي المواخير. والكلام كان كله ماشي في سكة واحدة:

إحنا رعاة البقر الجامدين .. جينا أمريكا وفشخنا الهنود الحمر .. معانا مارلبورو وحبال طويلة ومسدسات وشراميط .. أفلام هولييوود تشهد بكده .. بمجرد ما يقع صدام وشلته الفاشلة العراقيين هيجيبولنا فلاورز وقلوب حمرا زي بتاعة فالنتاين ومش بعيد يكافئونا ويورونا صورة السندباد الحقيقية وتمثال عطيل اللي ياما قرينا عنه في شسكبير وحكي لنا عنه إدوارد لين وجميع الرحالة الأبطال.

يا صباح النفخ! خش علي المكنة بضهرك يا مواطن.

لما المحاكمات والإعدامات والذي منه مجبش نتيجة، الإدارة الأمريكية عملت إيه؟

ردمت علي الكلام القديم وأمرت الأخ الموظف المثالي وينستون سميث أنه يفرم الكلام ده في خرم الذاكرة ويستبدله بكلام جديد مالوش علاقة بالقديم.

التفسير الجديد كان إن سوريا (الدولة التي تملك أسلحة الدمار الشامل وتأوي الإرهابيين ومتهمة بالضلوع في اغتيال إبراهام لينكولن، مانتو عارفين الكلام ده كله) بتسرب مقاتلين أجانب من خلال حدودها مع العراق عشان يرتكبو جريمة الجهاد ضد جيش التحرير الأمريكي!! ياللهول

ولما الأمريكان طقت في دماغهم يعملوا حكومة عراقية (وطنية) كان واضح طبعا إن غالبية الحكومة هتكون للشيعة، يبقي مين الشاطر اللي يقول مين همة الإرهابيين؟ برافو عليك، مجموعات وجماعات من السُنّة.

خش ع التفسير الجديد.

فاكر يا برنس لما كنا بندرس زمان تصريفات الأفعال الإنجليزي في إعدادي؟ وكانوا بيحفظونا الأفعال الشاذة كمان. فاكر؟ طيب تقدر تقوللي إيه الفرق بين مادة النحو والصرف ومنظمة القاعدة؟

غلب حمارك؟ أقولك أنا يا عربجي.

الفرق إن كل قاعدة وليها شواذ إلا تنظيم القاعدة؛ ماشي في سكة الهيتروسيكشوال ميرجعش.

أمريكا بدأت تلوم القاعدة، وبقت قاعدة عندهم وعند الاعلام إن أي تقرير أو خبر أو دراسة أو مقال أو كتاب يطلع يتكلم عن مسئولية القاعدة عن اللي بيحصل في العراق. ده القاعدة دي طلعت منظمة متجاوزة للتاريخ والجغرافيا وأكبر من أي قاعدة حفظتها في حياتك يا متعلم يا بتاع المذكرات.

ومن ساعتها وبقت لبانة في بق كل غندورة منهم؛ الصحافة قعدت تؤكد إن دي مش حرب أهلية ولا زملكاوية، دي القاعدة الارهابية هي عندها مسئولية. وهكذا تمكن المعلم الظُمبيطي صاحب توكيل مصنع الخردوات وشركاه أنهم ينعشوا مخاوف الأمريكان من خطر القاعدة والإرهاب علي أمريكا وانجلترا وبلاد ما وراء بحر الظلمات.

اااه بس تفسير القاعدة ده وقف بسرعة في طابور التفسيرات اللي هتترمي في مزبلة الذاكرة القومية. شايف واحد مش فاهم وبيرفع إيده في آخر الأتوبيس. حاضر هاشرحلك.

القاء اللوم علي القاعدة معناه إيه؟

معناه ضمنيا إن المعلم الظُمبيطي رئيس أمريكا بيناقض نفسه لأنه قبل ما يضرب العراق وأفغانستان قال إن الحرب دي مش عشاني يا إخواننا لأ دي عشان أحمي شعبي من القاعدة، يبقي إزاي دلوقتي وجود أمريكا في العراق بيقوي شوكة القاعدة!!!!؟؟؟هي القاعدة لما تنضرب تقوم تبقي أقوي؟ صعبة صحيح... يبقي معني كده إن حد هيروح يقول لبوش طيب عشان كده بقي سيب العراق يابن الجزمة عشان تنظيم القاعدة يسكت.

طيب وهو بوش هيسيب العراق؟

عشان كده كان لازم تفسير القاعدة ده كمان يتفرم في مزبلة الذاكرة القومية الأمريكية ويحل محله تفسير جديد لانج وهو إن الارهاب جاي من عند إيران.

مين فين وبيعمل إيه إمتي؟؟

وهكذا ذهبت التفسيرات القديمة ضحايا للتفسيرات الأحدث تماما كما تذهب الموضات الأقدم ليحل محلها موضات أحدث، والتكرار والتهييص والتطبيل وظيفتهم تثبيت الجديد.

وعلي نفس منوال وزارة "الحقيقة" بتاعة الأخ الأكبر عند جورج أورويل تعمل المؤسسات الإعلامية في أمريكا وانجلترا. تفسير انهاردة بيموت بكره ويتولد غيره ويموت بعده ويجي الجديد وينسي الجماهير القديم وهكذا دوخيهم يا لمونة.

طيب اسمع النكتة دي.

من كام يوم بيقولك ان التقارير جاية طازة يا معلم وبتقول إن "الجيش الأمريكاوي اكتشف منطقة فيها منصات لإطلاق الصواريخ قريبة من قاعدة عسكرية أمريكية جنوب بغداد وفيها أربعة وتلاتين قذيفة مصنوعة في إيران".

ياااه؟ يعني الارهابيين الكخة تجيلهم الجرأة يشيلوا كل الأسلحة دي قريب من قاعدة أمريكية، لأ وإيه الأمريكان ماضربوش المنطقة دي بأي أسلحة ولا قنابل عنقودية ولا صواريخ وسابوها عشان تُكتشف؟

مش الموقف ده بيفكرك بعبد العال وهو بيقول لحسب الله: كل شئ انكشفن وبان.

يانهار أسود!! واستكمالا للعزف المنفرد ده التقارير الصحفية باردو قالت إيه: "وجدير بالذكر أن القادة الأمريكان قد أكدوا أن إيران وعناصر من حزب الله تقدم الدعم والتدريب للارهابيين العراقيين". ياااااا حلاوة

خد بالك يا مواطن إن مفيش تفسير واحد يوحد ربنا طلع يقول إن الاحتلال نفسه هو سبب البلاوي دي كلها، التفسيرات كلها بتلوم أي حد تاني غير أمريكا.

لسة باردو المفروض نقبل الادعاءات الساذجة اللي بتقول إن أمريكا بلد حر ومفتوح والصحافة فيه حرة والحكومة ممكن تتحاسب قدام الشعب؟؟

ملتزم بدينه

noreply@blogspirit.com (Mukhtar Al ِAzizi) — Wed, 18 Jul 2007 14:10:00 +0300

عثرت اليوم علي تدوينة عند أورجانيك مسلمة فرأيت أنها تستوجب البهرزة.

-------------------------------

مسلم ملتزم، المصطلح ده انتشر من فترة وكأنه الموبايل تسعة تسعمية زي اللي مش معايا كده، وبقي بيستخدم بالتبادل مع كلمة "متدين". وتقريبا لما سيادتك – لو سعيد الحظ – بتوصل للمرتبة بتاعة المسلم الملتزم دي بيتم التعامل معاك بشكل مختلف، ويمكن كمان يصرفولك كتاب الشفرات السرية الخاصة بتنظيم المسلمين الملتزمين بما إنك بقيت واحد من المتقين، وبالتالي تحجز لنفسك مكان في نادي الجنة، وتتحمل المسئولية الملقاة علي عاتقك لإنقاذ أرواح العباد "اللي مش ملتزمين" وتزحزهم عن الكوردون بتاع جهنم. مهمة انتحارية وعايزة شاب أو شاباية منقوعين في برميل الإلتزام.

طيب السؤال دوقتي، إزاي تعرف المسلم الملتزم من اللي مش ملتزم؟

الحقيقة لم يسعدني الزمان بالإطلاع علي التجارب الكيميائية التي يمر من خلالها الإنسان المسلم حتي يخرج من الفتحة الأخري للآلة العجيبة من المصنع العجيب بتاع التعليب والتصنيف، مغلفا في علبة أو كرتونة أو كيس بلاستيك وقد تم وضع استيكر أو ملصق يبين لنا نوعه ودرجة إلتزامه ونسبة التقوي في شرايينه ومعدل الإخلاص في الكبد والبنكرياس عند سيادته.

ومع ذلك، في حاجات أنا لاحظتها وتقريبا هي البنود اللي بيستند إليها جماعة المصنفين لتحديد درجة إلتزام الآخرين، وهي كالتالي:

لحية للرجل وحجاب للمرأة (طول اللحية والنقاب من العوامل الهامة في تحديد نسبة التقوي في الدم)

حضور منتظم للصلوات وحلقات التعليم في المسجد

تكرار كلمات مثل سبحان الله، ما شاء الله، الله أكبر كل ثانيتين في أي حوار

التباكي علي حقارة الدنيا، والشر الذي هاج وماج، وعدد الأرواح التي ينبغي عليك أن تهديها إلي الصراط المستقيم قبل أن يحل ظلام الليل البهيم

الاعتقاد أن التلفاز هو مبولة الشيطان

النظر إلي معظم البشر حولك علي أنهم أقل تدينا

ترتدي قميصا مطبوع عليه "القدس إسلامية"، تستعمل السواك كل ربع ساعة، تمشي والسبحة مدلدلة من طرف صوابع إيدك اليمين، زبيبة الصلاة، قراءة القرآن في المواصلات العامة بصوت عالي، تلبس زي الباكستانيين.

خصخصة النسوان

noreply@blogspirit.com (Mukhtar Al ِAzizi) — Thu, 12 Jul 2007 14:30:00 +0300

أعجبني المقال فقمت ببهرزته منذ قليل.

الكاتبة:

ديبورا ماكنت، ناشطة نسوية ضد الحرب وباحثة تعيش في أوليمبيا، واشنطن

------------------------------------------

مش جديد عليكم أنكم تعرفوا إن تسهيل الدعارة للقواعد العسكرية الأمريكية بيتم في الفلبين وكوريا الجنوبية وتايلاند ودول أخري كان من سوء طالع أهلها أن أصبحت مرتعا لكلاب الجيش الأمريكي.

بس من ساعة ما أمريكا شحنت قواتها العسكرية علي كذا دولة إسلامية فمش هينفع تسهيل الدعارة بكل فُجر وبجاحة لجنودها داخل حدود الدول دي. وجود القوات الأمريكية من وقت حرب الخليج واعتداءها علي أفغانستان والعراق سمح بشكل كبير للدعارة أنها تنتعش في الشرق الأوسط. لكن مجتمعات الشرق الأوسط مختلفة طبعا عن الفلبين وكوريا وتايلاند. فتسهيل الدعارة مش بيتم بشكل علني قح.

الجيش الأمريكي بيعتمد في تسهيل التجارة دي علي مقاولين خصوصي، والموضوع مبقاش بعيد عن الاهتمام الجماهيري. الريحة فاحت والعفانة طفحت واللي مالوش مناخير بقي بيشم بودانه. لكن في اهتمام قليل بمحاولات المقاولين دول تغيير طبيعة وشكل تسهيل الدعارة للجيش، وأشهر فضيحة معروفة كمثال هي فضيحة شركة دينكورب التي قبض علي عاملين بها وهم يسهلون تجارة الرقيق في البوسنة وفي دلائل تشير الي أنهم متورطين في نفس الأعمال في العراق.

أنا باشتغل في أبحاث عن قيام المقاولين الخصوصيين بتسهيل تجارة الرقيق لصالح الجيش في العراق وأفغانستان والإمارات ودول اسلامية أخري. وتحديدا إهتمامي منصب علي البحث في تغير وسائل تسهيل الدعارة المنظمة بشكل مؤسسي لصالح الجيش الأمريكي، وكمان في قيام مقاولين مدنيين بتشجيع الدعارة باستخدام النساء من الدول التي يتواجد فيها الجيش الأمريكي أو عن طريق جلب الأجنبيات لممارسة الدعارة في المناطق التي يتواجد فيها جنود أمريكا لكن تحت قناع التوظيف في المطابخ أو كمربيات أو حتي سكرتيرات (بما أنهم في دول إسلامية). وهاشوف بقي هل فعلا بيجيبوا الواحدة من إياهم علي أساس إنها بتشتغل في المطبخ والحقيقة إن شغلها مالوش دعوة بالطبيخ التقليدي اللي كل الستات الشريفات يسمعوا عنه.

سين سين: سرمحة وسكس

أثناء حرب الخليج الجيش الأمريكي منع تسهيل الدعارة للقوات في السعودية عشان القلق بقي ومكنتش الحكاية طالبة وجع دماغ. لكن القوات دي وهي راجعة أمريكا نزلت تايلاند عشان "سين & سين" يعني السرمحة والسكس لا مؤاخذة. بعد حرب الخليج وبسبب العقوبات الاقتصادية المفروضة علي العراق في نساء عراقيات اضطروا لامتهان الدعارة لدرجة ان التجارة وسعت جدا ؛ راح صدام حسين أمر جنوده في عام 1999 أنهم يعملوا غارات علي المواخير والعوّامات والشقق المشبوهة والحواكير وجامعة الدول والهرم وفعلا تم اعدام كذا واحدة في الهوجة دي.

الاحتلال الأمريكي للعراق في 2003 كان سبب في انتعاش التجارة القذرة دي تاني في خلال أسابيع، والمثل بيقول: ولاد الزانية (اللي همة جيش أمريكا يعني) ييجو والخرا في كعوبهم. الاحتلال دلوقتي بيعتمد بشكل كبير علي شركات الأمن الخاصة ، والوثيقة اللي مضاها بوش في 2006 بتحريم تجارة البشر لسة ماطبقتش علي الناس دي.

دعارة؟ فتّش عن الاحتلال الأمريكي

انتعاش الاتجار بالبشر خلق جو من الرعب والخوف في المجتمع العراقي ودلوقتي الناس هناك بيقفلوا بيوتهم بالضبة والمفتاح علي بناتهم عشان خايفين يتعرضوا للقتل أو الاغتصاب أو الخطف عن طريق القوّادين اللي بيسهلوا الدعارة بشكل منظم. وفي عصابات بيجبروا بعض العائلات أنهم يرموا أطفالهم في دايرة الشيطان دي. ومن المنطقي جدا إن الاعتداء الأمريكي علي العراق والقتل والتفجيرات والاعتقالات والغارات تخلق أعداد ماهولة من البنات والأولاد من غير مأوي ومن غير عائلة تضمن لهم الأمن وبكده يكونوا قطعوا طريق طويل للدعارة وأصبحوا فريسة لتجار الرقيق.

مش بس كده، الاحتلال الأمريكي كمان خلق أعداد كبيرة من النساء اللاجئات وظروفهم الاقتصادية بتدفعهم للدعارة في الأردن وسوريا واليمن والامارات.

الاحتلال الأمريكي الغاشم مش بس بيهاجم النساء من الخارج، ده كمان بيهاجم كل ذرة كبرياء وكرامة في كيانهم الانساني.

وفي توثيق لجرائم بعض الشركات اللي بتهرب النساء داخل العراق لممارسة الدعارة.

في مواخير اتفتحت في المنطقة الخضرا في بغداد بس طبعا في المستخبي تحت أسماء مختلفة فمثلا يبقي اسم المكان مأوي للنساء أو كوافير حريمي أو مطعم صيني لكن عادة السلطات هناك بتجيب الضُرَف أول ما بيرسوا علي الدور ويعرفوا اللي فيها. في جندي احتياطي في الجيش قال قبل ما يسيب العراق في 2005 : الأسعار هنا رخيصة دولسي خالص، يا جدع دا انت لو بتطلع علبة السجاير من جيبك ووقع منك دولار في الأرض هتلاقي واحدة بتقولك يلزمني الدولار ده يا خواجة، ما تيجي ساعة لقلبك.

وزي ما سارة مندلسون كتبت في تقريرها مواخير بإذن الغفير، قالت إن البروتوكولات اللي الحكومات بتمضيها لمنع الدعارة مجرد حبر علي ورق ومفيش حد بيطبق حاجة لأن البلاد المحتلة دي مالهاش صاحب، فالموضوع بيبقي كلام صالونات حلاقة وخلاص. والمسئولين في الجيش الأمريكي يهمهم إن الجنود يحتفظوا بالمعنويات العالية، وممارسة الجنس سبب في كده فمش معقول هيضيعوا معنويات الجنود اللي همه أصلا جزء من منظومة الثقافة الأمريكية التي تعلي من قيمة الجنس. فعادي جدا المسئولين عارفين كل حاجة بس بينفّضوا ، أصل الفكرة إيه إنهم أصلا استباحوا الأرض، يبقي إيه بقي اللي هيخليهم يخافوا من استباحة العِرض؟

والهدف من البحث بتاعي مش بس فضح الجرائم دي لكن كمان تكوين حركة لمناهضة انتشار الدعارة التي يرعاها الجيش الأمريكي كجزء من توفير سبل الراحة لجنوده. والنقطة المهمة هنا هي إزاي إن الاحتلال الأمريكي بيساعد علي خلق طواغيت يتحكموا في النساء ويدمروا كرامتهم الانسانية، ودي مسئولية كل الأمريكان أنهم يضعوا نهاية للاحتلال الأمريكي للعراق.

عرايص خشب أو حكومة باربي

noreply@blogspirit.com (Mukhtar Al ِAzizi) — Mon, 09 Jul 2007 11:50:00 +0300

أعجبني هذا المقال حينما قرأته أمس فقلت ولِمَ لا أُبهرزُه اليوم علي مدونتي؟ وكان ما كان

هيلاري كلينتون، حرم الدون جوان كيلونتون، بتلوم الحكومة العراقية لأنها فشلت في تحقيق أي تقدم أو حتي مجرد الارتفاع سنتيمترات قليلة فوق سطح الخرا اللي بيعوموا فيه من غير مايوهات. مدام هيلاري قالت "القوات الأمريكية المشلحة نجحت في العراق". طبعا المستمعين تنّحوا، واللي جاله سكتة قلبية، واللي بلبع ست حبايات فياجرا عشان الدم يضرب في نفوخه يمكن يفهم حاجة واللي حصلّها تشنج لحد ما مناخيرها بقت بسبع فتحات.

بتقولي إيه؟ القوات الأمريكية المشلحة نجحت فين يا أُختششي؟؟؟

المهم إنها لما لقت معظم الرجالة جالهم هبوط حاد في الدورة الشهرية ومعظم الستات اللي حاضرين جالهم التهاب في البروستاتا راحت بسلامتها تشرح الجملة العويصة اللي فاتت، فقالت – فضّ الله فيها – "أيوه والنعمة الشريفة قواتنا نجحت، أومال مين اللي شال صدّام حسين، ومين اللي رصف طريق الديمقراطية والانتخابات النزيهة للعراقيين؟؟ طبعا مش أوغندا وبالتأكيد مش بلاد فارس ولا خادم الحرمين الشريفين. إنها أمرييييكا يا جدعان. لكن بقي، يا أحبائي المستمعين، الحكومة العراقية فشلت في إدارة الأمور. طيب قولولي كده أمريكا تعمل إيه تاني؟؟ احتلال وحصل، قتل وتشريد للبشر وتم بنجاح، خلع صدام وأديه اتخلع، اغتصاب وحرق ونهب وقتل وتشويه وسرقة للنفط وباردو قمنا بيه علي أكمل وجه، ديمقراطية وأدينا زرعناها وسبنالهم كمان اتناشر شوال سماد ديمقراطي وشوية مبيدات حشرية لمقاومة الارهاب، يبقي إيه اللي ناقص تاني عشان نعمل تقييم لتجربتنا في العراق. يا جماعة بقولكم نجحنا هناك، طيب وشرف جوزي كيلونتون إحنا نجحنا".

طبعا صيحات الاستنكار ردا علي الخرا اللي كانت بتشخه هيلاري مش محتاجة وصف ولا شرح. أما الاتنين التانيين المرشحين للرئاسة، أوباما وإدوارد، اتكلموا باردو في نفس المؤتمر وطبعا وجهوا اللوم لجورج بوش وأصروا علي موقفهم بسحب سريع لقوات الاحتلال الأمريكية الإرهابية.

أرجع تاني للحلوة هيلاري. إيه يا بت الحلاوة والطعامة دي!! جاتها نكد اللي عايزة خلف عالصبح! موقف هيلاري اللي قالته في المؤتمر بيوضح أنها بتأمّن علي كلام بوش زي البغبغان وخلاص. المغفل ده بيطلع يقول إن الحكومة العراقية لها سيادة كاملة وهي باردو بتشخ نفس الخرا، بياكلوا من طبق واحد ولاّ إيه؟

في شهر يونيو وزير الدفاع الجديد روبرت جيص راح زيارة للعراق وطبعا قرص الحكومة من ودانها لأنها مش بتحقق تقدم. ساعات باحس إن الأمريكان ماسكين خرزانة وفي طرفها سلك كهربا مجدول، وماشين ورا الحكومة العراقية اللي عاملة زي الحمار الحصاوي، ونازلين فيهم ضرب بالسلك ده: شييييي حاااااا، انتوا مش بتتقدموا ليه!!؟؟ وهكذا كل شوية واحد من الإدارة الأمريكية ينزل ضرب في الحمار العراقي، قصدي في الحكومة العراقية.

الأنيل من كده إن الإرهابي دونالد رامسفيلس اللي عيد ميلاده انهاردة عمل نفس الموقف، وباردو الغندورة كوندليزا هايص بتلوم الحكومة العراقية.

يا ولاد المفكوكة!! ولا في دم ولا إحساس

بقي تروحوا تجيبوا ممثلين كومبارس عشان يمسكوا العراق بعد ما خلعتوا صدام وتتحكموا فيهم زي العرايس الخشب وفي الآخر تلوموهم علي أخطاءكم؟؟ هو اللي بيحرك العرايس في المسرح بيلوم العرايس علي سوء أداءها؟

هيلاري مش مقتنعة ولا أصلا بيجي في خيالها إنها تندم علي دعمها للعدوان علي العراق في يوم من الأيام. فهي مش مقتنعة إن ده عدوان ولا أنه غير أخلاقي وليس له مبرر. وبالتالي مش هنشوفها في يوم تطلع وتقول: أنا غلطانة إني وافقت علي ضرب العراق.

موقف هيلاري من العدوان علي العراق مش بس يخلي الواحد يقلق من مستوي أخلاقياتها – اللي هي خرا زي ماهو واضح – ده كمان يخلي الواحد يشك في مستوي ذكاءها، هي متخيلة يعني أنها ممكن توكّل الناس الأونطة بالمنطق الخايب بتاعها ده؟ قال قوات الاحتلال نجحت في العراق قال!!! يا شيخة روحي اتلهي كده ولاّ شوفيلك طشت تستحمي فيه يمكن دماغك تنضف.

ولاّ تكونش هيلاري صدقت الغندورة كوندليزا مايص اللي قالت (وقت ما كانت مستشارة السمن القومي) إن العرايص (مش جمع عرص) الخشب اللي اختارتها إدارة بوش لحكم العراق مش عرايس أمركاني زي باربي، وأنهم ناس حلوين ومقطقطين بشكل منقطع الإنفشاخ؟؟ صدقتي يا هيلاري كلام الغندورة اللي قالته في 2004 في شهر يونيو باردو؟؟

جري إيه يا روح أمك،إنتي ضاربة طبق مستهبلة بالمكسرات عالصبح؟ هو إنتي ما شفتيش تقرير الأمم المنفشخة اللي قالت فيه إن أكتر من أربعة وتلاتين ألف مدني اتقتلوا في عام 2006؟ وإن ستة وتلاتين ألف مصابين؟ وأصلا الأرقام دي هي الحد الأدني للتعداد.

العراق مشرحة مش واحة ديمقراطية يا روح جوزك.

وده غير سبعة وتلاتين ألف سجين عراقي وكتير منهم بدون تهمة أو محاكمة، واتناشر ألف طبيب هربوا من البلد، و 54% من العراقيين معدل دخلهم اليومي أقل من دولار أمريكي واحد. البطالة تقريبا 70%.

مين اللي فشخ العراق كده، صدام حسين ولا الاحتلال الأمريكي اللي عاجب هيلاري؟ ونفس السيناريو ده هو باردوا اللي اتعمل من كذا حد سياسي ساعة حرب فيتنام. باردو طلعوا يلوموا حكومة العرايس الخشب في جنوب فيتنام. أي هرتلة من تحت المريلة طالما معاهم حق القوة. يا عالم زبالة

زيح عربيتك من سكّتي

noreply@blogspirit.com (Mukhtar Al ِAzizi) — Thu, 05 Jul 2007 13:00:00 +0300

اكتشفت مدونة عمرو رخا قبل أن أبدأ التدوين. وجذبني اسمها الذي أجد صعوبة في ترجمته، فاسمها

Idle Thoughts

فقد تعني التسمية "أفكار غير جدية"، أو "أفكار معطَّلة"، أو "أفكار عشوائية: بلا هدف". أيا تكن الترجمة الصحيحة الموافقة لما قصده عمرو فإن تصفح المدونة أثبت لي أن توقعي في محله: المدونة فيها محاولات تأملية شيقة.

تدوينة عمرو "زيح عربيتك من سكتي" عجبتني لأنها بسيطة جدا وفي نفس الوقت فكرتها تهم كل بني آدم بيحاول يتأمل في سلوكياته وسلوكيات الجماعة التي ينتمي إليها والجماعات الأخري، بالإضافة إلي أني كنت أتمني أكتب تدوينة في نفس الموضوع لأن العقلية التي ينتقدها عمرو في تدوينته كثيرا ما تثير استفزازي فعلا بشكل يومي.

لذلك اخترت التدوينة المشار إليها لترجمتها ترجمة بهاريزية.

----------------------------------------------------

زيح عربيتك من سكتي

لو واحد ركن عربيته تاني صف في شارع خنيق وتصادف إن سيادة حضرة سموك واخد عربيتك وماشي في الشارع ده، هيكون شعورك إيه؟ في احتمال إنك تخش بعربيتك ورا العربية دي وتريّح إيدك علي الكلكس في أوركسترا عزف منفرد لحد ما تصحي نواب مجلس الشعب. وفي احتمال إنك تعدي من جنبه وتبصله بصة تحرقه فيها ولسان حالك بيقول: بااااارد. واحتمال تبلع غضبك لكن بالتأكيد مش هتكون سعيد بالرخامة والتناحة اللي اتعرضتلها.

اقلب الصورة كده. انت عايز تقف عند محل عشان تشتري كارت شحن لموبايلك. دقيقتين يعني وهتخلص. ركنت عربيتك في الشارع الخنيق زي الشخص التنح اللي فات. إزاي أحوالك دلوقتي؟

وعشان كده في تصرفات كتير بتتصنف صح وغلط علي معايير فاسدة: زي مثلا مين الشخص اللي بيعمل التصرف ده؟ مش إيه هو التصرف ده في الأول.

التصرف بيكون صح لما سيادتك أو حتي حد من الجماعة بتاعتك الصغيرة أو حتي الجماعة الكبيرة يعمله. وبيكون غلط طبعا لما التانيين الوحشين يعملوه.

كلنا عملنا وبنعمل كده. تحيز مفضوح لأن مفيش معايير ولا قيم تحكم نظرتنا للسلوكيات دي.

في أمثلة كتير تبين تصنيفنا للسلوك من حيث هو صح ولا غلط:

فمثلا السرمحة والانخراط في علاقات جنسية من أي درجة قبل الزواج في مجتمعاتنا الشرقية ليها تصنيفين:

▪ لو الولد هو اللي متورط في علاقة يبقي شاب طايش وبيلعب يومين بحكم السن وطيش الشباب.

▪ لو بنت تبقي شرموطة.

التدخين في الأماكن العامة:

▪ لو ولد يبقي مدخن أو مدمن

▪ لو بنت تبقي شرموطة لأن طريقة نفخها للدخان وضغط شفايفها علي السيجارة مثيرة جنسيا

والتمشية في شوارع المحروسة الساعة تلاتة الفجر:

▪ لو ولد يبقي بيتمشّي، زهقان أو عنده مشكلة أو راجع من الشغل أو بيجيب علاج لأمه أو راجع من عند الحلاق

▪ لو بنت: تبقي فاردة شبكها ونازلة تصيد شاب غندور عشان هي شرموطة باردو.

وعلي المستوي الكبير بعيد عن الدكر والنتاية، لو الاعلام الأمريكي بيتكلم عن موت البشر في العراق:

▪ لو حد من قوات الاحتلال الأمريكي يبقي تم قتلهم بواسطة الارهابيين العراقيين

▪ لو حد من العراقيين يبقي تم قتلهم عن طريق القوات الأمريكية التي تحاول زرع الديمقراطية في المنطقة

وفي نفس السكة دي، لما المدنيين يتقتلوا عن طريق المسلحين:

▪ لما يكونوا فلسطينيين يبقي جنود الاحتلال الغاشمين (طبعا همه كده عشان محدش يفهم غلط)

▪ ولو أمريكان بيشتغلوا في برج التجارة العالمي يبقي يستاهلوا الخنازير دول

في الأماكن العامة لما نسمع ضحك وقهقهة ومسخرة:

▪ لو حد غيرك أو مش من الشلة بتاعتك يبقوا عالم بيئة وزبالة وعمرهم ما دخلوا أماكن نضيفة

▪ لو أنت أو حد من شلّتك اللطيفة تبقي بتقضوا وقت لطيف ومن حقكم تفرحوا بصحبتكم الظريفة

ولما يموت عزيز والشارع يتقفل من الناحيتين عشان سرادق العزاء وتلاوة القرآن:

▪ لو حد عزيز عليك انت شخصيا يبقي المفروض الناس تقدر وتفهم وتتكوي بالنار اللي في قلبك وتحط قطن في ودانها وجزمة مقاس ستة وأربعين في بقها وتسكت وتحزن لحزنك.

▪ لو أي بني آدم تاني: يبقي إزاي الموت والحزن يتحولوا الي مبرر لتعطيل مصالح الناس واحتلال الشارع وتشغيل القرآن ليل ونهار؟؟

ولما الأهلي يكسب بطولة والمشجعين يقفلوا الشوارع:

▪ لو أنت أهلاوي: هتفرح وتظأطط وتشترك في الهمجية

▪ لو زملكاوي: هتقول بقي كده ينفع ؟ طيب افرض عربية اسعاف رايحة تنقذ مريض ولا تسعف مصاب؟؟

وقائمة الأمثلة لانهائية بالطبع.

معظم وقتنا بيضيع في الحكم علي أفعال الآخرين من خلال موقفنا المسبق من الآخرين دول، مش علي أساس مبادئ ومعايير ثابتة لتقييم السلوكيات نفسها.

عشان تصنف السلوكيات إلي صح وغلط وتكون موضوعي، السؤال المفروض يبقي: إيه السلوك اللي بيتعمل؟ مش مين اللي بيعمل السلوك.

طفل أفغانستاني وبوذا

noreply@blogspirit.com (Mukhtar Al ِAzizi) — Tue, 19 Jun 2007 11:15:00 +0300

معرفش إيه حنفية الترجمة دي اللي أنا فتحتها اليومين دول، ده أنا أصلا مش باخلص الشغل بتاعي. في ترجمة الخبر ده أن فضّلت إني أخلي البهاريز لوحدها بعد الخبر. إنما مقالات الرأي هتكون محتوية علي البهاريز داخل الترجمة نفسها كما في مقال فيسك ومقال أفنري السابقين.

-------------------------

تحديث: الإثنين 19 يونيو

بي بي سي تنقل وجهة نظر الجناة، قوات التحالف إذ يقول الجحش بتاعهم: "ان هذا مثالا اخر على احتماء مسلحي القاعدة بالمدنيين".

الخبر هنا بالإنجليزية

نقلت الأسوشيتيد برس خبرا يفيد مقتل سبعة أطفال في غارة جوية لقوات التحالف بقيادة أمريكا في أفغانستان في محاولة لضرب مسلحين بنتمون إلي تنظيم القاعدة.

وقد استهدفت الغارة مجمعا يضم مسجدا ومدرسة بمنطقة زرجون شاه وقد أوضحت التقارير الصحفية مقتل سبعة أطفال و "العديد من المسلحين" واحتجاز اثنين من المسلحين.

seven children at the madrassa and "several militants" were killed, and two militants detained

ملحوظة: الأقواس اللي علي "العديد من المسلحين" من عند موقع ياهو، مش من عندي.

وقد صرح المتحسس الرسمي باسم قوات التحالف:

إحنا مالناش دعوة، القوات بتاعتنا عملت مراقبة علي المجمع طول اللليل والنهار ومكنش باين خالص ان في أطفال في المبني.

Coalition troops had "surveillance on the compound all day and saw no indications there were children inside the building,"

وقد اتهم في حديثه المسلحين بأنهم لم يدعوا الأطفال يخرجون من المبني المستهدف.

Coalition troops had "surveillance on the compound all day and saw no indications there were children inside the building," He accused the militants of not letting the children leave the compound that was targeted.

وقال متحسس آخر باسم قوات التحالف:

والنعمة إحنا لو كنا نعرف ان في أطفال في المبني مكناش هنضرب الغارة دي خالص. آه وربنا

"If we knew that there were children inside the building, there was no way that that airstrike would have occurred,"

وقالت بعثة المساعدة من الأمم المتحدة أنها أرسلت لجنة حقوق الانسان الأفغانية المستقلة للتحقيق في "الحادث".

القوسين اللي علي "الحادث" من عندي.

The U.N. Assistance Mission in Afghanistan said it has sent a team with the Afghan Independent Human Rights Commission to investigate the incident.

وحامد قرظاي طلب كذا مرة من قوات التحالف الأجنبية أن تفعل المزيد لتجنب الضحايا المدنيين.

وعلي صعيد آخر، احتجزت الشرطة مشتبها به في كابول بعد تفجير الحافلة فقد ألقي القبض عليه وهو يصور مكان الحادث بعد وقوعه وكان علي تليفونه المحمول صورا للقائد الطالباني داد الله ورسالة علي المحمول من دولة أجنبية.

وأدان قرظاي تفجير الحافلة يوم الأحد الماضي وقال:

أعداء أفغانستان عايزين يعطلوا تطوير قوات الأمن.

-------------

البهاريز:

1- تنظيم القاعدة كخة ولازم ينضرب

2- طالما في "العديد من المسلحين" قد قتلوا يبقي مش مهم القتلي الباقيين. طالما اتقتلوا يبقي العملية نجحت – مع بعض الآثار الجانبية التي تزول بمرور سويعات: سبع أطفال مش رقم جامد قوي يعني عشان نقلبها مناحة.

3- أهم حاجة النية الشريفة والقلب الأبيض، إحنا شفنا المبني ومكنش فيه أطفال وعشان كده قمنا بالغارة. وإحنا عارفين إن النية الصالحة لا يفسدها العمل الفاسد.

4- المسلحين هم الارهابيين الأوغاد لأنهم لم يتركوا الأطفال يخرجوا. استعملوهم دروع بشرية. أوغاد وقتلة ومأجورين.

5- إحنا منعرفش ان في أطفال والجهل ينفي الإدانة.

6- لا ينبغي أن نتباكي علي هؤلاء الأطفال فمن يدري أليس من الممكن بعد أن يكبروا يتحولوا الي إرهابيين؟ هذه غارة وقائية

7- لا ينبغي الطنطنة علي موضوع الأطفال. الأجدي والأنفع أن نناقش كيف سنداوي آثار عدوان حكومة طالبان علي تمثال بوذا الذي كان يبلغ طوله تلاتة وخمسين متر ودمروه لأنهم أصوليون ومتطرفون.

8- أفغانستان فيها أطفال كثيرون لكن كم تمثال بوذا هناك؟ البكاء أولويات يا عالم. وخسارة تمثال بوذا لا يمكن أن تقدر بثمن

9- علي أي حال سنرسل لجنة حقوق انسان لتقصي الحقائق والتأكد من أن الأطفال كانوا فعلا أطفال أم كانو مقاتلين وعاملين فيها عيال؟؟ وسوف نتأكد – أيضا – إذا ما كانوا فعلا سبعة أطفال أم كانو خمسة فقط ، والتقارير الصحفية تبالغ في العدد من أجل الإضرار بالحرب علي الإرهاب.

10- اللي حصل كان مجرد حادث. وانتفاء النية والقصد ينفي التهمة المزعومة.

11- حامد قرظاي بيضايق لما المدنيين بيموتوا في الغارات. البلد هتفضي ومش هيلاقي شعب يحكمه.

12- المشتبه به في موضوع تفجير الحافلة يحمل كل دلائل الإدانة معه: محمول وعليه صور داد الله، ورسالة من دولة أجنبية لعلها إمبراطورية بلاد فارس أو الحبشة. والأهم أن تليفونه ليس بها رنات لبريتني سبيرز كما أن التليفون لا يحوي أي صور لنيكول كيدمان.

13- لازم يا عزيزي القارئ تعرف أن الغارة الجوية كانت رد فعل من قوات التحالف علي تفجير للإرهابيين قاموا به يوم الأحد. المسألة مش ضرب وخلاص بدون سبب. وعشان كده إحنا كموقع إخباري قلنا نفكرك دايما بالخلفية والمقدمات عشان ماتسرحش وتعيط علي الأطفال.

14- أفغانستان لها أعداء لا يريدون لها الخير والنماء والبترول والغاز الطبيعي، وهم الارهابيين.

التماسيح المكّارة باراك وأولمرت وشمعون برايز

noreply@blogspirit.com (Mukhtar Al ِAzizi) — Mon, 18 Jun 2007 11:15:00 +0300

ومع استمرار الجهد الحثيث علي طريق الترجمة البهاريزية، هذه ترجمة أحدث مقالة للكاتب الإسرائيلي المُعارض يوري أفنري.

(1)

غزة – فيران تجارب

تلعب معايا؟ طيب افرض كده:

يحصل إيه لو مليون ونص بني آدم اتسجنوا في منطقة صغيرة – يعني نقول زي مثلا 1200 واحد في أتوبيس المنيب/عتبة – منعزلين تماما عن العالم الخارجي وعندهم مجاعة ومش لاقين يوكلوا عائلاتهم؟

من كام شهر كده، أنا شبّهت اللي بيحصل في فلسطين بتجربة مجتمعية قرر يقوم بها وطني الحبيب اسرائيل، وعشيقتها أمريكا والقوّاد اللي اسمه الاتحاد الأوروبي. وسكان غزة همه فيران التجارب.

لسة يدوب الأسبوع ده النتايج بدأت تطلع والتجربة شغالة. النتيجة إن البني آدمين لهم نفس ردود الفعل بتاعة الحيوانات: لما تحشر حيوانات كتير في زريبة صغيرة بظروف بشعة هتلاقي الناس دي بقت عدوانية جدا وميالة لارتكاب جرائم القتل جدا جدا. بافلوف كان عنده حق، إرتاح في تربتك يا إبن أم بافلوف.

ليشع ياكل وابن عمه يموت من الجوع.

العلماء المشرفين علي التجربة في أورشليم وواشنجتون وبرلين وأوسلو وأوتاوا وباقي الأخوة والأهل والأفارب والأحباب والجيران شافو النتيجة ونارهم بردت. قعدوا يدعكوا إيديهم في بعض تعبيرا عن الرضا والانبساط.

بلّي شربات يا أم إستير، الفلسطينيين بينهشوا في بعض!!! هات سندوق الكاكولا يا واد ليشع خلينا نشرب ونمزمز قدام القفص اللي فيه الحيوانات.

لكن التجربة لسة مانتهتش. أصلا التجربة مش هتنتهي إلا لما يبقي القفص سكوت هس هس بس بس، وكل الفيران تموت بعد ما نرخّم عليهم أكتر ونضيّق المكان.

----------------

(2)

عباس قائد رابط الجحش

يجي واحد أجنبي مش من هنا يسألني: إيه يا خبيبي اللي بيخصل في فلسطين ولمازا يكتلون بعضهم البعض بهذه الفظائة منكطعة النظير؟

في الواقع، ده سؤال مُنتاز.

حماس مش لاقية توكل شعبها، ومش طالبة معاها انها تطرطر علي باب مصر لأن أصلا رئيس مصر مشغول بيطلع دين أم الإخوان اللي هي أصلا مُرضِعة حركة حماس، وكمان مش نَصَاحَة قوي إن حماس تستفز اسرائيل اللي ما هتسدق وتروح قارفة الفلسطينيين بزيادة. فميش حل غير أن حماس تقلّع محمود عباس هدومه هو والقوات اللي تحت صوابعه بتوع حركة فشخ. وساخة حركة فشخ إنها بتاخد أوامر من أمريكا وكلنا عارفين وراسين عالدور من الأول.

أمريكا قالت لإسرائيل يا اسرائيل إدي سلاح لحركة فشخ عشان يفشخوا حماس. واسرائيل خايفة إن حماس هي اللي تفشخ حركة فشخ المفشوخة أصلا. القصد، اسرائيل نفذت كلام عشيقتها أمريكا.

هارش يا نجم الموضوع لحد هنا؟

أمريكا واضحة وصريحة، بتعين رؤساء للدول الإسلامية من النوعية اللي هي – لامؤاخذة – بتحب تطاطي، رؤساء يبقوا ظاهرين في الصورة ضهورهم مشدودة تماما إنما في الحقيقة الرؤساء دول بياخدوا الأوامر من ورا. من هذا المنطلق حماس تعتقد إن دحلان قوّاد وهو اللي معيناه أمريكا. ليه بقي؟ اسمع يا عم. وسائل الإعلام الأمريكاني والاسرائيلي بتوصف الراجل ده بأنه قائد قوي ورابط الجحش – قصدي رابط الجأش مطرح ما صاحبه يعوز يعني. وبيقولو كمان أنه معتدل، يعني مرمطون أمريكا بالبلدي كده، وبيقولوا أنه انسان عملي، يعني لما يتكلم مع اسرائيل ما تطلعش من بقه العيبة. راجل متربي ومؤدب وصوته ناعم ومطاوع.

حماس شايفة إن التعريص ده مالوش غير حل واحد: الاستيلاء علي غزة وطرد حركة فشخ.

-------------------

(3)

العركة مش بين الأصولية والعلمانية

البهوات الأمركان والاسرائيلين بقي مش فاهمين الوضع: قطاع غزة بيشجع حماس لأنه شايف أنهم فعلا بيحاربوا العدو الاسرائيلي، في حين أن حركة فشخ تعتبر في نظرهم متواطئة مع الأمريكان واسرائيل. اللي زاد وغطّي إن أمريكا قررت تمد حركة فشخ بالسلاح، هو في دليل بعد كده إنها متواطئة ومطاطية وممطوطة؟؟

فالمسألة مش تصاعد الأصولية الإسلامية زي ما البهايم بيقولوا. لأ . دي ناس مش بتحب الخونة والمتواطئين مع العدو ونفس الكلام ده في أي حتة فيكي يا كرة أرضية. إنما بقي التركيز كله في الإعلام الأهطل إن حماس أصولية إسلامية بينما حركة فشخ علمانية معتدلة. وطبعا المتفرجين هيصوتوا لصالح العلمانية المعتدلة بتاعة حركة فشخ.

------------

(4)

الله يبشبش الطوبة اللي تحت راسك

الساسة الأمريكان وعشاقهم الاسرائيليين بيترحّموا علي أيام عرفات. هو الوحيد اللي كان يقدر يلم الليلة دي في جراب واحد. أصل عرفات كان حاوي، كان عنده حاجة كده، تحس انه كان عنده سلطة طبيعية مش ممنوحة يعني، والجماهير كانت بتحبه وملتفة حوله. يا جدع دا حتي حماس كانوا بيحترموه. والراجل العبقري ده خلق أجهزة أمنية متصارعة عشان لو واحد منهم حب يستفرد بالسلطة أو يفشخ أخواته يقوم الجهاز المنافس يكشّر عن أنيابه. وكمان من عبقرية عرفات أنه كان قادر يتفاوض ويوقع اتفاقيات سلام ويحسّس علي شعبه لحد ما يقبلوا زي لامؤاخذة كده لما الست تحايل ابنها لحد ما ياخد اللبوسة عشان حرارته تنزل.

إنما تقول إيه في الكفرة. اسرائيل شرّدت لعرفات وصورته علي أنه انسان الغاب طويل الناب. وأنا مش فاهم ليه الأمريكان والاسرائيليين مش عايزين ينجزوا بقي ويظبطوا محمود عباس. ماهو أصلا مستعد يقبل زي عرفات. عندك مثلا شارون عمل مع عباس إيه. راح نتش ريشه وخلاه من غير ريش خالص، بلبوص يعني وفي الآخر راح بص لعباس وقله – وهو بيشخر شخرة عبرية أصيلة – "ننننننخخخخ، يا فرخة من غير ريش ماتساويش". بقي والنبي ده يصح؟ رئيس وزرا ويطلع الصوت ده من منخاره. حاجة خرا بجد

كان إيه بقي المفروض يعمل الشعب الفلسطيني؟ انتظار؟ أديهم انتظروا. أحلام وآمال وتمنيات أن بوش يتحرك؟ مفيش خالص وكأنك بتزمر في مصر الجديدة. مالقيوش فايدة غير أنهم يصوتوا لحماس علي أمل أن العنف بتاع حماس يجيب نتيجة طالما عباس فرخة من غير ريش.

(5)

يا سلام يا عم الحاخام لما العوالم تتمرقع

اسرائيل طبعا ظأطتت وفشخت بقها ضحك، شغل عوالم يا عم الحاخام، أمّال. دول أهلي وأنا عارفهم، بيحبوا يظيطوا في الهيصة. اسرائيل اعتقلت مروان البرغوثي، الراجل الوحيد اللي كان يقدر يظبّط حركة فشخ. وانتصار حماس في الانتخابات جه علي الطبطاب. أصل اللعبة كده أسهل بكتير. اسرائيل مش محتاجة تقلع هدومها وتصرخ وتقول يا لهويييي الناس الكخة بيحسسوا علي الشنطة وعايزين يسرقوها. هو مع حركة زي حماس انت محتاجة تعمل الدور ده؟ لأ طبعا. حماس مش بتتناقش وده عز الطلب للاسرائيليين. تطلع اسرائيل وتقول: يا للعار ، يا شماتة هير هتلر فيكي يا اسرائيل بقي عايزين اسرائيل تتفاوض مع الارهابييييييييين بتوع حماس!؟؟ يا للبول

واسرائيل ماهتصدق زي ما بقولكم كده. هتقولك: بصوا شوفوا العرب بيعملوا إيه في بعض؟ إيهود باراك كان عنده حق لما قال من كام سنة إن اسرائيل دي عبارة عن فيلا شيك في وسط غابة. وهو في تلاكيك أحسن من الواقع الفلسطيني انهاردة. اسرائيل تكسب يا عم الحاخام زي ما قولتلك.

(6)

كيف نفعل مع حماسستان؟

بص، الوضع الجديد ده بجد بظرميط. غزة بقت دويلة حماسستان. طيب اسرائيل تعمل إيه؟ تزود مجاعة غزة؟ ولاّ تتصل بحماس أو حتي ترن عليهم؟ ولا تتصل علطول وأهي فرصة ان موبينيل عاملة الدقيقة بعشرين قرش (بس حلو والنبي الاعلان بتاع ياسمين عبد العزيز ده)؟ ولاّ تطلب من الأمم المنفشخة تبعت قوات أمن؟ ومين أصلا الدول اللي نزل عليها غضب الله وهتبعت جنودها في الخرا ده؟ ده ميدان العتبة في رمضان أرحم من فلسطين دلوقتي.

أهي حركة فشخ بايظة من غير مجهود من اسرائيل، طيب هيعملوا ايه مع حماسستان؟؟

أوعوا تفتكروا الناس في الضفة الغربية هيصبروا كتير. في اغتيالات واعتقالات وجدار الفصل العنصري وتوسع المستوطنات اللي عاملة زي حضّانات الأرانب والرخامات بتاعة جيشنا كل شوية. الناس مش هتصبر كتير يا بهايم. فوقوا بقي

(7)

مين المخلّص؟

هيه؟ هندّي سلاح لعباس ولا نقاطعه؟

نسمحله يضرب حماس بسلاحنا ولا ننفّض؟

نحرم عباس من أي انجاز سياسي بتوقيع اتفاقية ولاّ نرميله أي عضمة يتلهي فيها ويلهي الفتحاويين بيها؟

مين اللي هينقذ الموقف ويصلّح الشكمان اللي بايظ؟

إيهود باراك؟

راجل خبرة ولئيم – تحس كده أنه صهيوني عن حق. الأمور كلها هتبقي في إيده لأنه توماتيكي كده هيمسك وزارة الدفاع.

البني آدم ده خرا. أولا كان هيوقع اتفاقية مع الأسد الأب وفي آخر لحظة خنس زي الشيطان. وراح كمان سحب قواتنا من جنوب لبنان من غير أي كلام مع حزب الله. وأجبر عرفات أنه يجي كامب ديفيد وراح يشتمه هناك ويقول فين شريك السلام ده؟؟؟

باراك معرفش يبقي زي شارل ديجول، ده بالكتير أوي ينفع في دور نابليون وهو عنده إمساك ومش عارف يقضي حاجته، الأدهي من كده أنه ساب الحمّام من غير ما يشد السيفون. والدنيا اتظروطت علينا إحنا.

(8)

المهرّج يوريك أو شمعون برايز لما يبقي رئيس

في مسرحيات شسكبير الكبير في حاجة بتتكرر دايما: تلاقيه يطلع الأراجوز أو المهرج عشان يقطع اللحظات الحرجة، زي حفار القبور في مسرحية هالمت كده. علي فكرة مش بس عند شسكبير.

شمعون برايز اللي بقاله خمسة وخمسين سنة مدعوك في السياسة وعمره ما فرّح الحاجة أمه شمعون بمكسب، الأسبوع ده أصبح رئيس دولتنا العبرية. شوفتوا المسخرة.

أنا كمان من غيظي من الراجل ده كتبت عنه مقال من كام سنة واسم المقال "الباشمهندس سيزيف برايز" وقلت فيه ان شمعون برايز ده فقري زي سيزيف بتاع الأسطورة: كل ما يقرب من النجاح تلاقي النجاح يهرب من وشه اللي يقطع الخميرة من البيت. راجل أجوف في منصب شرفي أهبل. هأوأو أو... معرفش يمسك رئاسة الوزرا راح قالك لما أجرب نفسي في رئاسة البلد. فاكر نفسه قاعد في مصر الجديدة بروح أمه.

مش والنبي الموقف ده يشبه المهرج بتاع شسكبير. جاتك الهم يا بعيد.

دلوقتي بقي برايز هيروح يعمل شوية مؤتمرات ولقاءات وعزومات في قصر الرئاسة عشان السلام والاتفاقيات... جاتها نكد اللي عايزة خلف يا برايز. الكلام ده كله جعجعة من غير طحن. والنتيجة ان أولمرت بقي أقوي والتجربة غير الانسانية مستمرة في غزة، بينما إيهود باراك وإيهود أولمرت وشمعون برايز بيلطموا خدودهم ويعيطوا – عياط التماسيح.

جاتكو القرف

السَلَطَة الفلسطينية

noreply@blogspirit.com (Mukhtar Al ِAzizi) — Sun, 17 Jun 2007 14:30:00 +0300

انطلاقا من تقديم روح النص علي جسده، وترسيخا لنظرية الترجمة البهاريزية أقدم للقارئ العربي أحدث مقالات روبرت فيسك عن الحال في فلسطين بعدما استولت حماس علي غزة، بينما بقيت حركة فتح في الضفة الغربية.

----------

السَلَطَة الفلسطينية

يا دين أمي بقي علي مسلمين الشرخ الأوسط !!! الأول طلبنا من الفلسطينيين يحضنوا الديمقراطية بس ميبقاش حضن جامد، أحة، راحوا انتخبوا الطرف الكخة: حماس. ودوقتي في حرب أهلية صغنونة وحماس حضنت قطاع غزة. ومع كل ده إحنا الغربيين دماغنا وألف صرمة قديمة إننا نحضن محمود عباس وكأنه أناناس.

الموضوع اتفشخ بزيادة، وفلسطين – فلسطين مين يا عم – بقي فيها رئيسين للوزراء. ومن كام سنة مكنش فيها المنصب ده من أساسه.

دين أم الشرخ الأوسط.

نتفاوض مع مين ونكلم مين؟ فين كبيركم يا مشروخين؟

ماشي هيجي واحد يشخ في دماغي ويقوللي المفروض كنا نتكلم مع حماس من شهور فاتت. بس إحنا إديناهم ضهرنا وكأنهم شواذ جنسيا. بس مين يرضي بكده. الغرب بن دين كلب عشان بينادي بالديمقراطية بس علي كيف دين أمه وبس. يعني المفروض الفلسطينيين يصوتوا لحركة فشخ وقياداتها البايظة. لكن الفلسطينيين صوتوا لحماس وكأنهم عايزين يغيظونا. الغرب قالها بصوت عالي: ننننخخخخ، أحة يا فلسطينيين، بقي بتصوتوا لحماس وتسيبوا حركة فشخ!!! نننخخخ أحة بجد، مفيش معونة.

مفيش حد من عندنا في الغرب هرش دماغه أو حتي أي حتة تاني في جسمه – زي مناخيره مثلا – وسأل نفسه: هو المفروض حماس تعترف بأنهي اسرائيل؟؟ اسرائيل بتاعة تمانية وأربعين؟ ولا اسرائيل بتاعة ما بعد حرب سبعة وستين؟ ولا اسرائيل اللي طول عمرها بتبني مستعمرات جامدة فشخ عشان اليهود علي أراضي عربية؟؟؟؟ هه؟ ما تفكروا بنزاهة شوية يا زبالة

وطبعا بتروحوا تحسسوا علي قفا محمود عباس. أه طبعا ماهو المخبر الأمين بتاعكم، وتوجهاته معتدلة زي ما الشراميط في البي بي سي والسي إن إن وشبكة اسفوكس للأخبار بيقولوا عليه. انتوا بتصنفوا الناس والمتفرجين البهايم بتوعنا زي البغبغانات. طبعا وهو انتوا يعني هتقولوا إيه عن محمود عباس اللي كتب كتاب من ستميت صفحة – أحه ده فاكر نفسه بيكتب رواية روسية – عن أوسلو ومجبش كلمة "احتلال" نهائيا. وكمان بدل ما يقول "الانسحاب " الاسرائيلي كان بيقول "اعادة رص جنود اسرائيل". هو ده المعتدل في نظر الغرب.

هو ده القائد اللي انتو عايزينه يا غرب: يلبس كرافتة ويروح البيت الأبيض ويطاطي راسه في الأرض.

هو انتوا يا غربيين يا بهايم فاهمين ان الفلسطينيين انتخبوا حماس عشان يطبقوا الشريعة ويقطعوا مناخير الزاني والزانية – علي النعمة والمسيح والعذرا انتوا بهايم ومش فاهمين حاجة. يا بهايم انتوا ليه بترسموا صور وخيالات عن الناس دي وترجعوا تصدقوها؟؟ الفلسطينيين انتخبوا حماس عشان طفح بيهم الكيل من عباس والعفانة اللي طالت كل شبر في السَلَطَة الفلسطينية.

اللي ناقص بقي بجد إن الغرب يتعطف ويمنح فلسطين عضوية نادي الشواذ الأوروبيين بشرط انهم يختارو حركة فشخ. طيب وإذا كان الفلسطينيين مش عايزين حركة فشخ يبقي إيه الحل؟ نقاطع ونهاجم حماس؟ بقي دي الجدعنة والنزاهة يا حكومات الغرب؟ بقي هو ده اللي بتعلموه لأولادنا في المدارس وهوليود؟

وهنروح بعيد ليه، الغرب باردو بيحضن حامد قرضاي بتاع أفغانستان مع إن الحكومة بتاعته مليانة شوية مجرمين وتجار مخدرات وتجار سلاح، دي شيكاغو أو الباطنية متجيش جنب هناك حاجة. وفالحين بس يا قادة الغرب كل يوم والتاني تطلعوا في حديث وتقولوا : احنا متأسفين ومتألمين أشان خبايبنا الأفغان اللي الخرب ألا الإرهاب تسببت في مكتل الكسيرين منهم. إخنا بنخب الخرية والتخرر. أشان كده إخنا مصممين علي كتل زئيم القائدة أسامة بن لادن. سكرا سكرا لكم ألا فهمكم وتكديريكم للأمليات الهربية الفزيئة.

الغرب بيحب مبارك اللي مطلع دين الإخوان صبح وليل، وقال إيه!!! حرم بوش المصونة رايحة تديله دعم دافي (بطانية ولحاف وبيجامة كستور). وأصلا إحنا عارفين إن التوريث فرض مش سنة.

والغرب بيعشق الأخ الفقيد معمر الجزافي، دكتور ليبيا، اللي بيكري ذئاب الجبل علي المعارضة تنهش في لحمهم بعد الاغتيال. وطبعا إزاي مانعشقوش بعد ما أعلن أنه متنازل عن البرامج النووية الجباااارة اللي قطع فيها شوط كبير؟ لازم نحبه طبعا لأن البرامج النووية بتاعته كانت ممكن تبوظ سوق البلح في المنطقة، غير بقي ان في شهر رمضان ممكن يطرح كمية كبيرة من البلح اللي فيه نوي واللي مفهوش. وشوفوا انتوا بقي طبق الخشاف هيبقي بكام.

وطبعا الكابتن عبد الله ده حبيبنا: ماسك دولة محندقة وعارف أولها من آخرها ومش ممكن يتلخبط ما بين وشها وقفاها. يا سلام بقي لو كل العرب يفهموا ان احنا بنبعتلهم حكام حلوين ومتنورين في جامعات أكسفورد؟؟ كان دماغنا ارتاحت من القرف ده من زمان.

دلوقتي بقي هل أمريكا وموسكو والاتحاد والأوروبي اللي عامل زي خيبتها هيروح باردو يعترف بدولة فلسطينية في الضفة الغربية، وينفّض لحماس في غزة؟؟

إيه الحل دلوقتي – الغرب هيفضل طول عمره كده لحد ما الكنابل تتفجر في بلدنا والمنطقة تولع بزيادة؟!!!؟؟؟ ولا باردو أمريكا هتستمر في دعم الديمقراطية من خلال إذاعة سوا وقناة الخرة ومجلة هاي؟؟؟

اتفوووووووو علي الساسة الغربيين ومن شايعهم.

الترجمة البهاريزية

noreply@blogspirit.com (Mukhtar Al ِAzizi) — Sun, 17 Jun 2007 14:10:00 +0300

الترجمة البهاريزية(من البهاريز) أو

Kernel Translation

قرأت عدة كتب عن نظريات الترجمة، إلي جانب خبرتي في مجال الترجمة لكن ما أميل إليه الآن هو أن أنتهج لنفسي منهجا جديدا في تناول النص الأصلي وطرق نقله إلي لغة أخري. فقمت بتطوير نظرية جديدة في الترجمة تتمركز حول "روح النص" لأنه هو الأهم علي أية حال. وعلي هذا يمكنني أن أنقل روح النص الأصلي طالما أن الكاتب – كما أري – يواري انفعالاته ولغته الخصبة وراء قناع الكياسة والسياسة والأدب ومراعاة الذوق العام.

هذه الطريقة في الترجمة تسمح لي بالوصول إلي البهاريز في ثواني دون تضييع الوقت في ترجمة حرفية تجعل النص جسدا بلا روح. ومن المهم أيضا الاهتمام بالقارئ الذي طفح به الكيل بسبب اللف والدوران.

أنا مع البهاريز – أنا أشجع روح النص.

والنص المترجم يتميز بأنه يعيد صياغة النص الأصلي فيهمل الجسد ويهتم بروح النص – بالبهاريز. وهذه العملية تشبه

Paraphrasing

كما يتم مع النصوص القديمة الكلاسيكية مثل نصوص شكسبير.

من هذه الأرضية قمت بترجمة مقال حديث للمراسل الشهير روبرت فيسك، وأعكف حاليا علي

ترجمة مقال للكاتب يوري أفنري.