UnbraInwasher ® مخـــ العزيزي ــتـار - politics

علاوة فإضراب جهيض فزيادة فى الأسعار فخراب بيوت مستعجل

noreply@blogspirit.com (Mukhtar Al ِAzizi) — Tue, 6 May 2008 11:35:00 +0300

التسلسل المنطقي للأحداث في بر مصر:

(1)

علاوة جامدة فشخ للقطاع العام والعاملين بالحكومة تصل إلي تلاتين في المئة من أساسي المرتب. وهي زيادة لم تحدث من عهد مينا موحد القطرين.

(2)

إضراب أربعة مايو لا يلقي قبولا جماهيريا كما كان الحال في إبريل، ربما بسبب العلاوة الفشخ.

(3)

يوم خمسة مايو زيادات في البنزين ، وطبعا يستتبعها زيادات أجرة النقل علي الجميع سواء عاملين في قطاع خاص أو عام أو موظفين حكومة أو عاطلين.

------------------------------------

ويروي جرنال المصري اليوم عن مصطفي بكري قوله: دي مؤامرة علي الرئيس، تعليقا علي زيادات أقرها مجلس الشعب.

أعتقد في هذه الحالة لا بد أن يتدخل الرئيس ويصدر أوامره لأمن الدولة والحرس الجمهوري بضرورة توفير البنزين والمواد الغذائية بالأسعار القديمة للقصر الجمهوري.

هكذا – علي أقل تقدير – يجب مواجهة هذه المؤامرة علي الرئيس.

-----------------------------

وينشر الأهرام اليوم جدولا بالزيادات، وقد أصبح بنزين اتنين وتسعين بمئة وخمسة وتمانين قرش، كما زادت رسوم تنمية الموارد لرخصة تسيير سيارتي من خمسة وعشرين جنيه إلي مئة وخمسة وسبعين جنيه. وهكذا فالحكومة تأخذ من ميسوري الحال لتعطي الأموات لحين ما يتم بعثهم من مرقدهم يوم القيامة.

وقد كُتب تعليق تحت الجدول المشار إليه في الأهرام ونصه كالتالي:

متوسط أسعار البترول حتي نهاية مارس ألفين وتمانية بلغ مئة وخمسة دولار للبرميل، وهو الأمر الذي يشير إلي أن سعر التكلفة المدرج أمام كل منتج سوف يرتفع كثيرا نتيجة اتجاه الأسعار العالمية للبترول حاليا الي مئة وعشرين دولار للبرميل.

وهو ما يعني أن الزيادات ليست نهائية بل في حالة صيرورة دائما ، كما يعني أن الزيادات المصرية لا توازي الزيادات العالمية وهو ما يعني أن الحكومة تنفق من جيبها حتي ينبسط الشعب. لعلها مكافئة الإضراب عن الإضراب.

ويلاحظ أن بنزين تمانين لم تتطرأ عليه زيادة، لأن الحكومة لن توفّره لك أصلا.

--------------------------------

طبعا زيادة تكلفة استخدام وسائل النقل من أتوبيس وميكروباص وسيارة نصف نقل إلخ يعني بالضرورة زيادة جديدة في أسعار الغذاء لأن الأغذية التي تنقل إلي السوبر ماركت والبقالة ستتحمل زيادة البنزين ولا شك، كما أن الزيادة في تجديد رخصة السيارة ستتحول تلقائيا إلي زيادة في أسعار الغذاء. وتدور الدائرة فنشهد موجة غلاء جديدة كاسحة.

وقطعا زيادة أسعار مواد الطاقة التي تستخدمها المصانع لتصنيع البلاستيك والملابس والألومنيوم إلخ إلخ تعني زيادة في أسعار السلع التي تنتجها هذه المصانع وتدور الدائرة مرة أخري، مما يعني زيادة في أسعار الدروس الخصوصية، وربما سعر أقراص الفياجرا، وأتعاب الطبيب، وثمن الكفن وأجرة غُسل الميت.

-----------------------------------------

كل هذه الزيادات المعلنة والواضحة تؤدي بالضرورة إلي زيادات في الأتعاب التي تدفع في العالم السفلي. فكل مصلحة تريد قضاءها تقتضي دفع رشوة تتزايد لتكافئ هذه الزيادات. فمثلا ثمن رخصة القيادة بلغ حتي وقت قريب خمسمائة جنيه تدفعها إلي الضابط المحترم فينجز لك الرخصة في ساعة من نهار.

أما الآن فهي ستمائة وخمسون جنيها وتقفز إلي سبعمائة جنيه مصري بعد إضافة الحبشتكنات.

وحتي لا أكون متجنيا علي الحكومة فإنني أقول أن القفزة في الرشوة – فيما يخص مرور فيصل ومرور بين السرايات – تتعلق بأمرين: أحدهما الزيادات الأخيرة التي بدأت من شهر أغسطس العام الماضي ولازالت مستمرة. والثاني أن الضابط أصبح لا يسمح باستخراج الرخصة عن طريق الرشوة إلا للأشخاص الذين ينتمون لدوائر مغلقة وعنقودية. فمن الطبيعي أن يرفع الرقم المطلوب. لاحظ عزيزي المواطن أن الشخص الذي يتلقي الرشوة مواطن مثلك يريد أن يمسك بالموبايل ويحب أن تمسك زوجته الموبايل ولعله أيضا يدفع أتعاب المدرس الخصوصي ويشتري الأكل من أولاد رجب أو سوبر ماركت مترو. الزيادة في الرشوة من حق الجميع.

وقد وفّقني الله هذا الأسبوع ودفعت الرشوة المقررة واستخرجت رخصة القيادة في ساعتين تقريبا.

----------------------------

ويقترح أحد الموظفين:

العلاوة نازلة للقطاع العام إللي هو اتباع أصلا، وموظفين الحكومة إللي نسبتهم من الشعب طبعا قليلة جدا.

طيب دلوقتي أغلبية الشعب اللي همه ناس صنايعية وحرفيين وقطاع خاص وعواطلية ما مسكوش علاوة وفي نفس الوقت الأسعار الجديدة بتحرقهم – يعملوا إيــــه؟؟؟

فاقترح – جزاه الله عنا خيرا – أن تستقدم الحكومة العواطلية من علي القهاوي والأرصفة ليعملوا بالتناوب مع أصحاب الوظائف، وبهذا يحصل كل مواطن علي أجر ستة أشهر في السنة، بواقع شهر أه وشهر لأ.

----------------------------

تحديث بعدها بشوية من هول الصدمة:

وقال سي السيد – زعيم الأسرة – لأسرته ابتهاجا بعيد ميلاده:

يا أولاد مصروفكم هيزيد بداية من شهر مايو، اللي بياخد مصروف مئة جنيه هياخد مئة وتلاتين واللي بتاخد مئتين هتاخد مئتين وستين.

فارتفع صوت الست أمينة من المطبخ:

وأنا يا سي السيد، مش هتفتكرني بحاجة؟

فقال لها بصوت ناعم:

مش دلوقتي يا أمينة، خلينا نتكلم في الحاجات دي لما نبقي لوحدنا.

وأردف قائلا:

وعلي فكرة يا أولاد، أنا أصلا مش معايا أديكم زيادات المصروف اللي أنا قلت عليها حالا وعشان هذا وذاك وكل أولئك فمن انهاردة نسبة مشاركتكم فى دفع فاتورة الكهرباء والتليفون والمكواة بتاعتي والأكل وشريطين الفياجرا الشهري بتوعي، وكروت شحن موبايل درّة أمكم أمينة – كلها هتزيد. أيوه ماهو منطقي عشان أديكم الزيادات اللي أنا قلت عليها. ولاّ إيه؟؟

جدير بالذكر – عشان بس محدش يرجع يغني تاني ويقول أصل التجار بيفشخوا الشعب – إن مبارك وعد بزيادة وتاني يوم قال أنا مش لاقي موارد وتالت يوم مجلس الشعب قرر يوفر الموارد من خلال زيادة البنزين. وبالتالي تكلفة النقل – أي نقل سواء نقل بضايع أو أفراد – هتزيد زيادة ملحوظة وبالتالي باردو أي حد بيقدم خدمات مهنية هو كمان هيزود الفيزيتا بتاعته، والمصانع هتزود أسعارها وهكذا.

يبقي هيه؟؟؟ فين الحلوة؟؟

رفع المرتب بعلاوة لا يتوفر لها الموارد يتطلب الرجوع عن الرفع، بدلا من البحث عن موارد للرفع.

طالما مفيش عندك آلية للرفع فبلاش ترفع. وفي نفس الوقت مفيش حد من الشعب بيطالب بالرفع – طبعا باستثناء ممتاز القط بتاع الأخبار لأنه عنده إصرار عجيب علي أن يستمر رفعه إلى أعلي المعالي كما جاء في مقاله القنبلة احتفالا بعيد ميلاد الرئيس إذ قال:

طول ما إحنا معاك ياريس حسينا بالحكاية دي.. مفيش انفعال ولاغضب.. أي حاجة دايما تسبقها دراسة كاملة

ساعات كتيرة كنا بنكلم نفسنا.. بنقول ياتري الريس حاسس بينا.. ياتري الريس حاسس بمشاكلنا وهمومنا.. وفي كل مرة ياريس نكتشف الحقيقة إنك معانا

وبصراحة ياريس.. إحنا نسينا أيام زمان.. إحنا ادلعنا ياريس في عهدك..

في عيد ميلادك الناس.. اهلك... وشعبك... كل اللي بيحبوك المفروض يقدموا لك ورود الدنيا كلها.. لكنك ياريس كنت سباق بالخير.. طول عمرك سباق بالخير.. العلاوة ياريس كانت مفاجأة.. كانت عبور بالموظفين الغلابة من الدوامة اللي عايشينها ليل نهار.. الناس كلها دعت لك ياريس بالصحة والسعادة.. حسوا ساعتها انك جزء منهم وانت بتطالب الحكومة إنها تدبر الموارد عشان العلاوة لأن الناس مش ناقصه.!!
الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.

كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!

وأخيرا، بجد يا ريس كفاية رفع بقي!! إنت بترفعنا بقالك كتير جدا، لدرجة إن في جيل كامل محدش غيرك رفعه. أرجوك كفاية رفع! بزيادة بقي، ده حتي ميرضيش ربنا يا مؤمن.

الديناصور يبيض ولا يشارك فى الإضراب

noreply@blogspirit.com (Mukhtar Al ِAzizi) — Tue, 8 Apr 2008 09:40:00 +0200

يوم الإضراب تابعت برنامج ما وراء الخبر على الجزيرة ، مش عشان أنا بحب أتابع التحليلات الإخبارية لكن عشان عايز أعرف الإعلام هيتناول الموضوع إزاي وهل توقعاتي منطقية ولا لأ.

المهم البرنامج جاب جورج إسحاق ، وواحد اسمه طارق حسن تقريبا نايب رئيس جريمة الأهرام اليومية القاهرية ، وطبعا عصام العريان.

من الكلام اللي قاله طارق حسن الآتى:

الاضراب فشل بكل المقاييس لأسباب كتيرة ومنها عزوف الأحزاب الرئيسية عن المشاركة فيه زي الحزب الوطنى الديمقراطي.

أه والنعمة قال كده... لدرجة إن أم سيف ماستحملتش وقعدت تقول: يا حمار يا غبي يا متخلف ... إنت حمان يا حمان!!؟؟؟

بس ذكى جدا الأخ طارق الحقيقة، إذ كيف يتخيل أيتها كائن على وجه البسيطة أن ينجح إضراب أو مظاهرة ضد الفساد وغلاء الأسعار وانخفاض الأجور دون أن يشارك فيها ويباركها الحزب الوطني الديموقراطي؟؟؟

وقال ردا على سؤال بخصوص الاعتقالات:

يا سيدتى لا يوجد في مصر شئ اسمه اعتقال، إنما يوجد تطبيق للقانون، فماذا تفعل السلطات حينما يتم خرق القانون؟؟

أنا ماليش دعوة ، هو اللي كان بيحاول يتكلم لغة فصحى.

جاتها نكد اللي عايزه خلف، يا أستاذ طارق.

بجد مش معقول الصفار والبياض ده كله. وأنا اللي كنت متخيل إن الديناصور كائن خرافي، أو أنه انقرض تماما، لكن طبعا أنا أعرف كويس جدا إن الديناصور يبيض ولا يلد.

إحنا مش جوه الجلابية - وده المهم

noreply@blogspirit.com (Mukhtar Al ِAzizi) — Sun, 6 Apr 2008 17:15:00 +0200

لما نرجع لفترة الستينيات نلاقى الفكر السائد عند الباحثين الغربيين والساسة والمؤسسات الدولية المهتمة بالمنطقة العربية بيركز على أنهم مفيش عندهم مشاكل إن الحاكم يكون طاغية طالما بيحقق مصالحهم وبيدوس عجلة التنمية ويدهس الشعب.

انهاردة وبعد هجمات سبتمبر أصبح الفكر السائد إن العالم الحر لازم يزرع الديمقراطية عند المنطقة المتخلفة دي وإن هو ده الأولوية الأولى والثانية والأخيرة فى تعاملهم مع المنطقة على أساس إن زرع الديمقراطية هيحقق تنمية اقتصادية وإن ده كفيل أنه يقضى على الإرهاب اللى بيعشش فى المنطقة دي ويروح يضرب العالم الحر بعد كده. فزرع الديمقراطية هنا معناه ضمان الأمان للعالم الحر.

المؤلم فى الموضوع إن الناس دي بيناقشوا إيه اللى المفروض يتعمل وإمتي يتعمل وإزاي يتعمل فيما يخص حياتنا وأنظمتنا: مرة يتسامحوا مع الطغيان ويدعموه ومرة يقولك لأ هنرزع الديمقراطية بالذوق والعافية، واحنا مالناش فى التور ولا الطحين.

-----------------------

ماعرفش ليه افتكرت فجأة من يومين – بدون سبب أو وجود رابط - أيام سقوط الاتحاد السوفيتى وإزاي كان في ناس متدينين ووعاظ وأئمة مساجد اعتبروا ده نصر مبين للإسلام وتعاملوا مع سقوط الاتحاد السوفيتي من جهة أنه دولة شيوعية إلحادية بنت جزمة، فى حين أنهم ماكنوش واخدين بالهم بتاتا إن وجود الاتحاد السوفيتي كان عامل توازن بشكل ما وإن التوازن ده كان ممكن ينفع منطقتنا.

أفتكر كمان إن فى ناس راحو جابو أول كام آية من سورة الروم عشان الكلام يبقي أكثر إقناعا: علي أساس يعنى إن السوفيت الملاحدة همه الفرس ولاد الوسخة، والروم اللي همه أمريكا ويومئذ يفرح المؤمنون بنصر الله.

------------------

بعد ما خلصت كتابة الكلام ده، اتفاجئت إن حسابى على بلوجسبيريت كان هيروح لأنه رفض كلمة المرور وطلب البريد الإلكترونى ... هو أنا بقالى كتير كده غايب عن المدونة؟

حتى بلوج سبيريت بيستهبل ، مش كفاية التراب اللى خانق الجو – جاتكو القرف

ركوب فؤادة علي عتريس باطــــل

noreply@blogspirit.com (Mukhtar Al ِAzizi) — Wed, 7 Nov 2007 15:30:00 +0200

معرفش مين صاحب فكرة أن الأخوان ناجحين سياسيا وأذكياء، ولا حتي أعرف من المسئول عن ترويجها. وما دعاني لتذكر هذه الفكرة الساذجة ما أثير مؤخرا حول إصرارهم علي وضع فقرة تخص عدم تولي المسيحي والمرأة لمنصب الرئيس في برنامجهم.

لو أذكياء بصحيح ماكنوش أثاروا النقطة دي. ماهو مش كل القواعد والمعتقدات بتتقال في شكل خطب وجعجعة ونصوص ولوائح. في حاجات الممارسات بتمشيها بشكل طبيعي خالص من غير حاجة لنصوص، بل وضد النصوص كمان ومحدش يقدر يفتح بقه وكله بالسياسة والكياسة.

يعني هو الباشمهندسين في أمريكا ولا في الإسكيمو محتاجين يكتبوا في دستورهم أنه لا يجوز للمسلم أو من له أصول عربية تولي منصب الرئاسة؟؟؟

ولا قبيلة خزاعة محتاجة تكتب أنه لا يجوز أن يرأسها إلا كوهين وليشع؟

مش محتاجين يقولوا لأن المجتمع مشبع بأفكار وممارسات لا تسمح له باختيار النوعيات دي لحكم البلاد وبالتالي حتي لو الدستور في البلاد دي قال يحق للمسلم أو ذوي الأصول العربية تولي المنصب الرفيع ففعليا محدش هينتخب الأخ ده أصلا غير الشلة بتاعة الجامع بتاعه ومعظم المسلمين في البحرين والكويت ومصر علي طريقة ستار أكاديمي (مش شرط يكون للمسلم صوت أو تأثير، المهم أنه يشارك في التصويت علي أي موقع الكتروني لأن في حد بعتله رسالة بتقول صوّت يا أخي في الله وانصر حَبَظلَم بن بَهَانا حتي نسترد الأندلس من أيدي الفرنجة). المهم ان النتيجة واحدة وهتفضل واحدة.

أنا عايز بقي الإخوان يبقوا أذكيا شوية ويكتبوا بالبنط العريض في افتتاحية البرنامج بتاعهم يحق للمرأة والمسيحي والمطلقة والشاذ جنسيا وبن الشرموطة تولي منصب الرئاسة. وابقي تعالي وريني الشعب اللي هينتخب وينجّح حد من الناس دي. دا أصلا الشعب مش هيهتم أنه يعترض علي النص ده نفسه لأنه لو أخد حريته واختار فمش ممكن يختار الناس دي خالص، خصوصا المطلقة لأننا كلنا عارفين إن المطلقة دي خربت بيتها بنفسها فما بالك بقي لو مسكت دولة؟؟ أكيد هتخربها، منطقية يعني.

وهو الشعب المصري محتاج حد يفهمه ويوعيه إن المرأة لا تصلح أن تكون رئيس؟؟

ياعم الحاج ده بيقولك أن المرأة أصلا لا يصح أن تكون أعلي الرجل في وضع

Woman on top

مع أن النتيجة واحدة والراجل بيدخل نفس العضو في ذات العضو، وكمان بيبقي مستريح من القيام بالمجهود الأكبر ومع ذلك مش ممكن أبدا يقبل الفكرة المنحرفة دي، إنتوا عايزين الدنيا تتمسخر برجالتنا وتقول الحريم بيدلدلوا رجليهم. ده بعيد عن ... شنباتكم يا خرعين.

تقوم انت محتاج تعرف الشعب إن المرأة مينفعش تمسك الرئاسة؟؟

هي الرئاسة في بلدنا إيه غير ركوب ودلدلة رجلين. لذلك ينسحب علي الرئاسة التشبيه السابق.

ولا ّ هو أي كلام وخلاص ولا عايزين يكتروا عدد الورق تقولش بيعملوا جرنال أهرام يوم الجمعة.

طيب بلاش كده، هو انت محتاج تقول لمسلم أنه ميشغلش عنده مسيحي، أو لمسيحي أنه ميشغلش عنده مسلم في الشركة أو محل البقالة بتاعه؟؟

ما الناس بتتصرف بسلطة التقاليد والطبيعة وبتنفذ ده بالحرف الواحد من غير ما تلقنّهم، ومن غير ما يكتب في الإعلان أنه عايز مسلم بس لوظيفة السكرتير.

ناقص يقولوا في برنامجهم لا يجوز أن يتولي الرئاسة العلماني أوالتنويري أوالممثلين أوالمغنيين أو السلفيين أو التبليغيين أو الصعايدة، ويجب أن يكون الرئيس إخوانيا صادقا ومعاه كارنيه العصابة.

يا جماعة إفهموا، الانتخابات عندنا في أي حتة أو علي أي مستوي في مصر بتمشي بالتعريص عموما والقهر وفي الحالة دي اللي معاه القوة الغاشمة هو اللي بيركب، يعني مفيش اختيارات ولا تصويت.

في الحالة التانية اللي الانتخابات ممكن تمشي فيها بنزاهية وحيادية تامة فالشعب مش هيختار حد إلا من خلال ثقافته وخلفيته لأن في حاجة إسمها عصبية (مش شرط بالمعني السلبي) وانتماء لما يتخيل الشعب أنه سيمثله خير تمثيل واللي بالضرورة لازم يكون شبهه في الدين والأخلاق والعرق ويكون جاره أو متجوز أخته أو حتي متكلم عليها إلخ، ومش منطقي أنه يختار عشيق أمه أو واحدة مطلقة أو واحدة أصلا أو عبير صبري. لأن مفيش معايير للكفاءة أصلا.

يا عم أبسط حاجة هيقولك لو الست دي متجوزة إزاي تمسك الحكم في حين إن جوزها موجود وإزاي نقبل تحكمنا واحدة كان لسة جوزها نايم عليها إمبارح قصدي نايم معاها يعني، ولو مش متجوزة هيقولك دي محتاجة راجل يحسسها بالأمان الأول قبل ما تحسسنا هي بالأمان والرخاء، ولو مطلقة هيقول أكيد بتنام مع رئيس الحكومة وهتخرب البلد زي ما خربت بيتها، ماهو مفيش مطلقة شريفة وعفيفة زي ما كلنا عارفين. ولاّ حد عنده اعتراض يا حوش يا لمامة ياللي هتبوظوا البلد بالحريم المايصة.

فالعملية محصورة في حالتين مالهمش تالت ومش محتاجين تنبيه ولا أصلا الموضوع يستاهل استهلاك مليمتر حبر لكتابته علي سطر واحد.

بس هاقول إيه، ناس مش فاهمة سياسة، مسكوني أنا بس البلد وأنا أوريكو تكتبوا الدستور إزاي.

- ناولني الحبّارة و رقعة الجلد دي ياد

- أجيبلك الريشة يا معلم أو فرع الشجرة المسنون؟

- لأ يا غبي أنا معايا الكيبورد بتاعتي.

عقيدة الحلول السياسي

noreply@blogspirit.com (Mukhtar Al ِAzizi) — Sat, 19 May 2007 18:40:00 +0300

هذه وقائع جلسة اعتيادية لمجلس النواب. الجلسة كلها كانت في حب رئيسنا وقائدنا ومعلمنا بمناسبة تجديد البيعة له لنمضي معه علي طريق الحرية والديمقراطية. وقائع هذه الجلسة أذيعت يوم الأربعاء الماضي 16 مايو علي الهواء مباشرة علي التلفزيون.

أنت القلب الذي يمنحنا الحياة ... باسم كل فلاح وعامل ... الخ نبايعك إلي الأبد

التفاؤل والأمل زرعته في قلوبنا يا سيادة الرئيس، وجادت السماء بالخير ... نعم للتطوير والتحديث والتنمية والحرية التي ننعم بها ... نحن في استقرار وأمن وسلام وتنمية يتمناها الآخرون... نعم للشموخ والصمود وسط الانكسار العربي ... الصدق والنظرة الثاقبة ... في ظل ثورة تشريعية ومتانة اقتصادنا.

بقلوبنا وأجسادنا وأرواحنا وجوارحنا نقول نعم لمن يحمل لواء العزة والمجد والفخار، المدافع عن العروبة والإسلام ... هذا المقدام هذا المغوار – تحية لك يا سيد الأحرار – ولدت وأنت محمي بقوة الواحد القهار

العالم يشهد بأسره مزايا القائد - مزاياه أصبحت منارات ... نعم وألف نعم للنهج القومي، نعم لك أيها القائد العظيم، قائدنا في الحاضر وإلي الأبد ... بوركت أمة أنت قائدها ... رفعت الأقلام وجفّت الصحف، بلدنا أحبها الله فمنحها رئيسنا ؛ ومن أحبه الله أحبه العباد ... أنت الحبيب ونحن محبوك.

لا نقول لك كما قالت اليهود لموسي اذهب أنت وربك فقاتلا إنا هاهنا قاعدون بل نقول لك كما قالت الأنصار لمحمد لو خضت هذا البحر لخضناه معك.

زار المشافي وأماكن العبادة فحصل علي بركتها وزار المزارع والمصانع – تشهد لك كل منطقة بذلك

اخترناه لأننا نؤمن بنظرية كاريزما القائد ... جئناك لتأخذنا إلي الحقيقة، لتأخذنا إلي اليوم الذي تتحرر فيه أراضينا ... قائدنا عظيم واستثنائي ... عزة الوطن ورفعته، نعم للوحدة الوطنية، نعم للكلمة الواحدة

الأخوة الأعضاء، كل كلمات الأرض لن تفي رئيسنا بشار الأسد حقه لذلك أرجو أن تكون كلماتكم مختصرة حتي يأخذ كل عضو حقه.

------------------------

كنت أقلب القنوات فاهتدي - أو ضلّ - الريموت طريقه إلي قناة سوريا وكانت تلك جلسة مجلس النواب هناك وموضوعها حب القائد العظيم المغوار الدكتور بشـــار الأسد الذي رشحه المجلس لولاية دستورية ثانية تعبيرا عن الوفاء والولاء.

وكانت هذه هي المرة الثانية التي أشاهد فيها جلسة لهذا المجلس عبر سنين حياتي. أذكر تلك الجلسة التي شاهدتها منذ سبع سنوات حينما كنت أجلس أنا وأخوتي نتابع الأخبار بعد وفاة حافظ الأسد. أذكر أن الدستور تم تعديله حتي يتسنّي لبشار الأسد أن يخلف أباه. وأعتقد أن الدستور لم يسمح أن يتولي الرئاسة من هو دون الأربعين. وقتها كان بشار في عامه الرابع والثلاثين علي ما أذكر. تم تمرير التعديل وجلس بشار علي عرش أبيه بالدستور.

كنت آنذاك قد أكملت عامي العشرين وكنت قد قرأت عددا لا بأس به من الكتب الإنجليزية التي تتناول التراث الفلسفي السياسي في الغرب؛ وكم كنت أحسد هؤلاء البشر علي كفرهم بكل المقدسات أو معظمها، هذا الكفر الذي قلّص مساحة المقدسات – ربما لم يلغيها تماما – بما فيها قداسة الكهنة وقداسة الحكام والسلاطين والرؤساء.

لكن الوضع في عام 2000 كان مختلفا عن الآن بالطبع. في عام 2000 كنا لانزال نسمع أغنية اخترناه اخترناه وقلوبنا معاه. لم تكن أمريكا قد أتت بجيوشها لتصك كلمات جديدة: الحرية، الديمقراطية، التعددية، الانتخابات الحرة النزيهة.

لم يكن مشروع الشرخ الأوسط الكبير قد بدأ بعد.

لست متابعا للشأن الداخلي أو الخارجي لسوريا الآن ولم أكن يوما أبدا. لكن لغة مجلس النواب السوري لا تختلف عن لغة مجلس شعبنا الموقر. كلام عن الوحدة الوطنية وتأليه للرئيس وانجازاته التي تضاهي تعقيدات الحامض النووي وسلامة النظام الشمسي ودقة الساعات السويسرية، القائد الملهم المغوار المقدام المحمي من الله الواحد القهار!!! كل هذا التطابق وأكثر منه يزكم الأنوف حقا. تلك النبرة الدينية الخاشعة أمام جلال وعظمة وعلم وحكمة وعزة ورحمة وهيمنة وجبروت ورعاية الرئيس بشـّـــ الأســـــــــــد ــــار، هذه الاستعارات والكنايات تعكس نوعا من التدين السياسي المتمركز حول الرئيس الإله أو الإله الرئيس.

ذكري تأسيس اسرائيل

noreply@blogspirit.com (Mukhtar Al ِAzizi) — Wed, 9 May 2007 13:50:00 +0300

في هذه الاسطوانة – الإمبراطورية البريطانية - التي شاهدتها منذ سنة تقريبا سرد لأحداث هامة في تاريخ الإمبراطورية البائدة وانفراط عقدها. أعتقد أن مدة البرنامج الوثائقي تزيد عن ثلاث ساعات. يمنعني الكسل أن أشاهد محتواها ثانية لكتابة عرض مفصّل. علي أية حال لقد اقتطعت منها جزئين عن نشأة اسرائيل بما أننا هذه الأيام سنستقبل تلك الذكري المأساوية يوم الإثنين القادم. سأقوم بتحميل الجزء الثاني لاحقا هذا اليوم بإذن الله.

شاهد الجزء الأول

تحديث: تم اضافة الجزء الثاني

من غيرك يميتنا ويحينا يا الله - عفوا يا سيادة الرئيس

noreply@blogspirit.com (Mukhtar Al ِAzizi) — Sun, 29 Apr 2007 13:30:00 +0300

أليست اللغة عاجزة حقا عن احتواء ما يدور بذهن الإنسان. هذا ما أشعر به بعد قراءة الموضوعات التي تثير إعجابي أو التي تثير اشمئزازي فأرغب في كتابة كلمات الإعجاب أو التقيؤ.

رحم الله شيطانك الإبداعي يا ربيع، حدثتنا من السماء التاسعة عن أبانا الحبّوب طيازوف. ثم شاءت الأقدار أن أقرأ مقال ممتاز القط فلم أدرِ أيسرق القط منك يا ريعو، أم يقلد رئيس البلاد أبانا طيازوف المبجل؟

المجد لأبينا الحبّوب طيازوف في السماء التاسعة، ولتحل لعنة سفلسكوو العظيم علي كل من لطّخ الراية الطيازوفية المقدسة بالأخبار المفبركة.

تدوينة ربيع المشار إليها نموذج يفترض فيه أن يكون هزلي، لكن مع قراءة كلام ممتاز القط يخيل إليّ أن حتي تدوينة ربيع تكاد تفقد الأساس الذي تقوم عليه وهو التضخيم وإحداث فجوة بين الواقع والخيال.

ما أراه هو ما كنت أسميه عقيدة الحلول السياسي

السبت 28 ابريل

الأخبار – ممتاز القط

العمال يشكون مر الشكوي من الغلاء، والارتفاع المتواصل في الأسعار!! يشكون من انخفاض مستويات أجورهم!! وتوقف صرف بعض الحوافز والمكافآت لهم!!
يشكون التفرقة المرة بينهم، واختلاف الحوافز والمكافآت من شركة لأخري، رغم أنه لا ذنب لهم في تحقيق شركات لخسائر متواصلة، وأخري تحقق نتائج!!
يشكون من متطلبات الحياة، وعدم تعيين أبنائهم بعد انتهاء تعليمهم!! يشكون من نقص وتضارب المعلومات والأرقام الخاصة ببيع شركاتهم، والشائعات التي يروج لها بعض المندسين علي حركتهم النقابية!!

ورغم انين الشكوي ومرارة المعاناة، كانت عاصفة من الحب. عاصفة تحمل في طياتها دلالات ومعاني كثيرة.تلك التي استقبل بها عمال مصر الرئيس مبارك، لحظة دخوله قاعة المؤتمرات الرئيسية، في احتفالات مصر بعيد العمال أول أمس .
عاصفة جياشة لا تعرف الرياء، أو النفاق. لا تعرف شيئا سوي الوطنية الصادقة، والانتماء الحقيقي لمعدن شعبنا الطيب الصبور. حمل عمال مصر صور الرئيس مبارك، وتبارت حناجر الحب في صياغة كل المعاني الجميلة، التي تعكس علاقة مبارك الحقيقية بشعبه. الشعب الذي يجدد دائما حبه وولاءه لرجل أصبح رمزا يفخر به تاريخ مصر .
كانت عاصفة من الحب، تجددت طوال 80 دقيقة، استغرقها الاحتفال وخطاب الرئيس في عيد العمال.. وكانت رسالة، يؤكد من خلالها شعب مصر تمسكه بالرجل، الذي عبر به المحن والشدائد، واستطاع رغم كل التحديات ان يحفظ لمصر هاماتها وشموخها، وأمنها واستقرارها.
عاصفة من الحب، أكد بها عمال مصر، الذين يمثلون قلب شعبها الاصيل، تمسكهم بالرمز الذي تولي مسئولية الحكم وهو متوج بالنصر، يردون بها علي كل افاعي الظلام، التي تحاول أن تنفث سمومها. يردون بها علي كل القوي الحاقدة علي مصر وشعبها.. الناقمة علي ما تمثله كقوة اقليمية في المنطقة، ترفض سياسات الهيمنة، وأسلوب املاء الشروط.
عاصفة من الحب، رغم كل ما سبقها من سخونة في المواقف، واضرابات في بعض المصانع، وارتفاع حدة الحوار الدائر حول المواءمة بين الخصخصة، وما تفرضه من اعباء، وبين الحماية الكاملة لحقوق، ومكتسبات العمال.

العمال رفعوا صور الرئيس خلال المظاهرات، ورفعوها في يوم عيدهم.. الرئيس هو التهديد الوحيد، الذي يستخدمه عمال مصر، وكل ابنائها البسطاء، عندما يشعرون أن هناك أحدا يريد المساس بحقوقهم.. انه الرمز الذي يلجأون إليه.. إنه الحصن الذي يحتويهم، ويذود عنهم.
إنه كبير مصر، ليس لأنه الرئيس فقط!! ولكن لأنه مبارك الانسان، ابن أرضها الطيبة، ونبت شعبها الاصيل..
مبارك لا يملك كل من يعرفه إلا أن يحبه.. مبارك الذي يتحدث بنفس اللغة والمفردات، التي تعكس سماحة وصفاء ونقاء سريرة، يتميز بها المصريون عن كل أجناس الأرض. مبارك الذي يحرص دائما، في كل زياراته التفقدية، علي أن يسأل العمال.. يتحدث معهم.. يستفسر عن أحوالهم.. يعيش هموم شعب يثق في أن قائده، وباعث نهضته، قادر علي أن يحتويه، ويتسع قلبه وعقله وفكره له. ويعرف أن مبارك هو ملاذه الأول والأخير.
يداعب طفلا صغيرا.. ويهمس ضاحكا في أذن شيخ مسن.. مبارك يعيش في كل بيت بمصر.. تشغله وتؤرقه أي شكوي من أي انسان. كل مطالب العمال هي مطالب الرئيس.. يسعي جاهدا لتحقيقها.. الناس تريد زيادة المرتبات، والرئيس يتمني مضاعفتها.
الناس تريد نهاية لموجة الغلاء وارتفاع الأسعار.. وهي مطالب تجسدها تكليفات الرئيس لحكومته، ومناقشاته خلال الاجتماعات الوزارية، التي يعقدها لمتابعة خطوات العمل الوطني.
عاصفة من الحب.. بادلها الرئيس مبارك قائلا لعمال مصر: انتم في قلبي.. بادلها بتأكيدات وتحذيرات واضحة للحكومة.. ولكل قوي المجتمع، بانه لن يسمح أبدا بالمساس بحقوق ومصالح العمال، أو النيل منها. وأعتقد أن الأيام القادمة، سوف تشهد ترجمة أمينة لذلك.

***

لم يقف المستشار جودت الملط علي سلالم الجهاز المركزي للمحاسبات، ليعلن سخطه وغضبه وانتقاده اللاذع لأداء الحكومة!!
لم يذهب إلي القنوات الفضائية المأجورة، ليبيع لهم الاساءة إلي مصر كما يفعل بعض الموتورين لكنه التزم القانون، والاعراف والتقاليد، ومن داخل البرلمان.. بيت كل المصريين، فجر تقريره 'القنبلة' الذي يعتبر وساما نفخر به، ويجب أن تفخر به الحكومة أيضا.
تضمن التقرير 16 بندا أساسيا تمثل كلها تهما، تؤكد أن هناك خللا كبيرا يشوب اداء الحكومة، رغم كل الأرقام الوردية، التي تعلنها وتتمسح فيها!!
وبعيدا عن الاتهامات واوجه القصور، التي قدمها المستشار جودت الملط في تقريره، دعونا نتوقف أمام شهادة حق، لا أعتقد ان أحدا في مصر يستطيع أن يتجاهلها أو يتجاوزها، لانها صدرت من رجل لا نملك سوي احترامه وتقديره.. شهادة حق، من حقنا جميعا أن نفخر بها، لانها تؤكد حقيقة ما تعيشه مصر من حرية وشفافية، كان مبارك هو أول من فتح أبوابها.
قال المستشار جودت الملط، إن الرئيس مبارك، وعلي مدي 8 سنوات تولي فيها مسئولية رئاسة الجهاز، لم يحدث قط أن ابدي أي ملاحظة علي تقارير الجهاز، لم يحدث أن قال افعل أو لا تفعل.
وأضاف ان المتأمل في أمورنا الداخلية والخارجية، يبدو له بوضوح انحياز رئيس الجمهورية دوما إلي البسطاء والفقراء، واهتمامه باحوال غير القادرين ومحدودي الدخل، وتطلعه إلي رفع مستوي معيشة المواطنين، ومساهماته الخارجية التي تنعكس بالخير علي أوضاعنا الداخلية، والحكمة والجدية في العمل، مدافعا دوما عن قيم العدل والحرية، منحازا لهموم وآمال الشعب المصري، مستهدفا صالح مصر في المقام الأول.
فإذا تأملنا حال المسئولين بالجهاز الاداري للدولة والادارة المحلية، والهيئات العامة الخدمية والاقتصادية، وشركات القطاع العام، وقطاع الأعمال العام، نجد أن البعض له بصمات واضحة، وانجاز بارز أعطي لمصر الكثير.
إلا أن عددا، ليس بالقليل، من المسئولين بتلك الجهات، عطاؤهم ضئيل، ومتابعتهم واشرافهم محدود، يفتقدون القدرة علي المبادأة، والتصدي للمشكلات العامة، ليس لديهم القدرة علي الابداع، بينهم وبين الرئيس مسافة كبيرة في الأفكار والمواقف، وفي الأقوال والأفعال.

***

عاصفة من الحب، بادل بها عمال مصر الرئيس مبارك، وشهادة حق تذيل تقريرا يحمل اتهامات بالتقصير الشديد والاهمال، والفشل لاداء الحكومة. لكن رباطا واحدا يجمعهما.
رباط يؤكد أن شعب مصر كله، يبادل الرئيس الثقة والحب.. لانه السند القوي الذي يقف دائما منحازا للحق والعدل.. يقف دائما سندا لشعبه.. يدرك آماله وطموحاته.. يعيش همومه ومشاكله.
مبارك الذي حمل عمال مصر صوره، لانه الملاذ والحماية لحقوقهم ومصالحهم، هو مبارك الذي لا يتدخل في عمل أي جهاز من أجهزة الرقابة، ففي عهده اتسعت الحرية، ليكون صوت الشعب والقانون، سيدا يحظي بالاحترام والتقدير، حتي من أعلي سلطة في مصر

تحت الأرض

noreply@blogspirit.com (Mukhtar Al ِAzizi) — Tue, 3 Apr 2007 13:30:00 +0200

الدستور الجديد لا يعني – حرفيا – سوي دفع المعارضة الحقيقية نحو سراديب تحت الأرض للتعبير عن رؤاهم وتوجهاتهم سواء جماعات إسلامية أو تنظيمات يسارية وشيوعية، طالما هناك قيود علي تشكيل أحزاب بمرجعية دينية، طالما بقيت لجنة الأحزاب المكونة من أعضاء من الحزب الحاكم لتعطي الضوء الأخضر للمعارضة كي تعارض.

---------------------

الدستور الجديد ينص في المادة الخامسة

وللمواطنين حق تكوين الأحزاب السياسية‏,‏ وفقا للقانون‏,‏ ولا تجوز مباشرة أي نشاط سياسي أو قيام أحزاب سياسية علي أي مرجعية أو أساس ديني‏,‏ أو بناء علي التفرقة بسبب الجنس أو الأصل‏.‏

أعتقد أنه تجدر الإشارة إلي أن هذه المادة الجديدة لا تقضي علي حق الاخوان في تكوين حزب ديني وحسب بل وتقضي أيضا علي حق حزب الوسط في تأسيس حزب علي أساس مرجعية إسلامية. دعك من مادة الدستور أصلا، فتأسيس حزب يتطلب موافقة الحزب الوثني الديمقراطي. تذهب لتقدم له طلبا: والنبي أنا عايز أعارضك، مُنكن، لو مُنكن يعني إذا سمحت تسمحلي أعارضك؟؟

يقوم هو يرد ويقول: لأ مش مُنكن أبدا.

---------------

وبعدين صحيح إزاي هو بيتصل بالظواهري في حين إن الاستخبارات الأمريكية مش عارفة مكانه؟ طبعا ممدوح اسماعيل معتقل بحسب قانون الطوارئ – مؤقتا يعني لحد ما يطلع قانون الارهاب وساعتها الحاج هيبعته جوانتانامو شخصيا.

----------------------

تقدر تقول لظابط المباحث بالفم المليان: فين إذن التفتيش؟ ولو بهدلك، تقدر ترفع قضية وتمشي في طريق استعادة حقوقك لكن قلي كده أعمل إيه مع ظابط أمن الدولة لما يجي يرزع الباب ويفتش ويجر أخويا لمكان منعرفهوش؟!! – جزء من حوار بيني وواحد قريبي يوم الأحد لما رحت اسأل علي أخوه اللي اعتقل من أسبوعين.

بيضة واتقسمت نصين

noreply@blogspirit.com (Mukhtar Al ِAzizi) — Mon, 2 Apr 2007 14:00:00 +0200

كل واحد يقول رأيه – طالما في دستور وقانون –

وأنا قلت رأيي كرئيس للجمهورية؛ وأنتم قلتم رأيكم كمواطنين. حد ليه شوق في حاجة؟؟

-----------------------------

عندما تأهبت للذهاب إلي مطعم التابعي لشراء إفطار، طلب مني سيزيف ثلاث سندويتشات، اثنين فول وواحد بيض. تأخرت قليلا هناك لحين تجهيز ساندوتش البيض ولما عدت، أيقظت سيزيف وقلت: ساندوتش البيض ياعم هو اللي أخرني. فقال بالبلاغة التي عودني عليها: ماهو عشان كده اسمه بيض.

----------------------------

بيضة واتقسمت نصين

شيطاني يوحي إليّ أن لجنة الأحزاب ستوافق علي حزب المستقبل لصاحبه جمال مبارك لأن برنامجه متميز. وبعد نهاية فترة حكم الرئيس الحالية التي تنتهي في 2011 يقوم الرئيس بترشيح نفسه للمرة .. لا أذكر ... وينتخبه الشعب بمباركة كاسحة. بعد مرور سنة من فترة الولاية الجديدة، يتنحي مبارك عن الحكم لأسباب صحية ويكون ذلك في منتصف عام 2012 حيث يكمل حزب المستقبل سنواته الخمس في الوجود. يتم اجراء انتخابات رئاسية جديدة ويدخل حزب المستقبل مع باقي الأحزاب في منافسة شريفة. يفوز جمال مبارك ويحكم مصر لمدة واحد وثلاثين عاما أخري – ويراعي التجديد بعد اجراء انتخابات نزيهة.

وفي السنة الأولي ينهار الحزب الوثني الديمقراطي حيث يستقيل أعضاؤه مائة تلو مائة وينضمون لحزب المستقبل الليبرالي الذي يبتلع مؤسسات الدولة كسَلفه ويكون خير خلف لخير سلف.

----------------------------

الصباح المعتاد يبدأ بتصفح مجمع العمرانية ثم بعض الصحف. زفاف جمال سيكون يوم الرابع من مايو القادم – نعم في نفس يوم عيد ميلاد رئيس البلد التي نموت فيها ولا نحيا، وهو أيضا نفس اليوم الذي يعرض فيه التلفزيون المصري فيلم الناصر صلاح الدين في سهرة القناة الأولي كل عام. وهكذا يصبح اختيار ميعاد الزفاف مثاليا بحق، فبعد الزفاف الأسطوري في مجلس الشعب، يأتي الزفاف الحتمي لجمال. ولست أدري لماذا لا يعرض التلفزيون فيلم المغتصبون في تلك المناسبة علي سبيل التغيير أو التعديل بما أن كلمة التعديل هي الرائجة هذه الأيام.

فاللهم بارك لهما وبارك عليهما واجمع بينهما في خير

وارزقهما ذرية صالحة زاهدة في عرش مصر! اللهم حقّر الدنيا في عيون جمال وذرية جمال، وارزقهم القناعة وذكرهم بالموت كل ساعة! اللهم اجعلهم مواطنين، مملوكين لا مالكين، اللهم احشرهم مع المواطنين ولا تجعل الدنيا في قلوبهم ولا في أيديهم حتي يدخلوا الجنة بدون سابقة عذاب أو صحيفة حساب، اللهم اجعلهم متصوفين ولا تجعلهم حزب وطنيين أو ليبراليين، اللهم ولا ترهقهم بحكم مصر وشعب مصر، اللهم تقبل آمين

اللهم اشغلهم بالآخرة عن الدنيا حتي يكونوا من عبادك الصالحين الطيبيين

اللهم اجعل مصر ضيقة وخنيقة في عيونهم، حتي يهاجروا إليك فلا يجدون سعة ولا رحابة إلا في جناتك. آمين

صباحية مباركة يا شعب

noreply@blogspirit.com (Mukhtar Al ِAzizi) — Thu, 29 Mar 2007 13:15:00 +0200

"ولأن ولوج جمال اللحظة التاريخية القادمة احتاج إلي توسيع فتحة الديمقراطية من خلال وطء الدستور القديم بإتيانه من القاعدة، ووضع أصابع الفكر الجديد في كل ثناياه وقنواته تمهيدا لرفع الدستور الجديد وقذف عصارة الحنكة السياسية التي تزيد عن ربع قرن في مجري تاريخ بلدنا الحبيب، فقد قررنا – نحن رب البلاد والعباد – تعديل الدستور". - جزء من لاوعي أو وعي حاكم عسكري

أحاول أن أتلهي في عملي وفي القراءة الثانية لرواية موسم الهجرة إلي الشمال لكن أجد نفسي أعود مجددا لقراءة الدستور لعلني أجد نفسي مخطأ وأجد المعارضة متآمرة مع جهات أجبنية وأجد مخاوف المتخوفين لا أساس لها من الصحة.

أقرأ المادة 136 المعدلة في فقرتيها الأولي والثانية كالآتي:

( مادة 136 ) الفقرتان الأولي والثانية بعد التظبيط:
لا يجوز لرئيس الجمهورية إصدار قرار بحل مجلس الشعب إلا عند الضرورة وبعد أخذ رأي رئيس مجلس الوزراء‏.‏ وإذا حل المجلس في أمر فلا يجوز حل المجلس الجديد لذات الأمر‏.‏ ويجب أن يشتمل القرار علي دعوة الناخبين لإجراء انتخابات جديدة لمجلس الشعب في ميعاد لا يجاوز ستين يوما من تاريخ صدور قرار الحل‏.‏

المادة (141) بعد التظبيط:

يعين رئيس الجمهورية رئيس مجلس الوزراء ويعفيه من منصبه ويكون تعيين نواب رئيس مجلس الوزراء والوزراء ونوابهم وإعفاؤهم من مناصبهم بقرار من رئيس الجمهورية بعد أخذ رأي رئيس مجلس الوزراء‏.‏

أحاول أن أفهم. ما معني عند الضرورة؟ بعبارة أخري – ما هي الضرورات التي تبيح للرئيس أن يحل مجلس الشعب؟ ومن الذي سيحدد الضرورات التي تبيح الحل؟ ماذا لو كان الرئيس – لا سمح الله- ديكتاتورا فما هي الضمانات التي تحمي مجلس الشعب من دكترة الديكتاتور؟

وإذا كان في المادة 141 المعدلة يحق للرئيس أيضا تعيين واعفاء رئيس مجلس الوزراء من منصبه فلماذا يتعين علي الرئيس أن يأخذ رأي المرؤوس في حل مجلس الشعب؟ وماذا لو عارضه رئيس مجلس الوزراء؟

حكمتان من بلاد الكفار:

William Pitt the Elder:

"Unlimited power is apt to corrupt the minds of those who possess it; and this I know, my lords, that where laws end, tyranny begins."

Lord Acton:

"Power tends to corrupt, and absolute power corrupts absolutely"

حقبة بنت قحبة فعلا.